Bafilipi 2 - INDAGANO INYA:YA

Abakristo bongwanega

¹ Mbe, araba kurio kusi:ri:sya kwone mu Kristo, amwi kufuŋamya kwone okwo kwenda, amwi kusangira kowne okwo Mwoyo, amwi kufwirana cigongo,

² Mbe mukumisye okukonderwa kwani ati, mwiganirisyega gumwi, mubega no kwenda kumwi, no mwoyo gumwi, no kwiganirisya kumwi.

³ Mutakoraga ci:nu co:ne kurwo kuyomba, nakabee kurwo kwikuya kutyo era, tari mu:nu wo:ne mu bwororo akusyega owejabo kukira omwene.

⁴ Mu:nu wo:ne ataroraga byae era, nawe mu:nu wo:ne arorega ebya bandi one.

Be:keye rwa Kristo kutyo e:keisye

⁵ Emwe mubega no kwiganirisya kunu kwariga mu Kristo Yesu.

⁶ Oyo nakabee ariga:ri mu rususo rwa Nyamuanga, nawe ate:ganirisisye okurwana na Nyamuanga rwe ci:nu co kurumatanirako,

⁷ Nawe e:so:sisyeko, nagega orususo rwo mugaya, nasusana rwa ba:nu,

⁸ Wejire aboneka ano rususo rwo mu:nu, ne:keya, no:roba kukinga mu kufwa nikwo okufwa okwa ku musaraba.

⁹ Nyamuanga kwakorere namukusya muno, namuyana risi:na rinu rikirire amasi:na go:ne,

¹⁰ Korereki jiŋokora jo:ne jifukamire risi:na rya Yesu, eja ba mu rwire ne ja ba ku:si, na be mwaro ya i:si,

¹¹ Na jindimi jo:ne jitogore ati, Yesu Kristo niwe Ratabugenyi, kwikusyo rya Nyamuanga Rata.

Okukora kwo mweruro

¹² Mbe, abendwa bani, rwa kutyo mwongwaga siku jo:ne, tari runu anye enibao era, nawe woryanu kukira muno anu nitario, mbe, mukumisyega omweruro gwemwe abene mu ku:baya no kuyarara.

¹³ Okuba Nyamuanga niwe kakora mwimwe, mwendega no kukora rwa kutyo asi:mire mu kwenda kwae.

¹⁴ Mukorega byone mutarimo kwitoŋanira amwi mamba.

¹⁵ Mube ba:na ba Nyamuanga, banu mutariko esoro, amwi burigerige, amwi cikayo, aagati ya riimbo rinu rikotakotere ne ryo butongwa, nemwe omuboneka rwo bweru bwa mu:si.

¹⁶ Mweresyega omusango gwo buanga, korereki nibe ne co kwikirisya ku rusiku rwa Kristo, ati nitatangirene kutyo era, amwi nitanyakire kutyo era.

¹⁷ Nawe nakabee nde:tururwa ku co:go na ku kufurubenda kwo kwikirisya kwemwe, nawe Kukonderwa, no kukondererwa aamwi nemwe bo:ne.

¹⁸ Nemwe one mukonderwe no kukondererwa aamwi nanye.

Paulo nake:seresya omurembe gwebwe

¹⁹ Nawe eniikanya mu Ratabugenyi Yesu ati, nibatumire Timoteo bwangu, nanye one nisi:ri:sibwe ariba namenya kutyo muri.

²⁰ Okuba nitana mu:nu undi unu ano mutima guriŋene no gwae, unu ke:gana emisango jemwe cimari.

²¹ Okuba bo:ne abayenja byebwe abene, bitari bya Yesu Kristo.

²² Nawe mumenyere orukuma rwae ati, akoreraga aamwi nanye mu Bigambo byo bwana, rwo mwana ne:semwene.

²³ Mbe eniikanya okumutuma oyo bwangu, ariba namenya ganu garimbona.

²⁴ Nawe eniikanya mu Ratabugenyi ati, nanye ndija bwangu.

Ebya Epafurodito

²⁵ Nawe nabwene ati kwiire okubatumira omwana wa:su Epafurodito, omukosi we:ja:su no musirikare we:ja:su, nawe niwe intumwa yemwe no mufurubendi wani mu bukene bwani.

²⁶ Okuba ariga nabaranga emwe bo:ne, nabawera omwoyo muno, okuba mwonguywe ati arwae.

²⁷ Okuba ariga arwae ajo:kufwa, nawe Ratabugenyi amufwiriye cigongo. Amwi atari omwene:ra, nawe anye one anfwiriye cigongo, nisige kujira butaka bwafu muno.

²⁸ Kwonakorere ni:mutuma, korereki mukamurora mukonderwe, nanye one nisige kuguma nino butaka.

²⁹ Mbe mumuramire mu Ratabugenyi no kukonderwa kwone. Na be:ja:bo oyo mubayanega ecibaro.

³⁰ Okuba ariga ajo:kufwa kurwo murimu gwa Kristo, okuba ateeo obuanga bwae korereki akumisye binu byariga bitarimo mu kufurubenda kwemwe kwanye.