2 Petero 3 - INDAGANO INYA:YA

¹ Abendwa, woryanu inyaruba inu ni ya kabiri inu enibandikira. Mwijo jo:ne enikungirisya obwenge bwemwe bunu butarimo burigerige, nimbe:cukya.

² Korereki mwicukega emisango jinu ja:ikirwe kara na baragi abe:ru, ne ciragiro ca Ratabugenyi Omukisya weswe, cinu eswe care:teywe na jintumwa jemwe.

Jintungwa ja mu siku ja ku bute:ro

³ Okwamba mumenye ati, mu siku ja ku bute:ro abagayi bariboneka banu barigaya nibaribatira mu kurigira kwebwe abene,

⁴ niba:ika ati, ?Omurago gwo ku:ja kwae guri a:ki? Okuba basaja anu bakama:miyega, ebi:nu byone biri mbwobwo mbwobwo rwa kutyo byabaga kuso:kerera anu byambire okuangwa.

⁵ Okuba abe:ugya omusango gunu ati, kara orwire rwariga rurio, na i:si one yaso:kere mu manji, yariga iri mu manji, nibibao kurwo musango gwa Nyamuanga,

⁶ Kurwo musango ogwo i:si ya kara ni:sikibwa amanji ni:simagira.

⁷ Na ka kurwo musango ogwo i:si ya woryanu no rwire rwa woryanu bibi:kiywe omuriro, nibirindwa kukinga ku rusiku rwo kutema eci:na no rwo kusimagira kwa ba:nu abanyamusi.

⁸ Nawe abendwa, mutarabirwa cinu ati, Ku Ratabugenyi orusiku rumwi ruri ati myaka cisira, ne myaka cisira jiri ati rusiku rumwi.

⁹ Ratabugenyi atakuko:ra kukumisya emirago jae, rwa bandi kutyo abe:togera kuko:ra, nawe ke:gumirisya nemwe, okuba atakwenda mu:nu wo:ne abure, nawe bo:ne bakinge mu kuta.

Orusiku rwa Ratabugenyi

¹⁰ Nawe orusiku rwa Ratabugenyi oru:ja rwo mwifi. Niwo orwire ruriso:kao ne ciru:mo cinene, ne binu byo busimuka birifukumba kurwo kubira okwafu, na i:si ne bikorwa binu birimo birirungura.

¹¹ Araba mumenyere ati, ebyo byone biriwerera, ?mbe kube:ire mube ba ntungwa ki mu kuribata okweru no kwiyama?

¹² Okuba omurindirira nin wenda muno oku:ja kwo rusiku rwa Nyamuanga, runu orwire rurirungura nduwerera, ne bi:nu byo busimuka birifukumba kurwo kubira okwafu.

¹³ Nawe ecirindirira orwire oruya:ya na i:si inya:ya, munu bwikae oburenge:resi, rwa kutyo aragire.

¹⁴ Mbe abendwa, okuba omurindirira ebyo, mukome:rega korereki abasange mu murembe mutariko ebara amwi mutariko esoro.

¹⁵ Na ka mwiganirisyega ati, okwigumirisya kwa Ratabugenyi nigwo omweruro. Nikwo kutyo no mwana wa:su mwendwa Paulo one kutyo abandikiye mu bwenge bunu ayabirwe,

¹⁶ rwa kutyo kandika mu nyaruba jae jo:ne. Jirimo ejindi mikome:e okusombo:kerwa, jinu banu bate:igisibwe na banu batarumire abajico:tora, ndijei mbasimagira abene, rwa kutyo abakora na binu byandikirwe ebindi one.

¹⁷ Mbe abendwa, banu mwatangatire okusombo:kerwa, mwikengega mwasiga kugegwagegwa no kuyaba kwa banyantongwa, nimugwa okuso:ka mu bukome:e bwemwe.

¹⁸ Nawe mukurirega mu cigongo, na mu kumenya Ratabugenyi no Mukisya weswe Yesu Kristo. Oyo akusibwega woryanu na kukinga kajanende na kajanende.