2 Bakorinto 1 - INDAGANO INYA:YA

Okuke:sya no kusi:ma

¹ Anye Paulo, intumwa ya Yesu Kristo kurwo kwenda kwa Nyamuanga, aamwi na Timoteo owa:su, ecibandikira ikanisa ya Nyamuanga inu iri Korinto, aamwi na be:ru bo:ne banu bari mu ca:ro come ca Akaya.

² Ecigongo cibe kwimwe no murembe binu ebiso:ka ku Rata Nyamuanga na ku Ratabugenyi Yesu Kristo.

³ Akusibwe Nyamuanga Esemwene Ratabugenyi Yesu Kristo, niwe Rata owe cigongo na Nyamuanga owo kusi:ri:sya kwone.

⁴ Niwe unu kacisi:ri:sya mu nya:ko jeswe jo:ne, korereki eswe citure okusi:ri:sya banu bari mu nya:ko yo:ne, no kusi:ri:sibwa kunu eswe abene ecisi:ri:sibwa na Nyamuanga.

⁵ Kwo kuba rwo kunyasibwa kwa Kristo kutyo okwiyongesyaga kwiswe, nyaburiko okusi:ri:sibwa kweswe, one okwiyongesyaga kurwa Kristo.

⁶ Nawe cikanya:sibwa, ecinya:sibwa kurwo kusi:ri:sibwa kwemwe no mweruro gwemwe. Cikasi:ri:sibwa, ni kurwo kusi:ri:sibwa kwemwe kunu omubona wora mwegumirisya okimya:sibwa kunu eswe one ecinya:sibwa.

⁷ No kwiikanya kweswe kurwemwe kurumire. Cimenyere ati, rwa kutyo musangiye mu nya:ko, nikwo kutyo omusangira mu kusi:ri:sibwa one.

⁸ Okuba, bama ba:su, citakwenda mureme okumenya ebyo kunya:ka kweswe kunu kwacibwene mu Asia, kutyo kwacisitoee muno kukira amanaga geswe, ndijei nicifwa omutima ati, citakuja kukira.

⁹ Neswe abe:ne cariga cimenyere ati, ecifwa, korereki casiga kwiikanya eswe abe:ne, tari Nyamuanga unu kasu:rura abafu:ye.

¹⁰ Niwe acikisisye mu rufu rubi:bi rwejabo orwo, ka aracikisyaga. Niwe eciikanya ati, acajo:kucikisya.

¹¹ Okuba emwe one omusakira mu kucisabirwa eswe, korereki ba:fu basi:me kurwa ribando rinu cayaywe kurwo kusabwa kwa ba:nu ba:fu.

¹² Okuba okwikuya kweswe, no kwaika kwe mitima jeswe ni kunu ati, cariga niciribata mu:si mu bweru na mu cimari imbere ya Nyamuanga, tari mu bwenge bwo mubiri, nawe ni mu cigongo ca Nyamuanga, no kukira muno cabaga kutyo kwimwe.

¹³ Kwo kuba citakubandikira bindi tari binu omusoma na binu omumenya. Mbe eniikanya ati muribimenya okukinga ku bute:ro.

¹⁴ Rwa kutyo emwe mwacimenyere kuto:to ati, eswe ciri kwikuya kwemwe, na rwa kutyo emwe muri kwikuya kweswe ku rusiku rwa Ratabugenyi Yesu.

Paulo nako:ra okubakingako

¹⁵ Na mu kwiikanya kunu nariga ninenda okukinga kwimwe kara, korereki muyabwe ribando rya kabiri,

¹⁶ Nariga nendere okutura kwimwe okugenda Makedonia, no kuso:ka Makedonia nisube oku:ja kwimwe, nemwe munsakire okugenda Buyaudi.

¹⁷ ?Mbe anu nariga nikarariye kutyo, nataratanyisye? ?Tere amwi jinu enikararira, enikararira okuru:ba ebyo mubiri, jibe kwanye ati, yee yee, na tere tere?

¹⁸ Nawe rwa kutyo Nyamuanga ni mwiikanyibwa, omusango gweswe kwimwe gutari ati, yee na tere.

¹⁹ Okuba Omwana wa Nyamuanga, niwe Yesu Kristo unu anye na Sirwano na Timoteo casimuye mwimwe, Oyo ariga atari ati, yee, na rindi ati, tere, nawe mu Oyo nimwo iyee iri.

²⁰ Okuba emirago jo:ne eja Nyamuanga jiri ati, Yee, mu Mwene, ka jiri ati, Amina, mu Mwene, korereki Nyamuanga akusibwe kurweswe.

²¹ Nawe unu kacirumya eswe aamwi nemwe mu Kristo niwe Nyamuanga unu aciteeko amafuta.

²² Niwe aciteeko ecibarikisyo, nariyana Omwoyo mu mitima jeswe rwe co kugwatirisya.

²³ Nawe anye enibirikira Nyamuanga abe wo kwima ku mwoyo gwani, ati, nicari ku:ja kwimwe, okuba nabafwiriye ecigongo.

²⁴ Tari ati, citungire okwikirisya kwemwe, nawe ciri banu abasakira okukonderwa kwemwe, okuba mwimereguyu mu kwikirisya kwemwe.