1 Batesalonika 3 - INDAGANO INYA:YA

Paulo rwa kutyo abarumirwe

¹ Kwocakorere nici:ganirisya ati, ni kwa kisi cisigwe mu Atene cenyere:ra, okuba cariga citacatura kwigumirisya,

² nicituma Timoteo, omwana wa:su na mukosi wa Nyamuanga mu Bigambo byo bwana ebya Kristo, abarumye no kubasi:ri:sya mu kwikirisya kwemwe.

³ Omu:nu wo:ne asige kuteratera kurwa jinya:ko ejo, okuba emwe abene mumenyere ati, ejo nijo catereyweo.

⁴ Okuba ni cimari anu cariga ciri kwimwe, cambire okubabwira ati, ecijo:kunya:sibwa. Na ka nikwo gabee, rwa kutyo mumenyere.

⁵ Nanye kwonakorere nintuma omu:nu, wejire naremo:tura okwigumirisya rindi, korereki nimenye okwikirisya kwemwe, amwi omusaki e:fura abasakire, no kunya:ka kweswe nikuba kwa kutyo era.

⁶ Nawe Timoteo woryanu akingire kwiswe okuso:ka kwimwe, nacibwira ebigambo byo bwana ebyo kwikirisya kwemwe no kwenda kwemwe, rwa kutyo omuci:cuka kisi siku jo:ne, nimukumbura okucirora, rweswe kutyo ecibakumbura.

⁷ Kwocakorere nicisi:ri:sibwa kurwemwe, ba:na ba:su, nicisi:ri:sibwa mu kunya:sibwa kweswe no bukene bweswe bwone, kurwo kwikirisya kwemwe.

⁸ Mbe eswe woryanu ciri baanga emwe muke:mereguru murumire mu Ratabugenyi.

⁹ ?Okuba ecitura okusi:ma Nyamuanga kutiki kurwemwe, kurwo kukonderwa kwone kunu ecikondera kurwemwe imbere ya Nyamuanga?

¹⁰ Nicisabwa muno mu mwisi na mu ngeta ati cibarore obusu bwemwe, nikumisye binu bigerukireko mu kwikirisya kwemwe.

¹¹ Nawe Nyamuanga Rata omwene, na Ratabugenyi Yesu acitangasye injira yo ku:ja kwimwe.

¹² Nawe Ratabugenyi ongesye no kufufya okwendana kwemwe, no kwenda kwemwe ku ba:nu bo:ne, rweswe kutyo ecibenda emwe,

¹³ korereki arumyega emitima jemwe mu bweru jitariko masoro imbere ya Rata Nyamuanga mu ku:ja kwa Ratabugenyi Yesu aamwi na be:ru bae bo:ne.