1 Bakorinto 1 - INDAGANO INYA:YA

Okuke:sya

¹ Anye Paulo, unu nabirikiywe okuba intumwa ya Yesu Kristo kurwo kwenda kwa Nyamuanga, aamwi na Sositene owa:su,

² Enandikira ikanisa ya Nyamuanga inu iri Korinto, ku banu be:si:bwe mu Yesu Kristo, banu babirikiywe babe be:ru, aamwi na bo:ne banu bari wo:ne wo:ne banu abasabwa risi:na rya Ratabugenyi Yesu Kristo, niwe Ratabugenyi ne:sebugenyi one.

³ Ecigongo cibe kwimwe no murembe binu ebiso:ka ku Rata Nyamuanga, na ku Ratabugenyi Yesu Kristo.

Okusi:ma

⁴ Enisi:ma Nyamuanga wani kusiku kurwemwe, kurwe cigongo ca Nyamuanga cinu mwayabirwe mu Yesu Kristo.

⁵ Okuba mu byone mwani:bi:ye mu Mwene, mu kwaika kwone na mu kusombo:kerwa kwone.

⁶ Rwa kutyo orusingiro rwa Kristo kutyo rwarumibwe mwimwe.

⁷ Nikwo kutyo mutagerukire mu mabando gome, nimurindirira okuswerurwa kwa Ratabugenyi Yesu Kristo.

⁸ Unu aribasimbagisya kukinga ku bute:ro, mutane:soro mu rusiku rwa Ratabugenyi Yesu Kristo.

⁹ Nyamuanga ni mwiikanyibwa, niwe ababirikiye emwe mwingire mu kusangira kwo Mwana wae niwe Yesu Kristo Ratabugenyi.

Okwaukana mu kanisa ya Korinto

¹⁰ Mbe enibe:remberesya, ba:na ba:su, kurwa risi:na rya Ratabugenyi Yesu Kristo, ati, bo:ne mwaikega gumwi no kwaukana kusigega kubao mwimwe, nawe mugwatanyibwega mu kwiganirisya kumwi na mu kurwaja kumwi.

¹¹ Okuba, ba:na ba:su, ebyewemwe nabwiriywe na ba mu nyumba ya Koloe ati, iriyo inyombo mwimwe.

¹² Ena:ika omusango gunu ati, mu:nu wo:ne mwimwe ka:ika ati, Anye ndi wa Paulo, Anye ndi wa Apolo, Anye ndi wa Kefa, Anye ndi wa Kristo.

¹³ ?Kristo a:ukenemo? ?Paulo abambirwe ku musaraba kurwemwe? ?Tere amwi mwabatijibwe mwisi:na rya Paulo?

¹⁴ Enisi:ma Nyamuanga okuba nicariga kubatija mu:nu wo:ne kwimwe, tari Kirisipo na Gayo,

¹⁵ Omu:nu wo:ne asigega kwaika ati, nabatijaga mwisima ryani.

¹⁶ Yene nabatijisye na ba inyumba ya Stefano. Mu bandi nitakwicuka araba nabatijisye mu:nu undi.

¹⁷ Okuba Kristo atantumire kubatija, nawe nisimure Ebigambo byo bwana ebyo mweruro, tari mu bwenge bwo kwaika, korereki omusaraba gwa Kristo gusigega kuba gwa kutyo era.

Omusango gwo musaraba

¹⁸ Okuba omusango gwo musaraba ni bumu:mu ku banu ababura, nawe ni managa ga Nyamuanga kwiswe banu ecikisibwaga.

¹⁹ Okuba byandikirwe ati, Ndisimagisya obwenge bwa benge:so, no bwite:ge:resya bwebwe banu abe:te:ge:resya ndibukora kuba kutyo era.

²⁰ ?Omwengeso abee a:ki? ?Omwandiki abee a:ki? ?Omubambasi wa riimbo rinu abee a:ki? ?Angu, Nyamuanga atafiriyasisye obwenge bwa i:si inu?

²¹ Okuba mu bwenge bwa Nyamuanga, i:si yejire yarema okumenya Nyamuanga kurwo bwenge bwayo, mbe nibimukondera Nyamuanga okuonya banu abe:kirisye mu njira yo bumu:mu bwo kusimura omusango.

²² Okuba Abayaudi abasabwa ebibarikisyo, na Bagiriki abayenja obwenge,

²³ nawe eswe ecisimura Kristo unu abambirwe ku musaraba, ku Bayaudi ni ci:ku:juro na ku Bagiriki ni bumu:mu,

²⁴ nawe ku banu ababirikirwa, nakabee bari Bayaudi, nakabee bari Bagiriki, Kristo niwe amanaga ga Nyamuanga no bwenge bwa Nyamuanga.

²⁵ Okuba obumu:mu bwa Nyamuanga bukirire obwenge bwa ba:nu, no burenga bwa Nyamuanga bukirire amanaga ga ba:nu.

Okwikuya kwa ba:nu ni kutyo era

²⁶ Okuba, ba:na ba:su, murore okubirikirwa kwemwe, ati, mu banu babirikiywe, abo bwenge bwo mubiri batari ba:fu, na ba managa batari ba:fu, na be cibaro batari ba:fu.

²⁷ Nawe Nyamuanga asorere ebimu:mu bya mu ca:ro, akorereki abaswasye abengeso. Ne birenga bya mu ca:ro Nyamuanga abisorere, akorereki aswasye ebya managa.

²⁸ Ne bitakataka bye ca:ro na binu bigairwe nibyo Nyamuanga asorere, yee ne bi:nu binu bitario, abisorere akorereki akore binu birio kuba kutyo era.

²⁹ Omu:nu wo:ne asigega kwikuya imbere ya Nyamuanga.

³⁰ Nawe ku Mwene emwe mwabwene okuba mu Kristo Yesu, unu Nyamuanga akorere okuba bwenge bweswe no burengeresi bweswe, no kwesibwa kweswe, no kucungurwa kweswe.

³¹ Rwa kutyo byandikirwe ati, Unu ke:kuya, e:kuisyega ku Ratabugenyi.