ruuya 5 - Ṯikiṯaḏiza Ṯiaŋ 1967

aza 5 Tirany teḏi Allah liza yuhanna kilerena

¹ nenyi izaci ki ṯii ṯeḏi mini ṯeḏi ŋgwa kwunanalu kwurzi la kweḏi ŋeleny, kiṯami kuluḏina iininy yi-na, na par ŋgi la tɔk, kari akṯima yaṯim yi dufɔkwɽeny.

² nenyeze maleyka kwete kwufirli teter kwofi-na ŋuma ŋi, kwaruŋw: eya kwiri kwofḏana eḏi kiti kiṯami, na eḏi kiici yaṯima ŋwuli ŋweŋen?

³ nuŋw ere kwere mac kilerena, ya ki ṯurmun-na, ya kureyu-na kuṯelu kweḏi ŋuma eḏi kiti kiṯami ya eḏece-na.

⁴ nenyi ari ŋwal ki beṯen kaka iti nanuŋw gwu kwere mac kweḏi ŋuma eḏi kiti kiṯami ya eḏece-na.

⁵ nuŋw eca nyuŋwu kwete kweḏi lijowiṯ ŋwu: eṯari mac. izaṯi, zundaŋ kweḏi gabiila keḏi yahuuḏ, kwumɔruḏa ṯufu eḏi dauḏŋa, kwumillazi ki, ŋwuṯa nuŋw eḏi ŋuma eḏi kiṯi kiṯami, na eḏi kii ŋwuli ŋweḏi yaṯim yir dufɔkwɽeny.

⁶ na ki ŋwobi-na ŋweḏi kwurzi-ŋa kwɔmne gi ŋgwa kwumiiḏu kwir kwaɽŋan, na ki lijowiṯ-na keligeny-na, nenyeze Tiranyu tirlu, tir kaka tirany tete timer eɽenye, teḏi ril dufɔkwɽeny na yey dufɔkwɽeny, yir rigɽim dufɔkwɽeny reḏi Allah, rimɔŋw zi uzi ṯurmun nana tatap.

⁷ nuŋw ele, nuŋw dimi kiṯami kinani ki ṯii ṯeḏi mini ṯeḏi ŋgwa kwunanalu kwurzi la.

⁸ mindaŋ muŋw dimi kiṯami, na kwɔmne kwumiiḏu kwir kwaɽŋan, na lijowiṯ lir ṯuɽi-kwaɽŋan iideci Tiranyu lu tuɽbuk lapa lumbəra, na nyaɽinyu nyir ḏahab nyurene kwuḏɽula-na dedep, nyir ṯara ki yiriny ṯeḏi lizi lirlinelu ter eḏi Kwruztu-na;

⁹ ner ketice ṯilŋa ṯiaŋ, ner aruŋw: a kwiri kwofḏana eḏi dimi kiṯami na eḏi kii ŋwuli ŋweḏi yaṯim yuŋwun, kaka mer ŋa gwu eɽenye, na ellici Allah lizigwunaŋi ŋin ŋi ŋɔŋa, leḏi yabiila yir-na ter ter, na kandiza kir-na ter ter, na lizi lir-na ter ter, na ŋeleny ŋir-na ter ter tɔk;

¹⁰ nezi ruzi ŋeleny na yiziiz yeḏi Allah weri, er miḏa ŋelenyi ki ṯurmun-na.

¹¹ mindaŋ nenyeze, nenyi neŋne rɔgwɽɔ reḏi limaleyka litezir lirikaḏi kwurzi lu, kwɔmne gi ŋgwa kwumiiḏu, na lijowiṯ li tɔk, na ŋwuɽu ŋweŋen uri beṯen ruɽi-ŋa ruɽi-ŋa riminni,

¹² laruŋw ṯɔgwɽɔ ṯi ṯupa: Tirany timer eɽenye tinderṯa tofḏana eḏafi zulṯa, na ŋurṯua, na ṯeḏinayeyna, na ŋuma, na ṯiniiya-na, na ŋiniṯi, na ṯortaḏa!

¹³ nenyi neŋne kwɔmne tatap kwumiiḏu kilerena, na kweḏi ṯurmun, na kweḏi kureyu-na kuṯelu, na kwunani ki rujul-na, na ŋgwa tatap kwunani gwu-na, kwaruŋw: eḏi ṯortaḏa, na ṯiniiya-na, na ŋiniṯ, na ŋuma tɔk nanniḏa dɔk dɔk, nanuŋw gwu ŋgwa kweṯi nanni kwurzi la kweḏi ŋeleny, na nani gwu Tirany tɔk.

¹⁴ na kwɔmne ŋgwa kwumiiḏu kwir kwaɽŋan, aruŋw: emba! na lijowiṯ lir ṯuɽi-kwaɽŋan iidicelu ner kwocelu.