Heberu 1 - Keapara Kalo

Palagu gena kila Natuna genana

¹ Kunenai, toma vogo e raupara gutumai Palagu na peroveta talimara geriana tenera evaikilarato.

² Na etoma ikarai, Natuna genana ema vaikilarato. Palagu na gaura maparara Natuna eveniato pene gaunara. E ia genana maki Palagu na kupa e tanopara ekalarato.

³ Ia Palagu kolemana e maekana iwavagina evega-matagairana, e ia Palagu gelegele vagina. Ia gena kila tiavuna na gau maparara egapi-tagorana. Ia matotauna na gera rakava guligi-vagira rauparana ekala-gitakauato mulinai, Palagu goloka iwavagi aloripanai evetanu-talito kupai.

Palagu Natuna kamu iwavagi, aneru maki evanagirato

⁴ Palagu na Natuna evetao-rageato, aneru evanagirato. Kwalana arana eveniato maki verage iwavagi, aneru arara evanagirato.

⁵ Kwalana Palagu na aneru ta ati evaikilaato, netiwato, “Goi au Natuku, toma au goi Tamamu ai paago.” Pa evetaina maki ati evaikilaato, netiwato, “Au ia Tamanai pana ago, e ia maki au Natuku ai pene ago.”

⁶ E Palagu na Natuna kunena tanoparai mapene vaimaia aonai pene kila, “Palagu gena aneru maparami na pio aliruputali-venia.”

⁷ Aneru evaikilarato aonai ekilato, “Palagu na gena aneru ekalarato agi vetaina, gena vetugunagi talimara kalova emolena vetaina.”

⁸ Na Natuna ekilagiana netina, “Palagu o, goi gemu vele rakina pene mia-vanagivanagi, gemu Basileia marorirorimuna na ovaiana.

⁹ Kala rorirori oririwarana, na kala rakavara ati oririwarana. Gaura pakurai, Palagu o, gemu Palagu na maki taukavamu vekarawarai goi evirigimuto, repamu ai riga epopoato, verere na evega-vonumuto.”

¹⁰ E maevaikilaato, netiwato, “Vele o, tovotovonai goi na tanopara okalaato, e kupa maki goi gimamu kalakalana.

¹¹ Ira pia aiki, na goi pono talu; maparara rapuga vetaira pia rakava.

¹² Goi na kouti vetaira pono ikura, rapuga vetaira kolemara pia irau, na goi kolemamu ati pene irau, e goi gemu maguli rigolora maki ati pia ika.”

¹³ Palagu na aneru ta maki ati evaikilaato, “Aloripaku ai onoma tanu, pene ago, goi gevetali-venimuna talimara goi gagemu panakaura gaunai pana tao-talira.”

¹⁴ Aneru maparara vetugunagi palaguramo, Palagu na etugurato raira vevega-maguli pia gapia talimara veakavara ularana.