ရ︀ေႃမ︀ 15 - Khamti Shan

ပ︀ိူꩫ︀်ႈမ︀ႆ︀ႛဢ︀ဝ်ႈပ︀ိဝ်ယ︀ႃꩬ︀ႃꩡ︀ႂ်ႈတ︀ႃႉ

¹ ၸ︀ူႛဢ︀ꩫ︀်ႈလ︀ွင︀်ႈယ︀ုမ︀်ယ︀မ︀်ႈၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ က︀ေၵ︀ိူင︀်ꩫ︀ႆ︀ႇၵ︀ဝ်ယ︀ႃႇ ၸ︀ူႛဢ︀ꩫ︀်ႈမ︀ဝ်က︀ေၵ︀ိူင︀်ꩫ︀ႆ︀ႇၵ︀ဝ်မ︀ႆ︀ႛ ꩭႂ်ႛပ︀ူဝ်းက︀ေၵ︀ိူင︀်က︀ႃꩫ︀ႆ︀ႇ ဝႃႈꩡ︀ွႆ︀ႈꩭႂ်ႛက︀ꩫ︀်ႈꩫ︀မ︀်။ ꩫ︀င︀်ဢ︀လ︀ၢင︀်းၸ︀ူႛꩡ︀ဝ်ႛꩫ︀က︀ꩫ︀်ႈꩫ︀ႆ︀ၢႈ ꩵ︀ႈဝႃႈꩭီတ︀်။

² ꩭဝ်းတ︀င︀်းမ︀ိူင︀်း ꩭႂ်ႛပ︀ူဝ်းၸ︀ူႛယ︀ုမ︀်ယ︀မ︀်ႈတ︀ၢင︀်က︀ူဝ်ႇꩫ︀ႆ︀ႇၵ︀ဝ် က︀ေၵ︀ိူင︀်မ︀ႃးꩫ︀ႆ︀ႇ ဢ︀က︀ိဝ်းၵ︀ဝ်မ︀ႆ︀ႛꩫ︀ူႈꩬ︀ီ ဢ︀လ︀ၢင︀်းၵ︀ဝ်မ︀ႆ︀ႛ ဝႃႈꩡ︀ွမ︀်းꩭႂ်ႛꩫ︀မ︀်။

³ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ꩡ︀ဝ်ႛၵ︀ရ︀ီတ︀်က︀ေႃႇ ꩫ︀င︀်က︀ျမ︀်းလ︀ိက︀်ႉမ︀ႆ︀ႛ “ဢ︀ꩫ︀်ႈၵ︀ိင︀်းတ︀ူဝ်ꩡ︀ဝ်ႛမ︀ႆ︀ႛ ပ︀ိူꩫ︀်ႈꩡ︀ူဝ်က︀ႃးꩫ︀ႆ︀ႇ က︀ဝ်ႈၵ︀ႃႛမ︀ႆ︀ႛထုက︀်ဢ︀ူ” ꩫ︀ꩬ︀ီဝႃႈဝႆ︀ႇꩫ︀က︀ꩫ︀်ႈ ဢ︀လ︀ၢင︀်းမ︀ꩫ︀်းၸ︀ူႛꩡ︀ဝ်ႛမ︀ႆ︀ႛ ꩵ︀ႈꩡ︀ွမ︀်းမ︀ႃး။

⁴ ဢ︀ꩫ︀်ႈက︀ႃႈꩡ︀ိုဝ်ႈက︀ျမ︀်းလ︀ိက︀်ႉမ︀ႆ︀ႛ တ︀ႅမ︀်ႛဝႆ︀ႇꩫ︀ႆ︀ႇၵ︀ဝ်ယ︀ႃႇ ဢ︀ꩫ︀်ႈꩡ︀ႃႇꩭၢင︀်းꩬ︀ွꩫ︀်ꩭဝ်းꩫ︀မ︀်။ ဢ︀မ︀ႂ်းယ︀ႃႇ ꩭႂ်ႛပ︀ူဝ်းꩭဝ်းလ︀ုက︀်ႉက︀ျမ︀်းလ︀ိက︀်ႉမ︀ႆ︀ႛ ꩭႅင︀်းဢ︀ꩫ︀်ႈꩬ︀ေးၵ︀ၢမ︀်ပ︀ီꩫ︀်ႈꩫ︀ၵ︀ႃ ဢ︀ꩫ︀်ႈပ︀ိူꩫ︀်ႈမ︀ႆ︀ႛ ꩬ︀ႂ်ꩭႅင︀်းꩭႂ်ႛပ︀ီꩫ︀်ႈꩫ︀ႆ︀ႇꩫ︀ႆ︀ႛꩬ︀ီ ဝꩫ︀်းဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛ တ︀ီပ︀ျႃးမ︀ူꩫ︀်ႈၸ︀ုင︀်းမ︀ႆ︀ႛ တ︀ႂ်းထႃႛပ︀ီꩫ︀်ႈꩫ︀ႆ︀ႇꩫ︀မ︀်။

⁵ ꩡ︀ဝ်ႛဢ︀ꩫ︀်ႈꩭဝ်းမ︀ႆ︀ႛ ꩡ︀ႂ်ႈဢ︀ဝ်ႈယ︀ၢဝ်းꩭႂ်ႛ ꩭႅင︀်းထႅမ︀်ဢ︀ဝ်ႈတ︀ီမ︀်ႈꩭႂ်ႛꩫ︀ႆ︀ႇ ꩭႂ်ႛပ︀ူဝ်းꩬ︀ူ ꩫ︀င︀်ꩡ︀ဝ်ႛယ︀ေꩬ︀ုၵ︀ရ︀ီတ︀်ꩫ︀က︀ꩫ︀်ႈပ︀ီꩫ︀်ႈꩬ︀ီ ꩫ︀ႂ်းꩬ︀ူမ︀ႆ︀ႛၸ︀ွမ︀်ႇလ︀ွမ︀်ႈက︀ꩫ︀်ႈꩫ︀ႆ︀ႇ ꩬ︀ူမ︀ႆ︀ႛꩭႂ်ႛꩡ︀ွႆ︀ႈꩭႂ်ႛက︀တ︀ႃႉ။

⁶ င︀ႆ︀းꩬ︀ီ ꩬ︀ူတ︀င︀်းမ︀ိူင︀်း ပ︀ီꩫ︀်ႈꩡ︀ႂ်ႈလ︀ိဝ်ႈၵ︀ူဝ်းလ︀ိဝ်ႈꩬ︀ီ ၸ︀ြႃးပ︀ီꩫ︀်ႈꩡ︀ဝ်ႛၸ︀ူႛပ︀ီꩫ︀်ႈꩡ︀ဝ်ႛၸ︀ြႃးꩫ︀ၵ︀ႃ ပ︀ူဝ်ꩡ︀ဝ်ႛယ︀ေꩬ︀ုၵ︀ရ︀ီတ︀်မ︀ႆ︀ႛ ꩭႂ်ႛယ︀ူဝ်းယ︀ွင︀်ႛက︀ꩫ︀်ႈက︀တ︀ႃႉ။

ၵ︀ၢဝ်ႈၵ︀ၢမ︀်းꩫ︀ီႈꩡ︀ႃႇဢ︀ꩫ︀်ႈက︀ျူးမ︀ဝ်ꩡ︀ႂ်ႈ

⁷ ꩭႂ်ႛပ︀ူဝ်းမ︀ူꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛ ꩭိူဝ်ႈꩭိုင︀်းပ︀ိုင︀်းꩬ︀ႂ်ꩫ︀ႆ︀ႇ ꩫ︀င︀်ꩬ︀ူမ︀ႆ︀ႛ ꩡ︀ဝ်ႛယ︀ေꩬ︀ုၵ︀ရ︀ီတ︀်ꩭၢပ︀်ႉဢ︀ဝ်ႈꩫ︀က︀ꩫ︀်ႈ ꩬ︀ူက︀ူဝ်ႇလ︀ိူင︀်ႈꩫ︀ႆ︀ႇက︀ူဝ်ႇလ︀ိူင︀်ႈ ꩭုမ︀်ꩰꩡ︀ူမ︀်းꩰꩬ︀ီꩭၢပ︀်ႉက︀ꩫ︀်ႈတ︀ႃႉ။

⁸ က︀ဝ်ႈဝႃႈက︀ွတ︀်။ ꩡ︀ဝ်ႛၵ︀ရ︀ီတ︀် ꩭီတ︀်ၸ︀ူႛꩡ︀ႂ်ႇက︀ျူးꩫ︀ႆ︀ႇၵ︀ဝ်ꩬ︀ီ က︀ျွႃးမ︀ႃးယ︀ဝ်ႇ။ ဢ︀ꩫ︀်ႈꩫ︀ႆ︀ႇယ︀ႃႇ က︀တ︀ိၸ︀ြႃးပ︀ီꩫ︀်ႈꩡ︀ဝ်ႛ ဢ︀ꩫ︀်ႈပ︀ူလ︀ီꩫ︀်က︀ျူးꩫ︀ႆ︀ႇၵ︀ဝ်မ︀ႆ︀ႛ ꩭႂ်ႛမ︀ႃးꩫ︀ႆ︀ႇ ꩭႂ်ႛပ︀ူဝ်းပ︀ီꩫ︀်ႈမ︀ႃးꩫ︀ႆ︀ႇꩫ︀မ︀်။

⁹ မ︀ꩫ︀်းꩡ︀ဝ်ႛꩭီတ︀်င︀ႆ︀းꩫ︀ႆ︀ႇယ︀ႃႇ ꩫ︀င︀်က︀ျမ︀်းလ︀ိက︀်ႉမ︀ႆ︀ႛ “င︀ႆ︀းꩫ︀ႆ︀ႇꩬ︀ီ ၸ︀ြႃးပ︀ီꩫ︀်ႈꩡ︀ဝ်မ︀ႆ︀ႛ ꩫ︀ႂ်းဢ︀ꩫ︀်ႈက︀ျူးမ︀ဝ်ꩡ︀ႂ်ႈꩫ︀ႆ︀ႇၵ︀ဝ်မ︀ႆ︀ႛ က︀ဝ်ႈတ︀ီယ︀ူဝ်းယ︀ွင︀်ႛꩫ︀မ︀်။ ဢ︀ဝ်ႈၵ︀ၢမ︀်းဢ︀ွေꩬ︀ီ တ︀ီယ︀ူဝ်းယ︀ွင︀်ႛꩫ︀မ︀်” ꩫ︀ꩬ︀ီဝႃႈꩫ︀ႆ︀ႇꩫ︀က︀ꩫ︀်ႈ လ︀ႆ︀ၢးပ︀ိူဝ်ႈမ︀ꩫ︀်းꩡ︀ဝ်ႛဢ︀ီꩫ︀ူႈꩫ︀ႆ︀ႇꩬ︀ီ ꩭႂ်ႛပ︀ူဝ်းဢ︀ꩫ︀်ႈက︀ျူးမ︀ဝ်ꩡ︀ႂ်ႈꩫ︀ႆ︀ႇၵ︀ဝ်တ︀မ︀ိူင︀်း ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛယ︀ူဝ်းယ︀ွင︀်ႛက︀ꩫ︀်ႈꩫ︀ႆ︀ႇꩫ︀မ︀်။

¹⁰ ꩡ︀ႃႇလ︀ိူင︀်ႈ က︀ျမ︀်းလ︀ိက︀်ႉမ︀ႆ︀ႛ “ဢ︀ꩫ︀်ႈက︀ျူးမ︀ဝ်ꩡ︀ႂ်ႈၵ︀ဝ်ꩴ︀း တ︀င︀်းက︀ူꩫ︀်းၸ︀ြႃးပ︀ီꩫ︀်ႈꩡ︀ဝ်ႛၵ︀ဝ် ꩭုမ︀်ꩡ︀ူမ︀်းက︀ꩫ︀်ႈတ︀ႃႉ” ꩫ︀က︀ေႃႇဝႃႈဝႆ︀ႇဢ︀ူ။

¹¹ ၵ︀ိုꩫ︀်းꩫ︀က︀ဝ် “ဢ︀ꩫ︀်ႈက︀ျူးမ︀ဝ်ꩡ︀ႂ်ႈၵ︀ဝ်ꩴ︀း ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ယ︀ူဝ်းယ︀ွင︀်ႛက︀ꩫ︀်ႈတ︀ႃႉ။ က︀ူꩫ︀်းတ︀င︀်းမ︀ိူင︀်းၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ဢ︀ၢꩫ︀်တ︀ၢꩫ︀်ယ︀ူဝ်းယ︀ွင︀်ႛက︀ꩫ︀်ႈတ︀ႃႉ” ꩫ︀က︀ေႃႇဝႃႈဝႆ︀ႇဢ︀ူ။

¹² ပ︀ရ︀ေႃးၸ︀ႅတ︀်ႉꩭေꩬ︀ႃယ︀က︀ေႃႇ “လ︀ုက︀်ႉလ︀ၢꩫ︀်ယ︀ေꩬ︀ႄးက︀ူဝ်ႇလ︀ိူင︀်ႈ တ︀ီပ︀ူဝ်မ︀ႃးꩫ︀မ︀်။ မ︀ꩫ︀်းယ︀ႃႇ ဢ︀ꩫ︀်ႈက︀ျူးမ︀ဝ်ꩡ︀ႂ်ႈꩫ︀ႆ︀ႇၵ︀ဝ်မ︀ႆ︀ႛ ဢ︀ုပ︀်ႉပ︀ိုင︀်ꩬ︀ီ ၵ︀ဝ်က︀ေႃႇမ︀ꩫ︀်းꩡ︀ဝ်ႛမ︀ႆ︀ႛဢ︀က︀မ︀်ꩬ︀ီ တ︀ီတ︀ႂ်းထႃႛက︀ꩫ︀်ႈꩫ︀မ︀်” ꩫ︀ဝꩫ︀်ႇ။

¹³ ꩬ︀ူၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ယ︀ုမ︀်ယ︀မ︀်ႈꩫ︀ႆ︀ႇꩬ︀ီ မ︀ꩫ︀်းꩡ︀ဝ်ႛ ꩡ︀ဝ်ႛဢ︀ꩫ︀်ႈꩬ︀ူမ︀ႆ︀ႛ လ︀ွင︀်ႈတ︀ႂ်းထႃႛဢ︀ဝ်ႈယ︀င︀်းꩭႂ်ႛꩫ︀ႆ︀ႇ ꩬ︀ူမ︀ႆ︀ႛꩭႂ်ႛဢ︀ဝ်ႈꩡ︀ူမ︀်းꩭုမ︀် က︀တ︀်ယ︀ီꩫ︀်ႈၵ︀ျမ︀်းꩬ︀ႃတ︀ီမ︀်ႈꩰက︀ႃတ︀ႃႉꩫ︀ꩬ︀ီ က︀ဝ်ႈယ︀ွꩫ︀်းꩬ︀ူးဢ︀ူ။ င︀ႆ︀းက︀ီး ဢ︀ꩫ︀်ꩬ︀ူတ︀ႂ်းထႃႛꩫ︀ႆ︀ႇ ဢ︀ဝ်ႈတ︀ꩫ︀်းၵ︀ူဝ်းၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛ တ︀ီမ︀်ႈမ︀ႃးဢ︀ူ။

လ︀ွင︀်ႈဢ︀ꩫ︀်ႈပ︀ေႃလ︀ု တ︀ႅမ︀်ႛꩡ︀ုꩫ︀်ႈꩰလ︀ႅင︀်းꩰ

¹⁴ ပ︀ီႈꩫ︀ွင︀်ႇၵ︀ဝ်ꩴ︀း ꩬ︀ူꩫ︀ီႈလ︀ူင︀်ꩫ︀မ︀်။ ꩬ︀ူယ︀ႃႇ လ︀ွင︀်ႈဢ︀ꩫ︀်ႈꩬ︀ူထုက︀်ꩭီတ︀်ꩫ︀ႆ︀ႇၵ︀ဝ်တ︀င︀်းမ︀ိူင︀်းတ︀ွင︀်းꩬ︀ီ ပ︀ိူꩫ︀်ႈမ︀ႆ︀ႛက︀ေႃႇ ꩬ︀ွꩫ︀်ꩭႂ်ႛပ︀ီꩫ︀်ႈဢ︀ူꩫ︀ꩫ︀ႆ︀ႇ က︀ဝ်ႈတ︀မ︀်းꩡ︀ႂ်ႈဢ︀ူ။

^15-16 လ︀ွင︀်ႈဢ︀ꩫ︀်ႈက︀ဝ်ႈမ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛ က︀ျေးꩡ︀ူးပ︀ူင︀်ႈꩭႂ်ႛꩬ︀ီ ဢ︀ꩫ︀်ႈက︀ျူးမ︀ဝ်ꩡ︀ႂ်ႈꩫ︀ႆ︀ႇၵ︀ဝ်မ︀ႆ︀ႛ က︀ဝ်ႈꩫ︀င︀် ယ︀ီတ︀်ႉပ︀ရ︀ေႃးꩭိက︀်ႉ​ꩫ︀က︀ꩫ︀်ႈၵ︀ၢဝ်ႈၵ︀ၢမ︀်းꩫ︀ီႈလ︀ွင︀်ႈꩡ︀ဝ်ႛယ︀ေꩬ︀ုၵ︀ရ︀ီတ︀် ꩭူဝ်းမ︀ႃးꩫ︀ႆ︀ႇ ꩬ︀ူမ︀ႆ︀ႛတ︀ႅမ︀်ႛꩡ︀ုꩫ︀်ႈꩰမ︀ႃးယ︀ဝ်ႇ။ ဢ︀ꩫ︀်ႈက︀ျူးမ︀ဝ်ꩡ︀ႂ်ႈꩫ︀ႆ︀ႇၵ︀ဝ်မ︀ႆ︀ႛ ၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛ ဢ︀ဝ်ႈမ︀ူတ︀်ꩡ︀ၢင︀်ꩭႂ်ႛꩫ︀ႆ︀ႇꩬ︀ီ ၵ︀ဝ်ယ︀ႃႇ ꩫ︀င︀်ၵ︀ိူင︀်ႈလ︀ူဢ︀ꩫ︀်ႈ ၸ︀ြႃးပ︀ီꩫ︀်ႈꩡ︀ဝ်ႛꩭၢပ︀်ႉꩫ︀ႆ︀ႇꩫ︀က︀ꩫ︀်ႈꩫ︀မ︀်။

¹⁷ က︀ွပ︀်ႉပ︀ိူဝ်ႈက︀ဝ်ႈ ဢ︀ူꩫ︀ႂ်းꩡ︀ဝ်ႛယ︀ေꩬ︀ုꩫ︀ႆ︀ႇꩬ︀ီ က︀ဝ်ႈꩭီတ︀်ဢ︀မ︀ူးၸ︀ြႃးပ︀ီꩫ︀်ႈꩡ︀ဝ်ႛꩫ︀ႆ︀ႇ ပ︀ေႇꩡ︀ူမ︀်းꩭုမ︀်ယ︀ႂ်လ︀ူင︀်ꩫ︀မ︀်။

¹⁸ က︀ဝ်ႈယ︀ႃႇ ဢ︀ꩫ︀်ႈက︀ျူးမ︀ဝ်ꩡ︀ႂ်ႈꩫ︀ႆ︀ႇၵ︀ဝ် ꩭႂ်ႛပ︀ူဝ်းၵ︀ၢဝ်ႈၵ︀ၢမ︀်းၸ︀ြႃးပ︀ီꩫ︀်ႈꩡ︀ဝ်ႛထွမ︀်မ︀ႃးꩫ︀ႆ︀ႇ ဢ︀ꩫ︀်ႈက︀ဝ်ႈမ︀ႆ︀ႛ ꩡ︀ဝ်ႛယ︀ေꩬ︀ုၵ︀ရ︀ီတ︀်တ︀ိုဝ်းꩬ︀ီ ꩭႂ်ႛဝႃႈ၊ ꩭႂ်ႛꩭီတ︀်ꩫ︀ႆ︀ႇၵ︀ဝ်ꩫ︀ႆ︀ၢႈꩫ︀မ︀် က︀ဝ်ႈꩭတ︀်ꩰꩭၢꩫ︀်ꩰဝႃႈပ︀ီꩫ︀်ႈꩫ︀ႆ︀ႇ။

¹⁹ မ︀ꩫ︀်းꩡ︀ဝ်ႛက︀ဝ်ႈမ︀ႆ︀ႛတ︀ိုဝ်းꩬ︀ီ ၵ︀ၢဝ်ႈၵ︀ၢမ︀်းꩭႂ်ႛꩭူဝ်းမ︀ႃးင︀ႆ︀းꩬ︀ီ ဢ︀ဝ်ႈတ︀ꩫ︀်းၵ︀ူဝ်းၵ︀ွꩫ︀်မ︀ꩫ︀်းꩡ︀ဝ်ႛ လ︀ႆ︀ၢးꩫ︀ိမ︀ိက︀်ႉဢ︀ꩫ︀်ႈလ︀ၢက︀်ဢ︀ꩫ︀်ႈလ︀ႆ︀ၢးꩫ︀ႆ︀ႇၵ︀ဝ် ဢ︀ꩫ︀်ႈၵ︀ိူင︀်ႈꩫ︀ီႈဢ︀ၢမ︀်းꩫ︀ႆ︀ႇၵ︀ဝ် ꩭႂ်ႛꩭီတ︀်မ︀ႃးယ︀ဝ်ႇ။ င︀ႆ︀းꩫ︀ႆ︀ႇꩬ︀ီ လ︀ုက︀်ႉဝီင︀်းယ︀ေရ︀ုꩬ︀လ︀ိမ︀်မ︀ႆ︀ႛ ဢ︀ဝ်ႈထိုင︀်ꩡ︀ေႈဝီင︀်းဢ︀ိလ︀ုရ︀ိ တ︀ီႈဢ︀ꩫ︀်ႈꩫ︀င︀်က︀ဝ်ႈထိုင︀်က︀ႃမ︀ႆ︀ႛ ၵ︀ၢဝ်ႈၵ︀ၢမ︀်းꩫ︀ီႈလ︀ွင︀်ႈꩡ︀ဝ်ႛယ︀ေꩬ︀ုၵ︀ရ︀ီတ︀် တ︀ႅဝ်မ︀ူတ︀်ꩰမ︀ႃးယ︀ဝ်ႇ။

²⁰ က︀ဝ်ႈယ︀ႃႇ လ︀ုက︀်ႉဢ︀မ︀ူးဢ︀ꩫ︀်ႈပ︀ိူꩫ︀်ႈက︀ူဝ်ဝႆ︀ႇမ︀ႆ︀ႛ ပ︀ိတ︀်က︀ိꩫ︀်ႈꩫ︀က︀ꩫ︀်ႈ ꩭႂ်ႛပ︀ူဝ်းမ︀ဝ်ပ︀ီꩫ︀်ႈꩫ︀ႆ︀ႇ တ︀ီႈဢ︀ꩫ︀်ႈၵ︀ၢဝ်ႈၵ︀ၢမ︀်းꩫ︀ီႈလ︀ွင︀်ႈꩡ︀ဝ်ႛယ︀ေꩬ︀ုၵ︀ရ︀ီတ︀် မ︀ဝ်ပ︀ႆ︀ꩫ︀ႆ︀ႛꩥ︀ိꩫ︀်းꩫ︀ႆ︀ႇၵ︀ဝ်မ︀ႆ︀ႛꩫ︀ႆ︀ၢႈꩬ︀ိုင︀် က︀ႃꩭူဝ်းၵ︀ၢဝ်ႈၵ︀ၢမ︀်းꩫ︀ီႈက︀ွတ︀်ꩫ︀ꩬ︀ီ မ︀ိူဝ်ႈလ︀ႂ်ႈမ︀ိူဝ်ႈလ︀ႂ်ႈက︀ေႃႇ ꩫ︀တ︀်ꩡ︀ႂ်ႈဝႆ︀ႇꩫ︀မ︀်။

²¹ ꩫ︀င︀်က︀ျမ︀်းလ︀ိက︀်ႉမ︀ႆ︀ႛ “ၵ︀ဝ်မ︀ႆ︀ႛ လ︀ွင︀်ႈမ︀ꩫ︀်းꩡ︀ဝ်ႛ ၸ︀ႂ်မ︀ဝ်ၵ︀ႆ︀ႈꩫ︀က︀ေႃႇၵ︀ဝ်တ︀ီꩫ︀ႆ︀ႛꩥ︀ိꩫ︀်းက︀ꩫ︀်ႈꩫ︀မ︀်။ ၵ︀ဝ်မ︀ဝ်ꩭွꩫ︀်ꩭꩫ︀်ꩫ︀က︀ေႃႇ တ︀ီပ︀ွင︀်ꩡ︀ႂ်ႈက︀ꩫ︀်ႈꩫ︀မ︀်” ꩫ︀ꩬ︀ီ ဝႃႈဝႆ︀ႇꩫ︀က︀ꩫ︀်ႈꩫ︀မ︀်။

လ︀ွင︀်ႈပ︀ေႃလ︀ုꩬ︀ၢင︀်က︀ႃဝီင︀်းရ︀ေႃမ︀

²² င︀ႆ︀းꩫ︀ႆ︀ႇꩬ︀ီ ꩭႂ်ႛပ︀ူဝ်းက︀ဝ်ႈ ꩬ︀ူမ︀ႆ︀ႛမ︀ဝ်ꩫ︀ႆ︀ႛမ︀ႃးꩫ︀ႆ︀ႇ က︀ဝ်ႈမ︀ႆ︀ႛက︀ီလ︀ႆ︀ၢပ︀ၢꩫ︀်ႈꩭေႇက︀င︀်ႛဝႆ︀ႇꩬ︀ီ က︀ဝ်ႈမ︀ဝ်ꩫ︀ႆ︀ႛမ︀ႃးꩫ︀မ︀်။

^23-24 ꩫ︀ႆ︀ႇꩫ︀က︀ေႃႇ င︀ႆ︀ႚယ︀ႃႇ တ︀ူင︀်ႈတ︀ၢင︀်ႇꩫ︀ႆ︀ႇမ︀ႆ︀ႛ ဢ︀မ︀ူးဢ︀ꩫ︀်ႈက︀ဝ်ႈဝႃႈꩭီတ︀်ꩫ︀ႆ︀ႇယ︀ဝ်ႇꩰ။ ꩫ︀င︀်က︀ဝ်ႈꩬ︀ူမ︀ႆ︀ႛမ︀ႃးက︀ွတ︀်ꩫ︀ꩬ︀ီ က︀ီလ︀ႆ︀ၢပ︀ီႈထႃႛမ︀ႃးꩫ︀က︀ꩫ︀်ႈ င︀ႆ︀ႚယ︀ႃႇ မ︀ႃးပ︀ီꩫ︀်ႈက︀ႃꩵ︀ထၢင︀်ႇ။ က︀ဝ်ႈက︀ႃꩡ︀ႃႉက︀ႃမ︀ိူင︀်းꩡ︀ပ︀ိꩫ︀်ꩫ︀ႆ︀ႇ ꩬ︀ူမ︀ႆ︀ႛၵ︀ႂ်ႈမ︀ႃးꩭꩫ︀်ဢ︀ူ။ တ︀င︀်းꩬ︀ူက︀ိုမ︀်ႇလ︀ိူင︀်ႈဢ︀ူꩬ︀ီၵ︀ဝ်ႛၵ︀ွꩫ︀်က︀ꩫ︀်ႈယ︀ဝ်ႇꩬ︀ီ က︀ဝ်ႈက︀ႃမ︀ိူင︀်းꩡ︀ပ︀ိꩫ︀်က︀ီး ꩬ︀ူမ︀ႆ︀ႛၵ︀ႂ်ႈꩭႂ်ႛꩬ︀ူင︀်ꩡ︀ွႆ︀ႈဢ︀ူ။

²⁵ င︀ႆ︀ႚယ︀ႃႇ ꩭိုဝ်လ︀ိုဝ်ꩫ︀က︀ေႃႇ က︀ဝ်ႈဝီင︀်းယ︀ေရ︀ုꩬ︀လ︀ိမ︀်မ︀ႆ︀ႛက︀ႃꩬ︀ီ က︀ူꩫ︀်းꩡ︀ိူဝ်းꩫ︀ႆ︀ႇၵ︀ဝ်မ︀ႆ︀ႛ ဢ︀မ︀ူးၵ︀ဝ်မ︀ႆ︀ႛ ဝႃႈက︀ႃꩡ︀ွႆ︀ႈꩫ︀မ︀်။

²⁶ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ꩡ︀ိူဝ်းꩡ︀ေႈဝီင︀်းမ︀ႃက︀ေတ︀ေႃꩫ︀ိꩫ︀ၵ︀ႃ ꩡ︀ိူဝ်းမ︀ိူင︀်းဢ︀ႃၵ︀ႃယ︀ၵ︀ဝ်ယ︀ႃႇ က︀ူꩫ︀်းꩡ︀ိူဝ်းဝီင︀်းယ︀ေရ︀ုꩬ︀လ︀ိမ︀် ဢ︀ꩫ︀်ႈယ︀ၢက︀်ႉၸ︀ၢꩫ︀်ꩫ︀ႆ︀ႇၵ︀ဝ်မ︀ႆ︀ႛ ဢ︀ဝ်ႈင︀ိူꩫ︀်းꩡ︀ွႆ︀ႈက︀ွတ︀်ꩫ︀ꩬ︀ီ ၵ︀ွင︀်းꩰလ︀ွင︀်းꩰတ︀ႅပ︀်တ︀တ︀်က︀ꩫ︀်ႈယ︀ဝ်ႇ။

²⁷ ၵ︀ဝ်မ︀ႆ︀ႛꩡ︀ေတ︀ꩫ︀ႃယ︀င︀်းꩫ︀က︀ꩫ︀်ႈ ꩫ︀ႃႛတ︀ီႈဢ︀ꩫ︀်ႈဝႃႈꩡ︀ွႆ︀ႈက︀ျူးꩫ︀ႆ︀ႇၵ︀ဝ်က︀ေႃႇ ယ︀င︀်းတ︀ေႇတ︀ေႇဢ︀ူ။ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး က︀ျူးꩫ︀ႆ︀ႇၵ︀ဝ်ယ︀ႃႇ ဢ︀ꩫ︀်ႈက︀ျူးမ︀ဝ်ꩡ︀ႂ်ႈꩫ︀ႆ︀ႇၵ︀ဝ်မ︀ႆ︀ႛ ဢ︀က︀ိဝ်းလ︀ွင︀်ႈၵ︀ွꩫ︀်ပ︀ꩫ︀်ႈꩭႂ်ႛꩫ︀ႆ︀ႇꩬ︀ီ ဢ︀ꩫ︀်ႈက︀ျူးမ︀ဝ်ꩡ︀ႂ်ႈꩫ︀ႆ︀ႇၵ︀ဝ်က︀ေႃႇ က︀ျူးꩫ︀ႆ︀ႇၵ︀ဝ်မ︀ႆ︀ႛ လ︀ွင︀်ႈက︀ိꩫ︀်ႈလ︀ွင︀်ႈꩫ︀ုင︀်ႈ ထုက︀်ꩫ︀ီႈꩡ︀ွႆ︀ႈꩭႂ်ႛꩫ︀မ︀်။

²⁸ င︀ိူꩫ︀်းꩡ︀ွႆ︀ႈဢ︀ꩫ︀်ႈꩡ︀ႃႇၵ︀ဝ်ꩫ︀ꩬ︀ီ က︀ီပ︀်ယ︀ုင︀်းဝႆ︀ႇꩫ︀ႆ︀ႇတ︀င︀်းမ︀ိူင︀်း ꩫ︀ႂ်းမ︀ိုဝ်းၵ︀ဝ်မ︀ႆ︀ႛ ဢ︀ၢပ︀်ႉယ︀ဝ်ႇꩬ︀ီ ဢ︀မ︀ူးက︀ဝ်ႈယ︀ဝ်ႇက︀ီး က︀ဝ်ႈက︀ႃꩡ︀ႃႉက︀ႃမ︀ိူင︀်းꩡ︀ပ︀ိꩫ︀်ꩫ︀ႆ︀ႇ ꩬ︀ူမ︀ႆ︀ႛက︀ေႃႇတ︀ီၵ︀ဝ်ႛမ︀ႃးꩫ︀မ︀်။

²⁹ မ︀ိူဝ်ႈက︀ဝ်ႈꩬ︀ူမ︀ႆ︀ႛမ︀ႃးꩫ︀ႆ︀ႇ လ︀ုက︀်ႉꩡ︀ဝ်ႛၵ︀ရ︀ီတ︀်မ︀ႆ︀ႛ မ︀ၢင︀်က︀လ︀ႃဢ︀ဝ်ႈတ︀ီမ︀်ႈꩰက︀ုမ︀်ꩰꩬ︀ီ တ︀ီမ︀ႃးꩫ︀မ︀်ꩫ︀ꩫ︀ႆ︀ႇ က︀ဝ်ႈတ︀ွင︀်းဢ︀ူ။

³⁰ ပ︀ီႈꩫ︀ွင︀်ႇၵ︀ဝ်ꩴ︀း ဢ︀ဝ်ႈတ︀ၢင︀်းꩡ︀ဝ်ႛယ︀ေꩬ︀ုၵ︀ရ︀ီတ︀်တ︀မ︀ိူင︀်း ဢ︀ဝ်ႈမ︀ႅတ︀်ႉတ︀ႃဢ︀ꩫ︀်ႈၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛꩭႂ်ႛꩫ︀ႆ︀ႇတ︀မ︀ိူင︀်း ဢ︀ꩫ︀်ႈက︀ဝ်ႈယ︀ပ︀်ယ︀ၢက︀်ႉမ︀ႆ︀ႛ ယ︀ွꩫ︀်းꩬ︀ူးꩭႂ်ႛမ︀ႃးတ︀ႃႉꩫ︀ꩬ︀ီ တ︀င︀်းꩡ︀ႂ်ႈတ︀င︀်းၵ︀ူဝ်း ဝွꩫ︀်းၵ︀ႅꩫ︀်းဢ︀ူ။

³¹ ꩭႂ်ႛပ︀ူဝ်းက︀ဝ်ႈ လ︀ုက︀်ႉၸ︀ေးက︀ူꩫ︀်းတ︀ိူင︀်းယ︀ုတ︀ ဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛမ︀ဝ်ယ︀ုမ︀်ယ︀မ︀်ႈꩫ︀ႆ︀ႇၵ︀ဝ်မ︀ႆ︀ႛလ︀ွတ︀်ႉꩫ︀ႆ︀ႇလ︀ိူင︀်ႈ၊ ဢ︀မ︀ူးဢ︀ꩫ︀်ႈက︀ဝ်ႈꩡ︀ွႆ︀ႈမ︀ႆ︀ႛ ꩭႂ်ႛပ︀ူဝ်းက︀ူꩫ︀်းꩡ︀ိူဝ်းဝီင︀်းယ︀ေရ︀ုꩬ︀လ︀ိမ︀်ၵ︀ဝ် ꩭုမ︀်ꩰꩡ︀ူမ︀်းꩰꩬ︀ီ ꩭၢပ︀်ႉတ︀ွꩫ︀်ႛꩫ︀ႆ︀ႇလ︀ိူင︀်ႈ ယ︀ွꩫ︀်းꩬ︀ူးꩭႂ်ႛမ︀ႃးတ︀ႃႉ။

³² င︀ႆ︀းꩬ︀ီ ꩬ︀င︀်ဝႃႈၸ︀ြႃးပ︀ီꩫ︀်ႈꩡ︀ဝ်ႛ ဢ︀လ︀ၢင︀်းယ︀င︀်းက︀ီး က︀ဝ်ႈꩬ︀ူမ︀ႆ︀ႛꩭုမ︀်ꩰꩡ︀ူမ︀်းꩰထိုင︀်မ︀ႃးꩬ︀ီ တ︀င︀်းꩬ︀ူပ︀ိဝ်ꩰမ︀ူꩫ︀်းꩰ တ︀ီꩫ︀ႆ︀ႛꩭွမ︀်ꩫ︀ွေꩫ︀မ︀်။

³³ ၸ︀ြႃးပ︀ီꩫ︀်ႈꩡ︀ဝ်ႛ ဢ︀ꩫ︀်ႈꩭဝ်းမ︀ႆ︀ႛ ဢ︀ဝ်ႈက︀တ︀်ယ︀ီꩫ︀်ႈၵ︀ျမ︀်းꩬ︀ႃꩭႂ်ႛꩫ︀ႆ︀ႇ တ︀င︀်းꩬ︀ူတ︀င︀်းမ︀ိူင︀်း ꩭႂ်ႛၵ︀ိင︀်းလ︀ွေႛက︀ႃတ︀ႃႉ။ ꩬ︀ႃႈထု။