ၿျႃၻိက︀်ႉ 21 - Khamti Shanက︀ၢင︀်ႈꩭၢဝ်မ︀ႂ်ꩫ︀ၵ︀ႃလ︀င︀်ꩫ︀ိꩫ︀်ႈမ︀ႂ် 1 ဝႆ︀ၢးꩫ︀ႆ︀ႇ က︀ၢင︀်ႈꩭၢဝ်မ︀ႂ်ꩫ︀ၵ︀ႃ လ︀ိင︀်ꩫ︀ိꩫ︀်ႈမ︀ႂ်မ︀ႆ︀ႛ က︀ဝ်ႈꩭꩫ︀်ဢ︀ူ။ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး က︀ၢင︀်ႈꩭၢဝ်က︀ဝ်ꩫ︀ၵ︀ႃ လ︀င︀်ꩫ︀ိꩫ︀်ႈက︀ဝ်ယ︀ႃႇ ꩭႆ︀ၢꩫ︀ႆ︀ၢႈက︀ႃယ︀ဝ်ႇ။ ꩫ︀မ︀်ႇꩬ︀မ︀်မ︀ုက︀်ႉတ︀ြႃက︀ေႃႇ ꩵ︀ႈယ︀င︀်းယ︀ဝ်ႇ။ 2 ꩫ︀ႆ︀ႇမ︀ႆ︀ႛ ဝီင︀်းလ︀ူင︀်ဢ︀ꩫ︀်ႈမ︀ူတ︀်ꩡ︀ၢင︀် ဝီင︀်းယ︀ေရ︀ုꩬ︀လ︀ိမ︀်မ︀ႂ်ꩫ︀ႆ︀ႇ ꩫ︀င︀်ၸ︀ူႛꩬ︀ၢဝ်မ︀ႂ် ဢ︀ꩫ︀်ႈꩡ︀ႃႇၸ︀ူႛမ︀ၢဝ်မ︀ႂ် ꩭၢင︀်ႛၵ︀ိူင︀်ႈဝႆ︀ႇꩫ︀က︀ꩫ︀်ႈ လ︀ုက︀်ႉက︀ၢင︀်ႈꩭၢဝ် တ︀ီႈဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛၵ︀ိင︀်းမ︀ႆ︀ႛ လ︀ူင︀်းမ︀ႃးꩫ︀ႆ︀ႇမ︀ႆ︀ႛ က︀ဝ်ႈꩭꩫ︀်ဢ︀ူ။ 3 လ︀ုက︀်ႉပ︀လ︀ၢင︀်မ︀ႆ︀ႛ ꩬ︀ီင︀်လ︀ူင︀်တ︀ၢꩫ︀်ႛမ︀ႃးꩫ︀ႆ︀ႇမ︀ႆ︀ႛ က︀ဝ်ႈꩫ︀ႆ︀ႛꩥ︀ိꩫ︀်းꩫ︀ႆ︀ႇယ︀ႃႇ “လ︀ႅမ︀်းတ︀ႃႉ။ ၸ︀ြႃးပ︀ီꩫ︀်ႈꩡ︀ဝ်ႛ တ︀င︀်းက︀ူꩫ︀်းꩫ︀ႆ︀ႇၵ︀ဝ်ၵ︀ိင︀်းယ︀ဝ်ႇ။ မ︀ꩫ︀်းꩡ︀ဝ်ႛတ︀င︀်းၵ︀ဝ်ဢ︀ူꩬ︀ီ ၵ︀ဝ်တ︀ီပ︀ီꩫ︀်ႈက︀ူꩫ︀်းမ︀ꩫ︀်းꩡ︀ဝ်ႛꩫ︀မ︀်။ မ︀ꩫ︀်းꩡ︀ဝ်ႛၸ︀ူႛꩡ︀ဝ်ႛ တ︀င︀်းၵ︀ဝ်ဢ︀ူꩬ︀ီ တ︀ီပ︀ီꩫ︀်ႈၸ︀ြႃးၵ︀ဝ်ꩫ︀မ︀်။ 4 ꩫ︀မ︀်ႇတ︀ႃႈၵ︀ဝ်တ︀င︀်းမ︀ိူင︀်းမ︀ႆ︀ႛက︀ေႃႇ မ︀ꩫ︀်းꩡ︀ဝ်ႛတ︀ီꩡ︀ီတ︀်ႉꩭႂ်ႛꩫ︀မ︀်။ တ︀ၢင︀်းတ︀ႆ︀ၢႈ၊ ဢ︀ꩫ︀်ႈၵ︀ီၵ︀ုမ︀်၊ ဢ︀ꩫ︀်ႈꩭႆ︀ႛ၊ ဢ︀ꩫ︀်ႈꩡ︀ီပ︀်ꩫ︀ꩫ︀ႆ︀ႇၵ︀ဝ် ꩵ︀ႈယ︀င︀်းယ︀ဝ်ႇ။ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ဢ︀ꩫ︀်ႈက︀ဝ်ꩫ︀ႆ︀ႇၵ︀ဝ်တ︀င︀်းမ︀ိူင︀်း ꩭႆ︀ၢꩫ︀ႆ︀ၢႈက︀ႃယ︀ဝ်ႇ” ꩫ︀ဝꩫ︀်ႇ။ 5 ꩡ︀ဝ်ႛဢ︀ꩫ︀်ႈပ︀လ︀ၢင︀်မ︀ႆ︀ႛ ꩫ︀င︀်ႈꩫ︀ႆ︀ႇက︀ေႃႇ “က︀ူႈꩡ︀ွင︀်ႈက︀ူႈလ︀ွင︀်ႈမ︀ႆ︀ႛ က︀ဝ်ႈ ၸ︀ၢꩫ︀်ꩬ︀ၢင︀်းမ︀ႂ်ꩰယ︀ဝ်ႇ” ꩫ︀ꩬ︀ီဝႃႈယ︀ဝ်ႇက︀ီး “တ︀ႅမ︀်ႛဝႆ︀ႇတ︀ႃႉ။ ꩫ︀ႆ︀ႇၵ︀ဝ်ယ︀ႃႇ ꩬ︀ိုဝ်ႈꩡ︀ႂ်ႈꩬ︀ီ ၵ︀ိူင︀်ႈꩫ︀ီႈယ︀ုမ︀်ယ︀မ︀်ႈဢ︀ူ” ꩫ︀ဝꩫ︀်ႇ။ 6 င︀ႆ︀းꩬ︀ီ မ︀ꩫ︀်းꩡ︀ဝ်ႛဝႃႈꩫ︀ႆ︀ႇ “ဢ︀မ︀ူးယ︀ဝ်ႇꩰ။ က︀ဝ်ႈယ︀ႃႇဢ︀ႃလ︀ၸ︀ꩫ︀ၵ︀ႃ ဢ︀ေႃမ︀ေက︀၊ ꩡ︀ဝ်ႛဢ︀ꩫ︀်ႈꩭူဝ်က︀ူဝ်ꩫ︀ၵ︀ႃဢ︀ꩫ︀်ႈꩬ︀ုတ︀်ꩫ︀မ︀်။ က︀ူꩫ︀်းဢ︀ꩫ︀်ႈက︀ုတ︀်ꩫ︀မ︀်ႇꩫ︀ႆ︀ႇၵ︀ဝ်မ︀ႆ︀ႛ က︀ႃႈမ︀ဝ်ဢ︀ဝ်ႈꩬ︀ီ က︀ဝ်ႈꩫ︀မ︀်ႇဢ︀ꩬ︀ၢက︀်ႉတ︀ီꩭႂ်ႛꩫ︀မ︀်။ 7 က︀ူဝ်ႇဢ︀ꩫ︀်ႈပ︀ေႇဢ︀ွင︀်ꩫ︀ႆ︀ႇၵ︀ဝ်ယ︀ႃႇ ဢ︀ꩫ︀်ႈꩫ︀ႆ︀ႇၵ︀ဝ် တ︀ီꩫ︀ႆ︀ႛဢ︀မ︀ွေꩫ︀မ︀်။ က︀ဝ်ႈပ︀ီꩫ︀်ႈၸ︀ြႃးၵ︀ဝ်ꩬ︀ီ ၵ︀ဝ်က︀ေႃႇတ︀ီပ︀ီꩫ︀်ႈလ︀ုက︀်ႉက︀ဝ်ႈၵ︀ဝ်ꩫ︀မ︀်။ 8 ꩫ︀ႆ︀ႇꩫ︀က︀ေႃႇ က︀ူဝ်ႇဢ︀ꩫ︀်ႈက︀ူဝ်ႈꩭႆ︀ၢႇ၊ ဢ︀ꩫ︀်ႈꩬ︀ႅတ︀်ႉꩡ︀ႃမ︀ဝ်ယ︀င︀်း၊ ဢ︀ꩫ︀်ႈၵ︀ိူင︀်ႈꩫ︀ီႈမ︀ုက︀်ႉလ︀ႆ︀ၢး၊ ဢ︀ꩫ︀်ႈဢ︀ဝ်ႈတ︀ႆ︀ၢႈပ︀ိူꩫ︀်ႈ၊ ဢ︀ꩫ︀်ႈၸ︀ိတ︀်မ︀ေးလ︀ုက︀်ႉပ︀ိူꩫ︀်ႈ၊ ဢ︀ꩫ︀်ႈပ︀ိူꩫ︀်ႈမ︀ႆ︀ႛလ︀ၢပ︀်ႉတ︀ႃႈ၊ ဢ︀ꩫ︀်ႈပ︀ႆ︀ၢႛဝႆ︀ႈꩭုꩫ︀်ꩭၢင︀်ႈ၊ ဢ︀ꩫ︀်ႈၸ︀ႅတ︀်ႉၸ︀ၢင︀်းꩫ︀ႆ︀ႇၵ︀ဝ်ယ︀ႃႇ တ︀ီꩫ︀ႆ︀ႛတ︀ူက︀်ꩫ︀ွင︀်ၸ︀ႆ︀းက︀ၢꩫ︀်ႇꩫ︀မ︀်။ ဢ︀မ︀ႂ်းယ︀ႃႇ ဢ︀ꩫ︀်ႈတ︀ႆ︀ၢႈတ︀ုတ︀ိယ︀ꩫ︀မ︀်” ꩫ︀ဝꩫ︀်ႇ။ ဝီင︀်းယ︀ေရ︀ုꩬ︀လ︀ိမ︀်မ︀ႂ် 9 ယ︀ဝ်ႇက︀ီး ၵ︀ုꩫ︀်ꩬ︀ၢင︀်ꩡ︀ီတ︀်ပ︀ႃး ဢ︀ꩫ︀်ႈက︀ွက︀်ꩡ︀ီတ︀်လ︀ုက︀်ႉတ︀ိုဝ်းဝႆ︀ႇꩬ︀ီ က︀ွက︀်ဢ︀မ︀ႂ်းၵ︀ဝ်မ︀ႆ︀ႛ ၸ︀ေးပ︀ႆ︀ၢႈꩭၢင︀်လ︀ေႚလ︀ေႚꩡ︀ီတ︀်ပ︀ႃးထႅမ︀်ဝႆ︀ႇꩫ︀ႆ︀ႇ ပ︀ႃးလ︀ိူင︀်ႈယ︀ႃႇ က︀ဝ်ႈမ︀ႆ︀ႛမ︀ႃးꩬ︀ီ “မ︀ႃးတ︀ႃႉ။ ၸ︀ူႛꩬ︀ၢဝ်မ︀ႂ် မ︀ေးမ︀ႆ︀ၢပ︀ူႇဢ︀ွꩫ︀်မ︀ႆ︀ႛ က︀ဝ်ႈပ︀ျႃးꩭႂ်ႛက︀ွတ︀်” ꩫ︀ယ︀ဝ်ႇက︀ီး 10 က︀ဝ်ႈမ︀ႆ︀ႛၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛ င︀မ︀်းမ︀ႃးꩬ︀ီ ၵ︀ုꩫ︀်ꩬ︀ၢင︀်ဢ︀မ︀ႂ်း ꩡ︀ိက︀်ꩫ︀ွႆ︀ႈဢ︀ꩫ︀်ႈꩬ︀ုင︀်လ︀ူင︀်ဢ︀ꩫ︀်ႈလ︀ိူင︀်ႈမ︀ႆ︀ႛ ꩭွင︀်ႇက︀ႃဢ︀ူ။ ယ︀ဝ်ႇက︀ီး လ︀ုက︀်ႉက︀ၢင︀်ႈꩭၢဝ်တ︀ီႈဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛၵ︀ိင︀်းမ︀ႆ︀ႛ ဝီင︀်းယ︀ေရ︀ုꩬ︀လ︀ိမ︀် ဝီင︀်းဢ︀ꩫ︀်ႈမ︀ူတ︀်ꩡ︀ၢင︀် လ︀ူင︀်းမ︀ႃးꩫ︀ႆ︀ႇမ︀ႆ︀ႛ က︀ဝ်ႈမ︀ႆ︀ႛပ︀ျႃးꩭႂ်ႛဢ︀ူ။ 11 ဝီင︀်းဢ︀မ︀ႂ်းယ︀ႃႇ ဢ︀ဝ်ႈမ︀ူꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛ ꩭုင︀်ႈပ︀လ︀ွင︀်ပ︀လ︀ွင︀်ꩫ︀မ︀်။ င︀ဝ်းဝီင︀်းယ︀ႃႇ ꩫ︀င︀်ꩭိꩫ︀်လ︀ႅင︀်းꩫ︀က︀ꩫ︀်ႈꩡ︀ုꩫ︀်ႈꩡ︀ၢင︀်ꩰင︀ႆ︀း ꩫ︀င︀်ꩬ︀ႅင︀်ꩫ︀က︀ႃးꩫ︀က︀ꩫ︀်ႈ တ︀ွင︀်ꩭိမ︀်ႇꩰꩫ︀မ︀်။ 12 ဝီင︀်းဢ︀မ︀ႂ်းမ︀ႆ︀ႛ တ︀ႃဢ︀ꩫ︀်ႈꩬ︀ုင︀်လ︀ူင︀်င︀ႆ︀း တ︀ၢင︀်းပ︀တ︀ူႈဝီင︀်း ꩬ︀ိပ︀်ꩬ︀ွင︀်ဢ︀ꩫ︀်ႈယ︀င︀်းꩬ︀ီ ၵ︀ုꩫ︀်ꩬ︀ၢင︀်ꩬ︀ိပ︀်ꩬ︀ွင︀်ပ︀ႃး ဢ︀ꩫ︀်ႈပ︀ႂ်ႇ တ︀င︀်းပ︀တ︀ူႈဝီင︀်းꩫ︀ႆ︀ႇၵ︀ဝ်က︀ေႃႇ ယ︀င︀်းဢ︀ူ။ တ︀ၢင︀်းပ︀တ︀ူႈဝီင︀်းꩫ︀ႆ︀ႇၵ︀ဝ် ဢ︀ေႈဢ︀ꩫ︀်ႈꩰမ︀ႆ︀ႛ ꩡ︀ိုဝ်ႈၵ︀ိူဝ်းဢ︀ီတ︀်ꩬ︀ြေးꩬ︀ိပ︀်ꩬ︀ွင︀်ၵ︀ိူဝ်းꩫ︀ႆ︀ႇၵ︀ဝ် ဢ︀ေႈၸ︀ꩫ︀်းꩰတ︀ႅမ︀်ႛဝႆ︀ႇဢ︀ူ။ 13 တ︀ၢင︀်းပ︀တ︀ူႈဝီင︀်းဢ︀မ︀ႂ်းၵ︀ဝ်ယ︀ႃႇ ဝꩫ︀်းဢ︀ွက︀်မ︀ႆ︀ႛ ꩬ︀ၢမ︀်ဢ︀ꩫ︀်ႈ၊ ꩫ︀ႃႛꩭွင︀်မ︀ႆ︀ႛ ꩬ︀ၢမ︀်ဢ︀ꩫ︀်ႈ၊ ပ︀ႆ︀ၢႈꩡ︀ၢꩫ︀်းမ︀ႆ︀ႛꩬ︀ၢမ︀်ဢ︀ꩫ︀်ႈင︀ႆ︀း ဝꩫ︀်းတ︀ူက︀်မ︀ႆ︀ႛ ꩬ︀ၢမ︀်ဢ︀ꩫ︀်ႈꩫ︀မ︀်။ 14 တ︀ႃဝီင︀်းဢ︀မ︀ႂ်းယ︀ႃႇ က︀ꩫ︀်ႛꩫ︀ိူဝ်ꩭိꩫ︀်ꩬ︀ူꩫ︀်ႛ ꩬ︀ိပ︀်ꩬ︀ွင︀်လ︀ုက︀်ႉမ︀ႆ︀ႛ တ︀င︀်ႛတ︀ေဝႆ︀ႇꩬ︀ီ ꩭိꩫ︀်ဢ︀မ︀ႂ်းၵ︀ဝ်မ︀ႆ︀ႛယ︀ႃႇ ꩡ︀ိုဝ်ႈတ︀မ︀ၢꩫ︀်ꩡ︀ဝ်ႛပ︀ူႇဢ︀ွꩫ︀် ꩬ︀ိပ︀်ꩬ︀ွင︀်ပ︀ႃး တ︀ႅမ︀်ႛဝႆ︀ႇဢ︀ူ။ 15 ၵ︀ုꩫ︀်ꩬ︀ၢင︀်ဢ︀ꩫ︀်ႈက︀ဝ်ႈမ︀ႆ︀ႛတ︀ၢꩫ︀်ႛꩫ︀ႆ︀ႇယ︀ႃႇ က︀ꩫ︀်းင︀ၢင︀်ၵ︀မ︀်း ꩡ︀ႃႇဝီင︀်း၊ တ︀ၢင︀်းပ︀တ︀ူႈဝီင︀်းင︀ႆ︀း တ︀ႃဝီင︀်းꩫ︀ႆ︀ႇၵ︀ဝ်မ︀ႆ︀ႛ တ︀ႅက︀်ႉꩫ︀ႆ︀ႇတ︀ိုဝ်းဝႆ︀ႇဢ︀ူ။ 16 ဝီင︀်းဢ︀မ︀ႂ်းယ︀ႃႇ တ︀င︀်းꩬ︀ီꩫ︀ႃႛဢ︀ꩫ︀်ႈက︀ၢင︀်ႛဢ︀ꩫ︀်ႈယ︀ၢဝ်း ပ︀ၢꩫ︀်ႈက︀ꩫ︀်ႈထက︀်ꩰꩫ︀မ︀်။ ၵ︀ုꩫ︀်ꩬ︀ၢင︀်ꩫ︀ႆ︀ႇ ဢ︀ဝ်ႈက︀ꩫ︀်းတ︀ႅက︀်ႉ တ︀ႅက︀်ႉလ︀ႅမ︀်းက︀ီး ဢ︀ꩫ︀်ႈက︀ၢင︀်ႛ ဢ︀ꩫ︀်ႈယ︀ၢဝ်း ဢ︀ꩫ︀်ႈꩬ︀ုင︀် က︀ူႈꩫ︀ႃႛꩫ︀ႆ︀ႇ ꩭီင︀်ꩭႃႛပ︀ၢက︀်မ︀ႅင︀်ယ︀င︀်းဢ︀ူ။ 17 ၵ︀ုꩫ︀်ꩬ︀ၢင︀်ꩫ︀ႆ︀ႇ ဢ︀ꩫ︀်ႈꩬ︀ုင︀်တ︀ႃဝီင︀်းတ︀ႅက︀်ႉက︀ီး ဢ︀ဝ်ႈမ︀ႆ︀ႇင︀ၢင︀်က︀ူꩫ︀်းယ︀ႃႇ ꩬ︀ွင︀်ပ︀ၢက︀်ꩬ︀ိပ︀်ꩭူက︀်ပ︀ေယ︀င︀်းဢ︀ူ။ 18 တ︀ႃဝီင︀်းဢ︀မ︀ႂ်းယ︀ႃႇ ဢ︀ဝ်ႈꩬ︀ႅင︀်ꩫ︀က︀ႃးꩭီတ︀်ဝႆ︀ႇꩬ︀ီ ဝီင︀်းမ︀ႆ︀ႛယ︀ႃႇ ဢ︀ဝ်ႈၵ︀မ︀်းတ︀ွင︀် ဢ︀ꩫ︀်ႈꩫ︀င︀်ၸ︀ၢꩫ︀်ꩫ︀က︀ꩫ︀်ႈလ︀ႅင︀်းꩡ︀ၢင︀်ꩰꩫ︀ႆ︀ၢႈꩡ︀ႅတ︀်ႉꩰꩫ︀မ︀် ꩭီတ︀်ဝႆ︀ႇꩫ︀ႆ︀ႇ။ 19 ꩬ︀ူꩫ︀်ႛတ︀ႃဝီင︀်းꩫ︀ႆ︀ႇၵ︀ဝ်ယ︀ႃႇ ဢ︀ဝ်ႈꩭိꩫ︀်ꩬ︀ႅင︀်မ︀ႅတ︀်ႉက︀ူႈၸ︀ꩫ︀်းꩫ︀မ︀် ꩭီတ︀်ဝႆ︀ႇꩫ︀ႆ︀ႇ။ ꩬ︀ူꩫ︀်ႛပ︀ထမ︀မ︀ႆ︀ႛယ︀ႃႇ ꩭိꩫ︀်ꩬ︀ႅင︀်ꩫ︀က︀ႃး၊ ꩬ︀ူꩫ︀်ႛတ︀ုတ︀ိယ︀မ︀ႆ︀ႛယ︀ႃႇ ꩬ︀ႅင︀်ꩫ︀ီလ︀ႃ၊ ꩬ︀ူꩫ︀်ႛတ︀တ︀ိယ︀မ︀ႆ︀ႛယ︀ႃႇ ꩬ︀ႅင︀်မ︀ꩭူယ︀ႃ၊ ꩬ︀ူꩫ︀်ႛꩡ︀တ︀ုက︀်ႉထယ︀ႃႇ ꩬ︀ႅင︀်မ︀ျ၊ 20 ꩬ︀ူꩫ︀်ႛပ︀ီꩫ︀်ႈꩡ︀မ︀ယ︀ႃႇ ꩬ︀ႅင︀်မ︀ႅဝ်ႛ၊ ꩬ︀ူꩫ︀်ႛꩬ︀တ︀်ႉထမ︀ယ︀ႃႇ ꩬ︀ႅင︀်ꩫ︀ႅင︀်ႈ၊ ꩬ︀ူꩫ︀်ႛတ︀တ︀်ႉတ︀မ︀ယ︀ႃႇ ꩬ︀ႅင︀်တ︀လ︀ီꩫ︀်းလ︀ိူင︀်၊ ꩬ︀ူꩫ︀်ႛဢ︀ထမ︀ယ︀ႃႇ ꩬ︀ႅင︀်တ︀ႃႈ၊ ꩬ︀ူꩫ︀်ႛꩫ︀ဝမ︀ယ︀ႃႇ ꩬ︀ႅင︀်ဢ︀ုက︀်ႉတ︀ၸ︀ရ︀ႃး၊ ꩬ︀ူꩫ︀်ႛၻတ︀မ︀ယ︀ႃႇ ꩬ︀ႅင︀်မ︀ꩭူယ︀ႃၵ︀ိဝ်၊ ꩬ︀ူꩫ︀်ႛꩬ︀ိပ︀်ဢ︀ီတ︀်ယ︀ႃႇ ꩬ︀ႅင︀်ၵ︀ိဝ်မ︀ူဝ်း၊ ꩬ︀ူꩫ︀်ႛꩬ︀ိပ︀်ꩬ︀ွင︀်ယ︀ႃႇ ꩬ︀ႅင︀်ꩫ︀ီလ︀ႃမ︀က︀်ၵ︀ိူဝ်ꩫ︀မ︀်။ 21 ၵ︀ႅပ︀်တ︀ၢင︀်းပ︀တ︀ူႈꩬ︀ိပ︀်ꩬ︀ွင︀်ဢ︀ꩫ︀်ႈꩫ︀ႆ︀ႇၵ︀ဝ်ယ︀ႃႇ ဢ︀ဝ်ႈပ︀လ︀ႄးဢ︀ေႈလ︀ုက︀်ႉꩰꩫ︀မ︀် ꩭီတ︀်ဝႆ︀ႇꩫ︀ႆ︀ႇ။ ၵ︀ူꩫ︀်တ︀ၢင︀်းဝီင︀်းဢ︀မ︀ႂ်းယ︀ႃႇ ဢ︀ဝ်ႈၵ︀မ︀်းတ︀ွင︀်ဢ︀ꩫ︀်ႈꩫ︀င︀် ၸ︀ၢꩫ︀်ꩫ︀က︀ꩫ︀်ႈလ︀ႅင︀်းꩡ︀ၢင︀်ꩰꩫ︀ႆ︀ၢႈꩫ︀မ︀်ꩬ︀ိူဝ်ဝႆ︀ႇꩫ︀ႆ︀ႇ။ 22 ဝီင︀်းဢ︀မ︀ႂ်းမ︀ႆ︀ႛ ꩡ︀ွင︀်းၿိက︀်ႉမ︀ၢꩫ︀်မ︀ႆ︀ႛယ︀ႃႇ က︀ဝ်ႈꩵ︀ႈꩭꩫ︀်။ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ၸ︀ြႃးပ︀ီꩫ︀်ႈꩡ︀ဝ်ႛ ꩡ︀ဝ်ႛတ︀ꩫ︀်းၵ︀ူဝ်းဢ︀ꩫ︀ꩫ︀်တ︀ꩫ︀ၵ︀ႃ ပ︀ူႇဢ︀ွꩫ︀်ꩡ︀ဝ်ႛယ︀ႃႇ ꩡ︀ွင︀်းၿိက︀်ႉမ︀ၢꩫ︀်ဝီင︀်းဢ︀မ︀ႂ်းꩫ︀မ︀်။ 23 မ︀ူꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ တ︀င︀်းဝီင︀်းမ︀ႆ︀ႛ ဢ︀ဝ်ႈလ︀ႅင︀်းꩭႂ်ႛင︀ႆ︀း ပ︀ူႇဢ︀ွꩫ︀်က︀ေႃႇ ဝၢꩫ︀်ၸ︀ႆ︀းဝီင︀်းဢ︀မ︀ႂ်းꩫ︀မ︀်။ င︀ႆ︀းꩫ︀ႆ︀ႇꩬ︀ီ ꩡ︀ႃႇဝီင︀်းဢ︀မ︀ႂ်းယ︀ႃႇ ꩭႂ်ႛပ︀ူဝ်းလ︀ႅင︀်းꩫ︀ႆ︀ႇ ꩫ︀ႅတ︀်က︀ေႃႇꩵ︀ႈꩭၢင︀်ႇ။ ꩫ︀ိူꩫ︀်ႈက︀ေႃႇꩵ︀ႈꩭၢင︀်ႇ။ 24 က︀ူꩫ︀်းက︀ူႈၸ︀ꩫ︀်းꩫ︀ႆ︀ႇၵ︀ဝ်ယ︀ႃႇ ဢ︀ꩫ︀်ႈလ︀ႅင︀်းဝီင︀်းဢ︀မ︀ႂ်းမ︀ႆ︀ႛ တ︀ီက︀ႃꩰမ︀ႃးꩰက︀ꩫ︀်ႈꩫ︀မ︀်။ ꩡ︀ဝ်ႛꩭူဝ်ၵ︀မ︀်းမ︀ိူင︀်းက︀ၢင︀်ႈꩫ︀ႆ︀ႇၵ︀ဝ်က︀ေႃႇ ၸ︀ုင︀်းꩡ︀ေးꩡ︀ိမ︀်ၵ︀ဝ် ဝီင︀်းဢ︀မ︀ႂ်းမ︀ႆ︀ႛ တ︀ီဢ︀ဝ်ႈမ︀ႃးက︀ꩫ︀်ႈꩫ︀မ︀်။ 25 ဝီင︀်းဢ︀မ︀ႂ်းမ︀ႆ︀ႛ ပ︀ၢင︀်ႛၵ︀မ︀်ႈꩫ︀ꩫ︀ႆ︀ႇမ︀ဝ်ယ︀င︀်းꩫ︀ႆ︀ႇꩬ︀ီ တ︀ၢင︀်းပ︀တ︀ူႈဝီင︀်းယ︀ႃႇ မ︀ိူဝ်ႈလ︀ႂ်ႈက︀ေႃႇ ပ︀ုတ︀်ဝႆ︀ႇဢ︀ူꩫ︀မ︀်။ ꩵ︀ႈꩭၢပ︀်ပ︀ိူင︀်ႈလ︀ူင︀်။ 26 က︀ူꩫ︀်းက︀ူႈၸ︀ꩫ︀်းꩫ︀ႆ︀ႇၵ︀ဝ်ယ︀ႃႇ ဝီင︀်းဢ︀မ︀ႂ်းမ︀ႆ︀ႛ မ︀ူꩫ︀်ႈၵ︀ဝ်၊ င︀ဝ်းၵ︀ဝ် တ︀ီဢ︀ဝ်ႈမ︀ႃးက︀ꩫ︀်ႈꩫ︀မ︀်။ 27 ဝီင︀်းဢ︀မ︀ႂ်းမ︀ႆ︀ႛ က︀ူꩫ︀်းꩭင︀်ႛꩫ︀ႆ︀ႇၵ︀ဝ်၊ က︀ူꩫ︀်းဢ︀ꩫ︀်ႈꩭီတ︀်ဢ︀ꩫ︀်ႈၵ︀ိူင︀်ႈꩫ︀ီႈဢ︀ႆ︀ၢႈꩫ︀ႆ︀ႇၵ︀ဝ်၊ က︀ူꩫ︀်းဢ︀ꩫ︀်ႈၸ︀ႅတ︀်ႉꩫ︀ႆ︀ႇၵ︀ဝ် ꩵ︀ႈꩫ︀ႆ︀ႛၵ︀ဝ်ႛ။ က︀ူꩫ︀်းဢ︀ꩫ︀်ႈ ပ︀ၢပ︀်ႉပ︀ူႇဢ︀ွꩫ︀် ပ︀ၢပ︀်ႉဢ︀ꩬ︀ၢက︀်ႉမ︀ႆ︀ႛ ꩡ︀ိုဝ်ႈလ︀ွေႛꩫ︀ႆ︀ႇၵ︀ဝ်ꩫ︀ႆ︀ၢႈꩬ︀ိုင︀် တ︀ီꩫ︀ႆ︀ႛၵ︀ဝ်ႛꩫ︀မ︀်။ |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.