ဢ︀ေၸ︀ႅတ︀် 6 - Khamti Shanၵ︀ူဝ်ႛꩬ︀ွꩫ︀်လ︀ွင︀်ႈပ︀ူဝ်မ︀ေꩫ︀ၵ︀ႃလ︀ုက︀်ႉလ︀ၢင︀်း 1 လ︀ုက︀်ႉၵ︀ဝ်ꩴ︀း ꩬ︀ူဢ︀ူက︀ꩫ︀်ႛꩫ︀ႂ်းꩡ︀ဝ်ႛယ︀ေꩬ︀ုၵ︀ရ︀ီတ︀်ꩫ︀ႆ︀ႇꩬ︀ီ ၵ︀ၢမ︀်းပ︀ူဝ်မ︀ေꩬ︀ူမ︀ႆ︀ႛထွမ︀်က︀ꩫ︀်ႈတ︀ႃႉ။ ထွမ︀်ၵ︀ၢမ︀်းပ︀ူဝ်မ︀ေꩫ︀ꩫ︀ႆ︀ႇ ဢ︀ꩫ︀်ႈꩬ︀ူထုက︀်ꩭီတ︀်ꩫ︀မ︀်။ 2-3 “ပ︀ူဝ်မ︀ေမ︀ႆ︀ႛ ယ︀မ︀်ႈင︀ဝ်းတ︀ႃႉ” ꩫ︀ꩫ︀ႆ︀ႇ ꩬ︀ိꩫ︀်ပ︀ထမ︀ ဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛ တ︀င︀်းက︀တ︀ိက︀ူပ︀်ꩬ︀ီꩭႂ်ႛဝႆ︀ႇꩫ︀ႆ︀ႇꩫ︀မ︀်။ က︀တ︀ိမ︀ꩫ︀်းꩡ︀ဝ်ႛယ︀ႃႇ ပ︀ူဝ်မ︀ေမ︀ႆ︀ႛ ယ︀မ︀်ႈင︀ဝ်းက︀ီး “ꩬ︀ူမ︀ႆ︀ႛ မ︀ꩫ︀်းꩡ︀ဝ်ႛ မ︀ၢင︀်က︀လ︀ႃဢ︀ဝ်ႈယ︀င︀်းꩬ︀ီ ဢ︀ꩬ︀ၢက︀်ႉဢ︀ဝ်ႈယ︀ၢဝ်းꩭႂ်ႛဢ︀ူ” ꩫ︀ꩫ︀မ︀်။ 4 ၸ︀ူႛပ︀ီꩫ︀်ႈပ︀ူဝ်မ︀ေၵ︀ဝ်ꩴ︀း ꩬ︀ူက︀ေႃႇလ︀ုက︀်ႉꩬ︀ူမ︀ႆ︀ႛ ꩭႂ်ႛပ︀ူဝ်းတ︀ေႃးꩬ︀ႃးꩫ︀ႆ︀ႇ ပ︀ီꩡ︀ႃႇဝၢင︀်။ ꩫ︀င︀်ၸ︀ြႃးပ︀ီꩫ︀်ႈꩡ︀ဝ်ႛꩡ︀ီႇလ︀ွင︀်ႈပ︀ျႃးတ︀ၢင︀်းꩫ︀က︀ꩫ︀်ႈꩬ︀ိုင︀် ၵ︀ဝ်မ︀ႆ︀ႛꩬ︀ုင︀်းမ︀ႃးꩬ︀ီ ꩬ︀ွꩫ︀်ꩭႂ်ႛလ︀ီင︀်ႇꩭႂ်ႛꩫ︀ီႈꩫ︀ီႈက︀ꩫ︀်ႈတ︀ႃႉ။ ၵ︀ူဝ်ႛꩬ︀ွꩫ︀်လ︀ွင︀်ႈꩡ︀ဝ်ႛꩫ︀ၵ︀ႃၵ︀ႃႛꩫ︀ႆ︀ႇၵ︀ဝ် 5 ၸ︀ူႛပ︀ီꩫ︀်ႈၵ︀ႃႛၵ︀ဝ်ꩴ︀း ꩡ︀ဝ်ႛꩬ︀ူမ︀ႆ︀ႛꩫ︀ၢပ︀်ႉယ︀မ︀်ႈတ︀ေႇတ︀ေႇꩬ︀ီ ၵ︀ၢမ︀်းထွမ︀်ꩫ︀ီႈꩫ︀ီႈက︀ꩫ︀်ႈတ︀ႃႉ။ ꩫ︀င︀်ꩬ︀ူ ꩡ︀ဝ်ႛယ︀ေꩬ︀ုၵ︀ရ︀ီတ︀်မ︀ႆ︀ႛ မ︀ိုင︀်ႇꩫ︀က︀ꩫ︀်ႈ ꩡ︀ဝ်ႛꩬ︀ူမ︀ႆ︀ႛမ︀ိုင︀်ႇꩫ︀ီႈꩫ︀ီႈꩭႂ်ႛက︀ꩫ︀်ႈတ︀ႃႉ။ 6 ပ︀ၢင︀်ႈꩫ︀ႃႛၵ︀ဝ်မ︀ႆ︀ႛꩫ︀ႆ︀ၢႈꩬ︀ိုင︀် ၵ︀ႂ်ႈꩫ︀ႆ︀ႛꩫ︀ႃႛꩬ︀ီ ပ︀ီꩭီတ︀်ပ︀ျႃး။ က︀ွပ︀်ႉပ︀ိူဝ်ႈꩬ︀ူပ︀ီꩫ︀်ႈၵ︀ႃႛꩡ︀ဝ်ႛယ︀ေꩬ︀ုၵ︀ရ︀ီတ︀်ꩫ︀ႆ︀ႇꩬ︀ီ ꩫ︀င︀်ၸ︀ြႃးပ︀ီꩫ︀်ႈꩡ︀ဝ်ႛ ဢ︀လ︀ၢင︀်းယ︀င︀်းꩫ︀က︀ꩫ︀်ႈ တ︀င︀်းꩡ︀ႂ်ႈတ︀င︀်းၵ︀ူဝ်း ꩭီတ︀်က︀ꩫ︀်ႈတ︀ႃႉ။ 7 ꩫ︀င︀်ꩭီတ︀်ဢ︀မ︀ူးꩡ︀ႃႇက︀ူꩫ︀်းꩫ︀က︀ꩫ︀်ႈꩫ︀ႆ︀ၢႈမ︀ဝ်ꩡ︀ႂ်ႈꩬ︀ီ ꩫ︀င︀်ꩭီတ︀်ဢ︀မ︀ူးꩡ︀ႃႇꩡ︀ဝ်ႛယ︀ေꩬ︀ုၵ︀ရ︀ီတ︀်ꩫ︀က︀ꩫ︀်ႈ ꩭုမ︀်ꩰꩡ︀ူမ︀်းꩰꩭီတ︀်ꩭႂ်ႛက︀ꩫ︀်ႈတ︀ႃႉ။ 8 ꩭဝ်းပ︀ီꩫ︀်ႈက︀ူꩫ︀်းလ︀ွတ︀်ႉပ︀တ︀ု ပ︀ီꩫ︀်ႈၵ︀ႃႛပ︀တ︀ု ဢ︀ꩫ︀်ႈꩫ︀င︀်ꩭဝ်းက︀ူႈက︀ူဝ်ႇꩭီတ︀်လ︀ွင︀်ႈꩫ︀ီႈက︀ႃမ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛတ︀ီပ︀ူင︀်ႈဢ︀က︀ိဝ်းꩫ︀မ︀်ꩫ︀ꩫ︀ႆ︀ႇ ꩬ︀ူတ︀ွင︀်းဢ︀ူ။ 9 ၸ︀ူႛပ︀ီꩫ︀်ႈꩡ︀ဝ်ႛၵ︀ဝ်ꩴ︀း ꩬ︀ူက︀ေႃႇၵ︀ႃႛꩬ︀ူမ︀ႆ︀ႛ ꩫ︀င︀်ꩫ︀ႆ︀ႇꩫ︀က︀ꩫ︀်ႈꩭီတ︀်ꩫ︀ီႈꩫ︀ီႈက︀ꩫ︀်ႈတ︀ႃႉ။ ၵ︀ဝ်မ︀ႆ︀ႛပ︀ီလ︀ွက︀်။ က︀ꩫ︀်ႛꩫ︀ိူဝ်ꩬ︀ူင︀ႆ︀း က︀ꩫ︀်ႛꩫ︀ိူဝ်ၵ︀ႃႛꩬ︀ူ တ︀င︀်းမ︀ိူင︀်းမ︀ႆ︀ႛ ꩡ︀ဝ်ႛပ︀ႃးလ︀ိဝ်ႈဢ︀ꩫ︀်ႈဢ︀ူက︀ၢင︀်ႈꩭၢဝ်ꩫ︀ႆ︀ႇယ︀င︀်းဢ︀ူ။ မ︀ꩫ︀်းꩡ︀ဝ်ႛယ︀ႃႇ ၸ︀ႂ်မ︀ႆ︀ႛက︀ေႃႇ မ︀ဝ်ꩫ︀ူႈꩫ︀ႃႛꩬ︀ီ တ︀င︀်းမ︀ိူင︀်းမ︀ႆ︀ႛ တ︀ီပ︀ႅတ︀်ႉတ︀ြႃးၵ︀ိူင︀်ႈꩰꩫ︀မ︀်ꩫ︀ꩫ︀ႆ︀ႇ ꩬ︀ူတ︀ွင︀်းဢ︀ူ။ ၵ︀ိူင︀်ႈꩬ︀ိူက︀်ဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛꩭႅမ︀်းꩭႂ်ႛ 10 ပ︀ႆ︀ၢႈꩭၢင︀်လ︀ေႚလ︀ေႚမ︀ႆ︀ႛ ၵ︀ႂ်ႈဝႃႈꩫ︀ႆ︀ႇယ︀ႃႇ ꩬ︀ူဢ︀ူꩫ︀ႂ်းꩡ︀ဝ်ႛယ︀ေꩬ︀ုၵ︀ရ︀ီတ︀်ꩫ︀ႆ︀ႇꩬ︀ီ ꩬ︀ူမ︀ႆ︀ႛ ဢ︀ဝ်ႈတ︀ꩫ︀်းၵ︀ူဝ်းလ︀ူင︀်မ︀ꩫ︀်းꩡ︀ဝ်ႛ ꩭႂ်ႛဢ︀ဝ်ႈၵ︀ိူင︀်က︀ိုမ︀်းက︀တ︀ႃႉ။ 11 ꩭႂ်ႛပ︀ူဝ်းဢ︀ꩫ︀်ႈၵ︀ုꩫ︀်ꩬ︀ူင︀်က︀ႅမ︀်ဢ︀ꩫ︀်ႈမ︀ဝ်ꩫ︀ီႈမ︀ႆ︀ႛ ꩬ︀ူတ︀ႃႛပ︀ေႇꩫ︀ႆ︀ႇ ၵ︀ိူင︀်ႈꩬ︀ိူက︀်ဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛꩭႅမ︀်းꩭႂ်ႛꩫ︀ႆ︀ႇတ︀င︀်းမ︀ိူင︀်း ဢ︀ဝ်ႈက︀ုမ︀်ꩰꩭၢင︀်ႛဝႆ︀ႇက︀ꩫ︀်ႈတ︀ႃႉ။ 12 က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ꩭဝ်းတ︀ိက︀်တ︀ူဝ်းꩫ︀ႆ︀ႇယ︀ႃႇ က︀ူꩫ︀်းမ︀ႆ︀ႛꩵ︀ႈꩡ︀ႂ်ႈ။ တ︀ꩫ︀်းၵ︀ူဝ်းၵ︀ွꩫ︀်ꩫ︀ႆ︀ႇၵ︀ဝ်၊ ၸ︀ူႛက︀မ︀်ႈဢ︀ႃꩫ︀ႃꩫ︀ႆ︀ႇၵ︀ဝ်၊ ၵ︀ုꩫ︀်ၵ︀ွꩫ︀်ꩭႆ︀ၢႇဢ︀ꩫ︀်ႈ ဢ︀ꩫ︀်ႈꩫ︀မ︀်ႈꩬ︀ိင︀်မ︀ိူင︀်းက︀ၢင︀်ꩫ︀ႆ︀ႇမ︀ႆ︀ႛ ဢ︀ုပ︀်ႉပ︀ိုင︀်ꩫ︀ႆ︀ႇၵ︀ဝ်၊ ၸ︀ီꩭၢႆ︀ႇဢ︀ꩫ︀်ႈဢ︀ူက︀ၢင︀်ႈꩭၢဝ်ꩫ︀ႆ︀ႇၵ︀ဝ်မ︀ႆ︀ႛꩫ︀မ︀် ꩭဝ်းတ︀ိက︀်တ︀ူဝ်းဢ︀ူꩫ︀ႆ︀ႇ။ 13 င︀ႆ︀းꩫ︀ႆ︀ႇꩬ︀ီ ၵ︀ိူင︀်ႈꩬ︀ိူက︀်ဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛꩭႅမ︀်းꩭႂ်ႛတ︀င︀်းမ︀ိူင︀်း ꩭၢင︀်ႛက︀ꩫ︀်ႈတ︀ႃႉ။ င︀ႆ︀းက︀ီး ဝꩫ︀်းမ︀ိူဝ်ႈလ︀ꩫ︀်ꩬ︀ူတ︀ိက︀်မ︀ႃးꩫ︀ႆ︀ႇ ꩬ︀ူတ︀ႃႛပ︀ေႇꩬ︀ီ မ︀ိူဝ်ႈတ︀င︀်းမ︀ိူင︀်းမ︀ႆ︀ႛတ︀ိက︀်ယ︀ဝ်ႇꩫ︀ႆ︀ႇ ꩬ︀ူꩬ︀ဝ်းၵ︀ိူင︀်ꩰပ︀ီꩫ︀်ႈဢ︀ူ။ 14 င︀ႆ︀းꩫ︀ႆ︀ႇꩬ︀ီ ꩭၢင︀်ႛꩭႅမ︀်းထုက︀်ꩰဝႆ︀ႇက︀ꩫ︀်ႈတ︀ႃႉ။ ꩫ︀င︀်လ︀ုက︀်ႉꩬ︀ိူက︀်ꩫ︀ႆ︀ႇၵ︀ဝ် ꩥ︀ႅင︀်ႛမ︀ႆ︀ႛꩬ︀ႆ︀ၢက︀ႅတ︀်ꩭတ︀်ႉဝႆ︀ႇꩫ︀က︀ꩫ︀်ႈ ꩬ︀မ︀်မ︀ႃတ︀ြႃးၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ꩬ︀ဝ်းၵ︀ိူင︀်ꩰဢ︀ူတ︀ႃႉ။ ꩬ︀ိူဝ်ႛက︀ုမ︀်ႇꩫ︀ုင︀်ႈဝႆ︀ႇꩫ︀က︀ꩫ︀်ႈ ꩬ︀ိုဝ်ႈꩰတ︀ူဝ်ꩰဢ︀ူက︀ꩫ︀်ႈတ︀ႃႉ။ 15 ꩫ︀င︀်ၵ︀ႅပ︀်တ︀ိꩫ︀်ႈꩬ︀ိူက︀်ꩬ︀ုပ︀်ဝႆ︀ႇꩫ︀က︀ꩫ︀်ႈ ပ︀ိူꩫ︀်ႈမ︀ႆ︀ႛၵ︀ၢဝ်ႈၵ︀ၢမ︀်းꩫ︀ီႈ လ︀ွင︀်ႈက︀တ︀်ယ︀ီꩫ︀်ႈၵ︀ျမ︀်းꩬ︀ႃꩫ︀ႆ︀ႇၵ︀ႆ︀ႈက︀ွတ︀်ꩫ︀ꩬ︀ီ မ︀ိူဝ်ႈလ︀ႂ်ႈမ︀ိူဝ်ႈလ︀ႂ်ႈက︀ေႃႇ ꩭႅမ︀်းဝႆ︀ႇက︀ꩫ︀်ႈတ︀ႃႉ။ 16 ꩫ︀င︀်က︀ႅꩫ︀်ႈတ︀ိုဝ်းဝႆ︀ႇꩫ︀က︀ꩫ︀်ႈ မ︀ိူဝ်ႈလ︀ႂ်ႈမ︀ိူဝ်ႈလ︀ႂ်ႈက︀ေႃႇ ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ယ︀ုမ︀်ယ︀မ︀်ႈပ︀ိုင︀်ႈဢ︀ိင︀်ႈꩬ︀ီဢ︀ူက︀ꩫ︀်ႈတ︀ႃႉ။ င︀ႆ︀းက︀ီး ꩫ︀င︀်လ︀ိမ︀်ႛက︀ၢင︀်ၸ︀ႆ︀းယ︀ိုဝ်းမ︀ႃးꩫ︀က︀ꩫ︀်ႈ ꩬ︀ူမ︀ႆ︀ႛၵ︀ုꩫ︀်ꩬ︀ူင︀်ၵ︀ႂ်ႈလ︀ႂ်ႈက︀ဝ်းမ︀ႃးꩫ︀က︀ေႃႇ ꩭႂ်ပ︀ူဝ်းꩬ︀ူမ︀ႆ︀ႛမ︀ဝ်ထုက︀်ꩫ︀ႆ︀ႇ ꩬ︀ူက︀င︀်ႛပ︀ေႇဢ︀ူ။ 17 ယ︀ဝ်ႇက︀ီး ꩫ︀င︀်မ︀ူက︀်လ︀ီက︀်ꩬ︀ုပ︀်ဝႆ︀ႇꩫ︀က︀ꩫ︀်ႈ ဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛၵ︀ေꩬ︀ေꩭႂ်ႛမ︀ႆ︀ႛက︀ေႃႇ ꩬ︀ွꩫ︀်ႈဢ︀ူက︀ꩫ︀်ႈတ︀ႃႉ။ ꩫ︀င︀်ၸ︀ႃႇဝၢမ︀်ႇဝႆ︀ႇꩫ︀က︀ꩫ︀်ႈ ၵ︀ၢမ︀်းဢ︀ꩫ︀်ႈၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛꩫ︀ေꩭႂ်ႛမ︀ႆ︀ႛက︀ေႃႇ တ︀ိုဝ်းဢ︀ူက︀ꩫ︀်ႈတ︀ႃႉ။ 18 ꩫ︀ႆ︀ႇꩬ︀ေႇမ︀ဝ်က︀ႃး မ︀ိူဝ်ႈလ︀ႂ်ႈမ︀ိူဝ်ႈလ︀ႂ်ႈက︀ေႃႇ ယ︀ွꩫ︀်းꩬ︀ူးꩬ︀ီဢ︀ူက︀ꩫ︀်ႈတ︀ႃႉ။ ꩫ︀င︀်ၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛꩫ︀ေꩭႂ်ႛꩫ︀က︀ꩫ︀်ႈ က︀ူႈလ︀ွင︀်ႈက︀ူႈတ︀ၢင︀်းမ︀ႆ︀ႛ ယ︀ွꩫ︀်းꩬ︀ူးဢ︀ူက︀ꩫ︀်ႈတ︀ႃႉ။ မ︀ိူဝ်ႈလ︀ႂ်ႈမ︀ိူဝ်ႈလ︀ႂ်ႈက︀ေႃႇ ၵ︀ႅတ︀်ꩬ︀ီ ꩡ︀ႂ်ႈမ︀ဝ်ယ︀ူဝ်ႈမ︀ဝ်ယ︀ွမ︀်းꩬ︀ီဢ︀ူတ︀ႃႉ။ ꩡ︀ႃႇက︀ူꩫ︀်းၸ︀ြႃးပ︀ီꩫ︀်ႈꩡ︀ဝ်ႛꩫ︀ႆ︀ႇၵ︀ဝ်တ︀င︀်းလ︀ုင︀် မ︀ိူဝ်ႈလ︀ႂ်ႈမ︀ိူဝ်ႈလ︀ႂ်ႈက︀ေႃႇ ယ︀ွꩫ︀်းꩬ︀ူဢ︀ူတ︀ႃႉ။ 19 ꩡ︀ႃႇက︀ဝ်ႈက︀ေႃႇ ꩭႂ်ႛပ︀ူဝ်းက︀ဝ်ႈမ︀ႆ︀ႛ ၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛပ︀ုတ︀်ပ︀ျႃးꩭႂ်ႛꩬ︀ီ လ︀ွင︀်ႈၵ︀ၢဝ်ႈၵ︀ၢမ︀်းꩫ︀ီႈဢ︀ꩫ︀်ႈလ︀ိူက︀်ႉလ︀မ︀်ꩫ︀ႆ︀ႇၵ︀ဝ် ꩭတ︀်ꩰꩭၢꩫ︀်ꩰꩭူဝ်းပ︀ီꩫ︀်ႈꩫ︀ႆ︀ႇ ယ︀ွꩫ︀်းꩬ︀ူးꩭႂ်ႛက︀ꩫ︀်ႈမ︀ႃးတ︀ႃႉ။ 20 င︀ႆ︀ႚက︀ဝ်ႈတ︀ူက︀်ထွင︀်ဢ︀ူꩫ︀က︀ေႃႇ က︀ဝ်ႈမ︀ႆ︀ႛၸ︀ြႃးပ︀ီꩫ︀်ႈꩡ︀ဝ်ႛ ꩡ︀ႂ်ႇꩭႂ်ႛꩭူဝ်းၵ︀ၢဝ်ႈၵ︀ၢမ︀်းꩫ︀ီႈꩫ︀ႆ︀ႇꩬ︀ီ က︀ဝ်ႈꩭူဝ်းဢ︀ူꩫ︀မ︀်။ င︀ႆ︀းꩫ︀ႆ︀ႇꩬ︀ီ ဢ︀ꩫ︀်ႈက︀ဝ်ႈဝႃႈꩭူဝ်းꩫ︀ႆ︀ႇ ꩭႂ်ႛပ︀ူဝ်းက︀ဝ်ႈꩭတ︀်ꩰꩭၢꩫ︀်ꩰꩭူဝ်းပ︀ီꩫ︀်ႈꩫ︀ႆ︀ႇ ယ︀ွꩫ︀်းꩬ︀ူးꩭႂ်ႛက︀ꩫ︀်ႈမ︀ႃးတ︀ႃႉ။ လ︀ွင︀်ႈပ︀ေႃလ︀ုꩬ︀င︀်ၵ︀ၢမ︀်းလ︀ူပ︀် 21 လ︀ွင︀်ႈက︀ဝ်ႈတ︀င︀်းမ︀ိူင︀်း ꩭႂ်ႛပ︀ူဝ်းꩬ︀ူတ︀ွင︀်းꩫ︀ႆ︀ႇ တ︀ုၵ︀ိက︀်တ︀ီမ︀ႃးၵ︀ႆ︀ႈꩭႂ်ႛꩫ︀မ︀်။ မ︀ꩫ︀်းယ︀ႃႇꩫ︀ွင︀်ႇꩭၢက︀်ႉꩭဝ်း ဢ︀ꩫ︀်ႈဢ︀မ︀ူးၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ꩬ︀ႅတ︀်ႉꩡ︀ႃယ︀င︀်းလ︀ူင︀်က︀ူဝ်ႇလ︀ိူင︀်ႈꩫ︀မ︀်။ 22 င︀ႆ︀းꩫ︀ႆ︀ႇꩬ︀ီ မ︀ႆ︀ႛ တ︀ူႈꩭလ︀ိုဝ်ဢ︀ူꩫ︀ꩫ︀ႆ︀ႇ ꩬ︀ူမ︀ႆ︀ႛၵ︀ႆ︀ႈꩭႂ်ႛꩬ︀ီ ꩭႂ်ႛပ︀ူဝ်းꩬ︀ူမ︀ႆ︀ႛ ꩬ︀ႂ်ꩭႅင︀်းꩭႂ်ႛꩫ︀ႆ︀ႇ မ︀ꩫ︀်းမ︀ႆ︀ႛ က︀ဝ်ႈပ︀ွႆ︀ꩡ︀ႂ်ႇမ︀ႃးꩫ︀မ︀်။ 23 ꩬ︀ူတ︀င︀်းလ︀ုင︀်မ︀ႆ︀ႛ ပ︀ူဝ်ၸ︀ြႃးပ︀ီꩫ︀်ႈꩡ︀ဝ်ႛꩫ︀ၵ︀ႃ ꩡ︀ဝ်ႛယ︀ေꩬ︀ုၵ︀ရ︀ီတ︀် ဢ︀ဝ်ႈက︀တ︀်ယ︀ီꩫ︀်ႈၵ︀ျမ︀်းꩬ︀ႃင︀ႆ︀း မ︀ႅတ︀်ႉတ︀ႃပ︀ူင︀်ႈꩭႂ်ႛꩬ︀ီ တ︀ၢင︀်းယ︀ုမ︀်ယ︀မ︀်ႈꩬ︀ူ ꩭႂ်ႛဢ︀ဝ်ႈၵ︀ိူင︀်က︀တ︀ႃႉ။ 24 ꩬ︀ူဢ︀ꩫ︀်ႈꩡ︀ဝ်ႛယ︀ေꩬ︀ုၵ︀ရ︀ီတ︀်မ︀ႆ︀ႛ ꩭၢက︀်ႉဢ︀ူမ︀ဝ်ꩬ︀ဝ်းꩫ︀ႆ︀ႇၵ︀ဝ်တ︀င︀်းမ︀ိူင︀်းမ︀ႆ︀ႛ က︀ျေးꩡ︀ူးၸ︀ြႃးပ︀ီꩫ︀်ႈꩡ︀ဝ်ႛ ꩭႂ်ႛယ︀င︀်းက︀တ︀ႃႉ။ |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.