ထဝ်ꩡ︀တ︀်ႉၵ︀ဝ် 26 - Khamti Shan

လ︀ွင︀်ႈပ︀ေႃလ︀ုပ︀ၢင︀်ႈꩫ︀ႃႛꩡ︀ဝ်ႛꩭူဝ်ၵ︀မ︀်းဢ︀က︀ိပ︀်ပ︀မ︀ႆ︀ႛ ꩬ︀ွက︀်ႉက︀ေႛတ︀ွပ︀်

¹ ꩡ︀ဝ်ႛꩭူဝ်ၵ︀မ︀်းဢ︀က︀ိပ︀်ပ︀ယ︀ႃႇ “မ︀ႂ်းꩬ︀ွက︀်ႉꩫ︀ႆ︀ႛယ︀ဝ်ႇ” ꩫ︀ꩬ︀ီ ပ︀ေႃလ︀ုမ︀ႆ︀ႛဝႃႈက︀ီး ပ︀ေႃလ︀ုယ︀ႃႇ မ︀ိုဝ်းယ︀ူက︀်ႉပ︀ျႃးꩬ︀ီ

² “ꩡ︀ဝ်ႛꩭူဝ်ၵ︀မ︀်းတ︀ီၵ︀ႃႛ လ︀ွင︀်ႈဢ︀ꩫ︀်ႈက︀ျူးꩫ︀ႆ︀ႇၵ︀ဝ် က︀ဝ်ႈၵ︀ႃႛမ︀ႆ︀ႛထိုင︀်တ︀ြႃးꩫ︀ႆ︀ႇမ︀ႆ︀ႛ ပ︀ၢင︀်ႈꩫ︀ႃႛၵ︀ိင︀်းတ︀ူဝ်ꩡ︀ဝ်ႛမ︀ႆ︀ႛ က︀ဝ်ႈၵ︀ႃႛꩫ︀ႆ︀ႛꩬ︀ွက︀်ႉတ︀ၢင︀်ꩫ︀ႆ︀ႇꩬ︀ီ ပ︀ေႇꩡ︀ူမ︀်းꩭုမ︀်ယ︀ႂ်တ︀ီၵ︀ႃႛဢ︀ူ။

³ ၵ︀ိင︀်းတ︀ူဝ်ꩡ︀ဝ်ႛယ︀ႃႇ ထုင︀်းက︀ျူးꩫ︀ႆ︀ႇၵ︀ဝ် လ︀ွင︀်ႈဢ︀ꩫ︀်ႈတ︀ူႈၵ︀ႃႛထီင︀်က︀ꩫ︀်ႈꩫ︀ႆ︀ႇၵ︀ဝ်မ︀ႆ︀ႛ တ︀ွင︀်းတ︀ီၵ︀ႃႛဢ︀ူ။ င︀ႆ︀းꩫ︀ႆ︀ႇꩬ︀ီ ဢ︀ꩫ︀်ႈက︀ဝ်ႈၵ︀ႃႛꩬ︀ွက︀်ႉတ︀ၢင︀်ꩫ︀ႆ︀ႇမ︀ႆ︀ႛ ဢ︀ီꩫ︀ူႈꩬ︀ီ ထွမ︀်ꩭႂ်ႛတ︀ီၵ︀ႃႛမ︀ႃးတ︀ႃႉ။

⁴ က︀ဝ်ႈၵ︀ႃႛ လ︀ုက︀်ႉမ︀ိူဝ်ႈꩭူဝ်က︀ူဝ် မ︀ိူဝ်ႈဢ︀ွꩫ︀်ပ︀ုꩫ︀်ႛမ︀ၢꩫ︀်ႛမ︀ိူင︀်းၸ︀ူႛꩡ︀ဝ်ႛမ︀ႆ︀ႛꩫ︀က︀ေႃႇယ︀ႃ ဝီင︀်းယ︀ေရ︀ုꩬ︀လ︀ိမ︀်မ︀ႆ︀ႛꩫ︀က︀ေႃႇယ︀ႃ ꩭလ︀ိုဝ်ဢ︀ူမ︀ႃးꩫ︀ꩫ︀ႆ︀ႇ က︀ျူးꩫ︀ႆ︀ႇၵ︀ဝ်တ︀င︀်းမ︀ိူင︀်းတ︀ွင︀်းတ︀ီၵ︀ႃႛဢ︀ူ။

⁵ က︀ဝ်ႈၵ︀ႃႛမ︀ႆ︀ႛ ၵ︀ဝ်တ︀ွင︀်းမ︀ႃးꩫ︀ႆ︀ႇဢ︀ၢꩫ︀်တ︀ၢꩫ︀်ꩭိုင︀်တ︀ီၵ︀ႃႛယ︀ဝ်ႇ။ က︀ဝ်ႈၵ︀ႃႛ ꩫ︀င︀်ၸ︀ူႛၵ︀ဝ်ႛက︀ုမ︀်ႛၸ︀ႃရ︀ိꩬ︀ႄက︀ူဝ်ႇလ︀ိူင︀်ႈꩫ︀က︀ꩫ︀်ႈ က︀ျမ︀်းꩬ︀ိꩫ︀်မ︀ႆ︀ႛ တ︀င︀်းꩡ︀ႂ်ႈတ︀င︀်းၵ︀ူဝ်းꩡ︀ွမ︀်းထက︀်ꩰမ︀ႃးဢ︀ူꩫ︀ꩫ︀ႆ︀ႇ ၵ︀ဝ်ꩬ︀ၢက︀်ႉꩬ︀ေၵ︀ႂ်ႈၵ︀ၢမ︀်က︀ီးၵ︀ၢမ︀်ꩫ︀ႆ︀ႛတ︀ီၵ︀ႃႛဢ︀ူ။

⁶ က︀ဝ်ႈၵ︀ႃႛမ︀ႆ︀ႛ င︀ႆ︀ႚၵ︀ဝ်ထိုင︀်တ︀ြႃးက︀ꩫ︀်ႈꩫ︀ႆ︀ႇ လ︀ၢႆ︀းပ︀ိူဝ်ႈ က︀တ︀ိဢ︀ꩫ︀်ႈပ︀ူလ︀ီꩫ︀်တ︀ူႈၵ︀ႃႛၵ︀ဝ်မ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛꩭႂ်ႛဝႆ︀ႇꩫ︀ႆ︀ႇမ︀ႆ︀ႛ က︀ဝ်ႈၵ︀ႃႛတ︀ႂ်းထႃႛꩬ︀ီတ︀ီၵ︀ႃႛꩫ︀မ︀်။

⁷ က︀တ︀ိဢ︀မ︀ႂ်းယ︀ႃႇ ဢ︀ꩫ︀်ႈက︀ျူးꩬ︀ိပ︀်ꩬ︀ွင︀်ၸ︀ꩫ︀်းၵ︀ဝ် ၵ︀မ︀်ႈꩰလ︀ႂ်ꩰ ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛပ︀ၢႆ︀ႛဝႆ︀ႈꩬ︀ီ တ︀ႂ်းထႃႛမ︀ႃးꩫ︀ႆ︀ႇတ︀ီၵ︀်ႛꩫ︀မ︀်။ ꩡ︀ဝ်ႛꩭူဝ်ၵ︀မ︀်းတ︀ီၵ︀ႃႛ က︀ွပ︀်ႉပ︀ိူဝ်ႈင︀ႆ︀း တ︀ႂ်းထႃႛꩬ︀ီꩫ︀မ︀် င︀ႆ︀ႚက︀ဝ်ႈၵ︀ႃႛမ︀ႆ︀ႛ ၵ︀ဝ်ထိုင︀်တ︀ြႃးတ︀ီၵ︀ႃႛꩫ︀ႆ︀ႇ။

⁸ ၸ︀ူႛတ︀ၢႆ︀ႈꩫ︀ႆ︀ႇၵ︀ဝ်မ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛဢ︀ဝ်ႈꩫ︀ိပ︀်ပ︀ွက︀်ႉꩭႂ်ႛဢ︀ူꩫ︀ꩫ︀ႆ︀ႇ ꩭလ︀ိုဝ်ꩬ︀ီꩫ︀ႆ︀ က︀ူꩫ︀်းဢ︀ꩫ︀်ႈမ︀ႆ︀ႛယ︀င︀်းꩫ︀ႆ︀ႇၵ︀ဝ် မ︀ဝ်ယ︀ုမ︀်က︀ꩫ︀်ႈꩫ︀ႆ︀ႇ။

⁹ က︀ဝ်ႈၵ︀ႃႛၸ︀ူႛꩡ︀ဝ်ႛတ︀မ︀ိူင︀်းက︀ေႃႇ က︀ူꩫ︀်းဝီင︀်းꩫ︀ႃꩡ︀ရ︀ႅတ︀်ယ︀ေꩬ︀ုမ︀ႆ︀ႛ ဝႃႈꩬ︀ၢꩫ︀်တ︀ၢꩫ︀်း ဝႃႈယ︀ႃႇဢ︀ူꩫ︀ꩬ︀ီ ၵ︀ႂ်ႈꩡ︀ႂ်ႈꩬ︀ီ

¹⁰ ဝီင︀်းယ︀ေရ︀ုꩬ︀လ︀ိမ︀်မ︀ႆ︀ႛ ဢ︀မ︀ူးဢ︀ꩫ︀်ႈꩬ︀ၢꩫ︀်တ︀ၢꩫ︀်းမ︀ꩫ︀်းꩡ︀ဝ်ႛꩫ︀ႆ︀ႇၵ︀ဝ် ꩭီတ︀်မ︀ႃးတ︀ီၵ︀ႃႛဢ︀ူ။ ၸ︀ူႛယ︀ုမ︀်ယ︀မ︀်ႈဢ︀ၢꩫ︀်တ︀ၢꩫ︀်မ︀ႆ︀ႛ က︀ဝ်ႈၵ︀ႃႛ ဢ︀ဝ်ႈဢ︀မ︀ိင︀်းဢ︀ႃꩫ︀ႃယ︀ီတ︀်ႉပ︀ရ︀ေႃးꩭိက︀်ႉလ︀ူင︀်ꩫ︀ႆ︀ႇၵ︀ဝ် ꩬ︀ႅဝ်ႛꩬ︀ီꩬ︀ႂ်ထွင︀်မ︀ႃးတ︀ီၵ︀ႃႛဢ︀ူ။ မ︀ိူဝ်ႈၵ︀ဝ်မ︀ႆ︀ႛꩭႂ်ႛတ︀ၢမ︀်တ︀ၢႆ︀ႈꩫ︀ႆ︀ႇက︀ေႃႇ က︀ဝ်ႈၵ︀ႃႛၸ︀ူႛꩡ︀ဝ်ႛ လ︀ွမ︀်ႈလ︀ွေႛမ︀ႃးတ︀ီၵ︀ႃႛဢ︀ူ။

¹¹ ꩡ︀ွင︀်းꩬ︀ွꩫ︀်တ︀ြႃးꩫ︀ႆ︀ႇၵ︀ဝ်မ︀ႆ︀ႛက︀ေႃႇ ၵ︀ဝ်မ︀ႆ︀ႛက︀ီလ︀ၢႆ︀ပ︀ၢꩫ︀်ႈꩭႂ်ႛတ︀ၢမ︀်ꩬ︀ီ ꩭႂ်ႛပ︀ူဝ်းꩡ︀ဝ်ႛယ︀ေꩬ︀ုမ︀ႆ︀ႛမ︀ဝ်ယ︀ုမ︀်ယ︀မ︀်ႈꩫ︀ႆ︀ႇ ꩬ︀ေႈꩡ︀ႃႉမ︀ႃးတ︀ီၵ︀ႃႛဢ︀ူ။ ၵ︀ဝ်မ︀ႆ︀ႛတ︀ေႃးꩬ︀ႃးꩭႅင︀်းၸ︀ႅဝ်ꩫ︀ႆ︀ႇꩬ︀ီ မ︀ိူင︀်းတ︀ၢင︀်ဢ︀ꩫ︀်ႈꩫ︀ႆ︀ႇၵ︀ဝ်မ︀ႆ︀ႛတ︀မ︀ိူင︀်း က︀ဝ်ႈၵ︀ႃႛက︀ႃꩬ︀ီ ၵ︀ဝ်မ︀ႆ︀ႛꩫ︀ိက︀်ႉꩬ︀ၢက︀်ႉမ︀ႃးတ︀ီၵ︀ႃႛဢ︀ူ။

လ︀ွင︀်ႈပ︀ေႃလ︀ုၵ︀ႆ︀ႈလ︀ွင︀်ႈ ဢ︀ꩫ︀်ႈမ︀ꩫ︀်းပ︀ီꩫ︀်ႈၸ︀ူႛယ︀ုမ︀်ယ︀မ︀်ႈမ︀ႃး

¹² က︀ဝ်ႈၵ︀ႃႛၵ︀ဝ်မ︀ႆ︀ႛꩫ︀ိက︀်ႉꩬ︀ၢက︀်ႉက︀ွတ︀်ꩫ︀ꩬ︀ီ လ︀ုက︀်ႉယ︀ီတ︀်ႉပ︀ရ︀ေႃးꩭိက︀်ႉလ︀ူင︀်ꩫ︀ႆ︀ႇၵ︀ဝ်မ︀ႆ︀ႛ ဢ︀မ︀ိင︀်းဢ︀ႃꩫ︀ႃဢ︀ဝ်ႈꩬ︀ီ ဝီင︀်းတ︀မ︀ႃတ︀ႅတ︀်မ︀ႆ︀ႛက︀ႃမ︀ႃးတ︀ီၵ︀ႃႛဢ︀ူ။

¹³ ꩡ︀ဝ်ႛꩭူဝ်ၵ︀မ︀်းလ︀ူင︀်တ︀ီၵ︀ႃႛ မ︀ိူဝ်ႈင︀ႆ︀းꩬ︀ီတ︀ူႈၵ︀ႃႛက︀ႃꩬ︀ီဢ︀ူꩫ︀ႆ︀ႇ ယ︀ၢꩫ︀်ႈဝꩫ︀်ႈတ︀ီင︀်ႈမ︀ႆ︀ႛ ꩬ︀ၢႆ︀လ︀ႅင︀်းဢ︀ꩫ︀်ႈက︀ၢင︀်ႈဝꩫ︀်းမ︀ႆ︀ႛတ︀မ︀ိူင︀်းလ︀ႅင︀်းꩬ︀ႃꩫ︀ႆ︀ႇ ၵ︀ူင︀်ႇတ︀ူႈၵ︀ႃႛဢ︀ꩫ︀်ႈꩭူမ︀်ႈက︀ႃတ︀ၢင︀်းꩫ︀ႆ︀ႇၵ︀ဝ်မ︀ႆ︀ႛ ꩭုင︀်ႈꩡ︀ၢင︀်းꩰမ︀ႃးတ︀ီၵ︀ႃႛဢ︀ူ။

¹⁴ မ︀ိူဝ်ႈဢ︀မ︀ႂ်းတ︀ူႈၵ︀ႃႛတ︀င︀်းမ︀ိူင︀်း လ︀ူမ︀်ႇက︀ိင︀်ႛက︀ွင︀်ႈက︀ႃတ︀ီၵ︀ႃႛဢ︀ူ။ ယ︀ဝ်ႇက︀ီး “ꩬ︀ေႃလ︀ုꩴ︀း ꩭီတ︀်က︀ꩬ︀င︀်ꩫ︀ႆ︀ မ︀ႂ်းက︀ဝ်ႈမ︀ႆ︀ႛ ꩫ︀ꩫ︀်းပ︀ွက︀်ႉꩫ︀ႆ︀ႇ။ မ︀ႂ်းက︀ဝ်ႈမ︀ႆ︀ႛꩫ︀ꩫ︀်းပ︀ွက︀်ႉက︀ီး မ︀ႂ်းၸ︀ူႛꩡ︀ဝ်ႛꩬ︀ႃး တ︀ီၻုက︀်ႉၵ︀ ꩫ︀ႆ︀ႇ” ꩫ︀ꩬ︀ီ ဢ︀ဝ်ႈၵ︀ၢမ︀်းꩭေပ︀ရ︀ူးဝႃႈꩫ︀ႆ︀ႇမ︀ႆ︀ႛ က︀ဝ်ႈၵ︀ႃႛꩫ︀ႆ︀ႛꩥ︀ိꩫ︀်းတ︀ီၵ︀ႃႛဢ︀ူ။

¹⁵ ꩫ︀ႆ︀ႇမ︀ႆ︀ႛ က︀ဝ်ႈၵ︀ႃႛယ︀ႃႇ “ꩡ︀ဝ်ႛꩴ︀း မ︀ႂ်းꩡ︀ဝ်ႛယ︀ႃႇ ၸ︀ႂ်တ︀ီၵ︀ႃႛꩫ︀ႆ︀” ꩫ︀ꩬ︀ီထၢမ︀်က︀ီး ꩡ︀ဝ်ႛဢ︀မ︀ႂ်းယ︀ႃႇ “က︀ဝ်ႈယ︀ႃႇ ꩡ︀ဝ်ႛယ︀ေꩬ︀ု ဢ︀ꩫ︀်ႈမ︀ႂ်းꩫ︀ိက︀်ႉꩬ︀ၢက︀်ႉꩫ︀ႆ︀ႇꩫ︀မ︀်။

¹⁶ ꩫ︀ႆ︀ႇꩫ︀က︀ေႃႇ လ︀ုက︀်ႉတ︀ႃႉ။ မ︀ႂ်းမ︀ႆ︀ႛ ပ︀ူင︀်ႈဢ︀ၢပ︀်ႉꩭႂ်ႛꩭီတ︀်ဢ︀မ︀ူးက︀ဝ်ႈက︀ွတ︀်ꩫ︀ꩬ︀ီ က︀ဝ်ႈမ︀ႃးမ︀ꩫ︀မ︀်။ ၿျႃၻိက︀်ႉဢ︀ꩫ︀်ႈမ︀ိူဝ်ႈꩫ︀ႆ︀ႇမ︀ႂ်းꩭꩫ︀်ꩫ︀ႆ︀ႇင︀ႆ︀း ဢ︀ꩫ︀်ႈက︀ꩫ︀်ႛလ︀င︀်မ︀ႆ︀ႛက︀ဝ်ႈတ︀ီပ︀ျႃးꩫ︀ႆ︀ႇၵ︀ဝ် မ︀ႂ်းပ︀ိူꩫ︀်ႈမ︀ႆ︀ႛ ဝႃႈꩭီတ︀်ꩬ︀ၢက︀်ႉꩬ︀ေဢ︀ူ။

¹⁷ မ︀ႂ်းမ︀ႆ︀ႛ လ︀ုက︀်ႉဢ︀ီတ︀်ꩬ︀ြေးၵ︀ဝ်မ︀ႆ︀ႛတ︀မ︀ိူင︀်း၊ လ︀ုက︀်ႉမ︀ိုဝ်းဢ︀ꩫ︀်ႈက︀ျူးမ︀ဝ်ꩡ︀ႂ်ႈ ဢ︀ꩫ︀်ႈမ︀ႂ်းမ︀ႆ︀ႛ က︀ဝ်ႈꩭႂ်ႛက︀ႃꩭူဝ်းꩫ︀ႆ︀ႇၵ︀ဝ်မ︀ႆ︀ႛတ︀မ︀ိူင︀်း က︀ဝ်ႈၵ︀ေꩬ︀ေꩭႂ်ႛက︀ွတ︀်။

¹⁸ မ︀ႂ်းယ︀ႃႇ ꩭွေႛတ︀ႃႈက︀ူꩫ︀်းဢ︀ꩫ︀်ႈက︀ျူးမ︀ဝ်ꩡ︀ႂ်ႈꩫ︀ႆ︀ႇၵ︀ဝ်မ︀ႆ︀ႛ ဝႃႈက︀ႃပ︀ုတ︀်ꩭႂ်ႛဢ︀ူ။ ၵ︀ဝ်မ︀ႆ︀ႛ လ︀ုက︀်ႉဢ︀ꩫ︀်ႈꩫ︀ပ︀်ꩬ︀ိင︀်မ︀ႆ︀ႛ ဢ︀ဝ်ႈထိုင︀်ဢ︀ꩫ︀်ႈလ︀ႅင︀်းꩬ︀ီ လ︀ုက︀်ႉက︀ꩫ︀်ႛတ︀ႂ်ႛဢ︀ႃꩫ︀ႃၵ︀ုꩫ︀်ꩬ︀ူင︀်မ︀ႆ︀ႛ ဝႃႈဢ︀ဝ်ႈထိုင︀် က︀ꩫ︀်ႛတ︀ႂ်ႛဢ︀ႃꩫ︀ႃၸ︀ြႃးပ︀ီꩫ︀်ႈꩡ︀ဝ်ႛဢ︀ူ။ ꩭႂ်ႛပ︀ူဝ်းၵ︀ဝ် က︀ဝ်ႈမ︀ႆ︀ႛယ︀ုမ︀်ယ︀မ︀်ႈꩬ︀ီ ၵ︀ဝ်မ︀ႆ︀ႛၸ︀ြႃးပ︀ီꩫ︀်ႈꩡ︀ဝ်ႛဢ︀ပ︀ႅတ︀်ႉပ︀ွႆ︀ꩭႂ်ႛင︀ႆ︀း က︀ုမ︀်ႛက︀ူꩫ︀်းဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛလ︀ိူက︀်ႉဝႆ︀ႇꩫ︀ႆ︀ႇၵ︀ဝ်မ︀ႆ︀ႛ ꩫ︀ႆ︀ႛၵ︀ဝ်ႛꩫ︀ႆ︀ႇ မ︀ႂ်းဝႃႈꩭီတ︀်ဢ︀ူ” ꩫ︀ꩬ︀ီဝႃႈဢ︀ူ။

လ︀ွင︀်ႈပ︀ေႃလ︀ုတ︀ၢင︀်ပ︀ျႃး ဢ︀ꩫ︀်ႈမ︀ꩫ︀်းꩭီတ︀်မ︀ႃးꩫ︀ႆ︀ႇၵ︀ဝ်

¹⁹ ꩡ︀ဝ်ႛꩭူဝ်ၵ︀မ︀်းလ︀ူင︀်တ︀ီၵ︀ႃႛ က︀ဝ်ႈၵ︀ႃႛယ︀ႃႇ ၿျႃၻိက︀်ႉဢ︀ꩫ︀်ႈလ︀ုက︀်ႉၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ မ︀ႃးꩫ︀ႆ︀ႇမ︀ႆ︀ႛ မ︀ဝ်ထွမ︀်မ︀ဝ်ꩫ︀ႆ︀ႛယ︀ႃတ︀ီၵ︀ႃႛက︀ႃꩫ︀မ︀်။

²⁰ င︀ႆ︀းꩬ︀ီ လ︀ုက︀်ႉဝီင︀်းတ︀မ︀ႃတ︀ႅတ︀်ꩫ︀ၵ︀ႃ ဝီင︀်းယ︀ေရ︀ုꩬ︀လ︀ိမ︀်မ︀ႆ︀ႛက︀ူဝ်ꩬ︀ီ က︀ူꩫ︀်းတ︀ိူင︀်းယ︀ုတ︀တ︀င︀်းမ︀ိူင︀်းင︀ႆ︀း ဢ︀ꩫ︀်ႈက︀ျူးမ︀ဝ်ꩡ︀ႂ်ႈꩫ︀ႆ︀ႇၵ︀ဝ်မ︀ႆ︀ႛ “ꩬ︀ူꩡ︀ဝ်ႛꩬ︀ၢင︀်ဝွေꩬ︀ီ ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛဝႃႈတ︀ၢဝ်ႈပ︀ွက︀်ႉမ︀ႃးဢ︀ူ။ ꩫ︀င︀်ဢ︀ꩫ︀်ႈꩬ︀ၢင︀်ဝွေတ︀ေႇတ︀ေႇꩫ︀က︀ꩫ︀်ႈက︀ေႃႇ ဝႃႈက︀မ︀်ႈဝႃႈက︀ႅင︀်းက︀ꩫ︀်ႈဢ︀ူ” ꩫ︀ꩬ︀ီ က︀ဝ်ႈၵ︀ႃႛꩭူဝ်းမ︀ႃးတ︀ီၵ︀ႃႛဢ︀ူ။

²¹ က︀ွပ︀်ႉပ︀ိူဝ်ႈꩫ︀ႆ︀ႇꩬ︀ီ က︀ျူးꩫ︀ႆ︀ႇၵ︀ဝ်ယ︀ႃႇ က︀ဝ်ႈၵ︀ႃႛမ︀ႆ︀ႛ ꩡ︀ွင︀်းၿိက︀်ႉမ︀ၢꩫ︀်မ︀ႆ︀ႛꩬ︀ႅဝ်ႛꩬ︀ီ ꩬ︀ၢင︀်ဢ︀ဝ်ႈတ︀ၢႆ︀ႈမ︀ႃးတ︀ီၵ︀ႃႛဢ︀ူ။

^22-23 ꩫ︀ႆ︀ႇꩫ︀က︀ေႃႇ က︀ဝ်ႈၵ︀ႃႛမ︀ႆ︀ႛ ဢ︀ဝ်ႈထိုင︀်ဝꩫ︀်းꩫ︀ႆ︀ႇ ၸ︀ြႃးပ︀ီꩫ︀်ႈꩡ︀ဝ်ႛက︀ုမ︀်ႇꩭႂ်ႛꩬ︀ီ င︀ႆ︀ႚပ︀ၢင︀်ႈꩫ︀ႃႛꩬ︀ူꩡ︀ဝ်ႛမ︀ႆ︀ႛꩬ︀ဝ်းꩬ︀ီ တ︀င︀်းမ︀ိူင︀်းမ︀ႆ︀ႛ ꩫ︀ႆ︀ႛꩭီတ︀်ꩬ︀ၢက︀်ႉꩬ︀ေꩬ︀ီဢ︀ူတ︀ီၵ︀ႃႛꩫ︀မ︀်။ ဢ︀ꩫ︀်ႈက︀ဝ်ႈၵ︀ႃႛꩭီတ︀်ꩬ︀ၢက︀်ႉꩬ︀ေꩫ︀ႆ︀ႇယ︀ႃႇ လ︀ွင︀်ႈဢ︀ꩫ︀်ႈꩡ︀ဝ်ႛမ︀ေꩬ︀ိယ︀ဝႃႈၵ︀ၢမ︀်တ︀ၢႆ︀ႈꩫ︀ႆ︀ႇလ︀ိူင︀်ႈ၊ ယ︀ဝ်ႇက︀ီးက︀ွပ︀်ႉပ︀ိူဝ်ႈမ︀ꩫ︀်းꩡ︀ဝ်ႛ ပ︀ီꩫ︀်ႈၸ︀ူႛꩫ︀ိပ︀်ပ︀ွက︀်ႉဢ︀ွꩫ︀်ႈတ︀ၢင︀်းꩫ︀ႆ︀ႇꩬ︀ီ က︀ျူးꩫ︀ႆ︀ႇၵ︀ဝ်င︀ႆ︀း ဢ︀ꩫ︀်ႈက︀ျူးမ︀ဝ်ꩡ︀ႂ်ႈꩫ︀ႆ︀ႇၵ︀ဝ်မ︀ႆ︀ႛ မ︀ꩫ︀်းꩡ︀ဝ်ႛ တ︀ီဢ︀ဝ်ႈမ︀ႃးဢ︀ꩫ︀်ႈလ︀ႅင︀်းꩫ︀ႆ︀ႇꩫ︀မ︀်။ ဢ︀ꩫ︀်ႈꩫ︀ႆ︀ႇယ︀ႃႇ ꩫ︀င︀်ဢ︀ꩫ︀်ႈမ︀ေႃꩬ︀ေင︀ႆ︀း ပ︀ရ︀ေႃးၸ︀ႅတ︀်ႉၵ︀ဝ် ꩭူဝ်းဝႆ︀ႇꩫ︀ႆ︀ႇꩫ︀က︀ꩫ︀်ႈထက︀်ꩰတ︀ီၵ︀ႃႛꩫ︀မ︀်” ꩫ︀ꩬ︀ီပ︀ေႃလ︀ုက︀ေႛꩬ︀ွက︀်ႉဢ︀ူ။

²⁴ မ︀ိူဝ်ႈင︀ႆ︀းꩬ︀ွက︀်ႉꩬ︀ီဢ︀ူꩫ︀ႆ︀ႇ ꩡ︀ဝ်ႛက︀ႅမ︀်ႈဝွင︀်ႇၸ︀ေတ︀ုယ︀ႃႇ “ꩭိူဝ်း ပ︀ေႃလ︀ု မ︀ႂ်းမ︀ႃႛယ︀ဝ်ႇ။ မ︀ႂ်းꩡ︀ၢင︀်ႈပ︀ူꩫ︀်ႇၸ︀ႅဝ်ꩬ︀ီ က︀ႃက︀ꩫ︀်ႛဢ︀ꩫ︀်ႈမ︀ႃႛယ︀ဝ်ႇ” ꩫ︀ꩬ︀ီ ဢ︀ိဝ်ဢ︀ူ။

²⁵ င︀ႆ︀းက︀ီးပ︀ေႃလ︀ုယ︀ႃႇ “ꩡ︀ဝ်ႛက︀ႅမ︀်ႈဝွင︀်ႇတ︀ီၵ︀ႃႛ က︀ဝ်ႈၵ︀ႃႛꩵ︀ႈမ︀ႃႛတ︀ီၵ︀ႃႛ။ ဢ︀ꩫ︀်ႈꩫ︀ႆ︀ႇဢ︀ꩫ︀်ႈ က︀ဝ်ႈၵ︀ႃႛꩭူဝ်ꩡ︀ႂ်ႈꩡ︀ုꩫ︀်ႈꩰꩡ︀ၢင︀်ꩰꩬ︀ီ ၵ︀ိင︀်းတ︀ူဝ်ꩡ︀ဝ်ႛမ︀ႆ︀ႛ မ︀ၢꩫ︀်ꩰတ︀ႅင︀်ꩰꩬ︀ွက︀်ႉတ︀ီၵ︀ႃႛꩫ︀မ︀်။

²⁶ ꩡ︀ဝ်ႛꩭူဝ်ၵ︀မ︀်းတ︀ီၵ︀ႃႛ မ︀ႂ်းꩡ︀ဝ်ႛလ︀ွင︀်ႈꩫ︀ႆ︀ႇတ︀ွင︀်းꩫ︀ႆ︀ႇꩬ︀ီ က︀ဝ်ႈၵ︀ႃႛမ︀ဝ်က︀ူဝ်ႈမ︀ဝ်ꩬ︀ွင︀် ꩬ︀ွက︀်ႉတ︀ၢင︀်တ︀ီၵ︀ႃႛꩫ︀မ︀်။ လ︀ွင︀်ႈဢ︀မ︀ႂ်းၵ︀ဝ်ယ︀ႃႇ ꩡ︀ွက︀်ႉꩰꩡ︀ီင︀်ꩰမ︀ႆ︀ႛ ပ︀ီꩫ︀်ႈမ︀ႃးꩵ︀ႈꩡ︀ႂ်ႈတ︀ီၵ︀ႃႛ။ လ︀ွင︀်ႈဢ︀မ︀ႂ်းၵ︀ဝ်တ︀င︀်းမ︀ိူင︀်း မ︀ႂ်းꩡ︀ဝ်ႛတ︀ွင︀်းယ︀ဝ်ႇꩰꩫ︀ꩫ︀ႆ︀ႇ က︀ဝ်ႈၵ︀ႃႛယ︀ုမ︀်တ︀ီၵ︀ႃႛဢ︀ူ။

²⁷ ꩡ︀ဝ်ႛꩭူဝ်ၵ︀မ︀်းတ︀ီၵ︀ႃႛ မ︀ႂ်းꩡ︀ဝ်ႛက︀ျမ︀်းပ︀ရ︀ေႃးၸ︀ႅတ︀်ႉꩫ︀ႆ︀ႇၵ︀ဝ်မ︀ႆ︀ႛ ယ︀ုမ︀်တ︀ီၵ︀ႃႛဢ︀ေႃး။ မ︀ႂ်းꩡ︀ဝ်ႛယ︀ုမ︀်ဢ︀ူꩫ︀ꩫ︀ႆ︀ႇ က︀ဝ်ႈၵ︀ႃႛတ︀ွင︀်းတ︀ီၵ︀ႃႛဢ︀ူ” ꩫ︀ꩬ︀ီꩬ︀ွက︀်ႉဢ︀ူ။

²⁸ ꩫ︀ႆ︀ႇမ︀ႆ︀ႛꩡ︀ဝ်ႛꩭူဝ်ၵ︀မ︀်းဢ︀က︀ိပ︀်ပ︀ယ︀ႃႇ “ဢ︀ႃးꩡ︀ႆ︀ၢႇ မ︀ႂ်းၵ︀ꩫ︀်တ︀ႂ်းꩭပ︀်ႉဢ︀ွꩫ︀်လ︀ိူင︀်ႈꩫ︀ႆ︀ႇမ︀ႆ︀ႛꩫ︀ၢႆ︀ႈ က︀ဝ်ႈမ︀ႆ︀ႛဢ︀ဝ်ႈပ︀ီꩫ︀်ႈၵ︀ရ︀ီတ︀်ယ︀ၢꩫ︀်ꩫ︀ႆ︀ႛဢ︀ူꩫ︀က︀ျႃး” ꩫ︀ဝꩫ︀်ႇ။

²⁹ ပ︀ေႃလ︀ုယ︀ႃႇ “ဢ︀ꩫ︀်ႈꩭိုင︀်မ︀ဝ်ꩭိုင︀်ꩫ︀ႆ︀ႇ ꩵ︀ႈဢ︀ၵ︀ႅက︀်ႉတ︀ီၵ︀ႃႛ။ ꩡ︀ဝ်ႛꩭူဝ်ၵ︀မ︀်းတ︀မ︀ိူင︀်း က︀ူꩫ︀်းဢ︀ꩫ︀်ႈမ︀ိူဝ်ႈꩫ︀ႆ︀ႇ မ︀ႆ︀ႛထွမ︀်ꩫ︀ႆ︀ႇၵ︀ဝ်တ︀င︀်းမ︀ိူင︀်း ꩫ︀င︀်က︀ဝ်ႈၵ︀ႃႛꩫ︀က︀ꩫ︀်ႈ ꩭႂ်ႛပ︀ူဝ်းꩡ︀ဝ်ႛယ︀ေꩬ︀ုမ︀ႆ︀ႛယ︀ုမ︀်ယ︀မ︀်ႈမ︀ႃးꩫ︀ႆ︀ႇ က︀ဝ်ႈၵ︀ႃႛၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ယ︀ွꩫ︀်းꩬ︀ူးတ︀ီၵ︀ႃႛဢ︀ူ။ ꩫ︀ႆ︀ႇꩫ︀က︀ေႃႇ ꩫ︀င︀်က︀ဝ်ႈၵ︀ႃႛꩫ︀က︀ꩫ︀်ႈ ꩬ︀ႆ︀ၢလ︀ီက︀်ယ︀ႃႇ ꩵ︀ႈၵ︀ႂ်ႈꩭႂ်ႛꩫ︀ႆ︀ႛၸ︀ုက︀်က︀ꩫ︀်ႈတ︀ီၵ︀ႃႛ” ꩫ︀ꩬ︀ီꩬ︀ွက︀်ႉဢ︀ူ။

³⁰ ꩫ︀ႆ︀ႇမ︀ႆ︀ႛ ꩡ︀ဝ်ႛꩭူဝ်ၵ︀မ︀်းတ︀မ︀ိူင︀်း ꩡ︀ဝ်ႛက︀ႅမ︀်ႈဝွင︀်ႇꩫ︀ၵ︀ႃ ꩫ︀ၢင︀်းၻေဝီၿေရ︀ꩫ︀ိတ︀မ︀ိူင︀်း ၸ︀ူႛလ︀ွမ︀်ႇၸ︀ူႛလ︀ၢမ︀်ꩫ︀ႆ︀ႇၵ︀ဝ်တ︀မ︀ိူင︀်း လ︀ုက︀်ႉက︀ꩫ︀်ႈဢ︀ူ။

³¹ ၵ︀ဝ်လ︀ုက︀်ႉဢ︀မ︀ႂ်းမ︀ႆ︀ႛ ဢ︀ွက︀်က︀ႃယ︀ဝ်ႇက︀ီး “က︀ူဝ်ႇꩫ︀ႆ︀ႇမ︀ႆ︀ႛ ဢ︀ပ︀ႅတ︀်ႉဢ︀ꩫ︀်ႈဝႃႈၵ︀ၢမ︀်တ︀ၢႆ︀ႈ၊ ဢ︀ꩫ︀်ႈဝႃႈတ︀ူက︀်ထွင︀် ဢ︀ꩫ︀်ႈလ︀ိူင︀်ႈꩫ︀ၢႆ︀ႈက︀ေႃႇꩵ︀ႈယ︀င︀်း” ꩫ︀ꩬ︀ီ ၵ︀ဝ်ၸ︀ူႛꩡ︀ဝ်ႛꩫ︀ၢႆ︀ႈဝႃႈက︀ꩫ︀်ႈဢ︀ူ။

³² ꩡ︀ဝ်ႛꩭူဝ်ၵ︀မ︀်းဢ︀က︀ိပ︀်ပ︀က︀ေႃႇ “ꩬ︀င︀်ဝႃႈမ︀ꩫ︀်းၸ︀ူႛꩡ︀ဝ်ႛꩡ︀ဝ်ႛꩭူဝ်ꩬ︀ႅင︀်မ︀ႆ︀ႛ မ︀ဝ်ၵ︀ႅꩫ︀်းဝွꩫ︀်းက︀ီး မ︀ꩫ︀်းမ︀ႆ︀ႛပ︀ွႆ︀ꩭႂ်ႛꩫ︀ႆ︀ႛဢ︀ူ” ꩫ︀ꩬ︀ီꩡ︀ဝ်ႛက︀ႅမ︀်ႈဝွင︀်ႇၸ︀ေတ︀ုမ︀ႆ︀ႛဝႃႈဢ︀ူ။