က︀ေႃရ︀ိꩫ︀်တ︀ု ႒ 3 - Khamti Shan

¹ ဝႃႈင︀ႆ︀းꩬ︀ီ တ︀ူႈၸ︀ူႛꩡ︀ဝ်ႛမ︀ႆ︀ႛၸ︀ူႛꩡ︀ဝ်ႛ ယ︀ူဝ်းယ︀ွင︀်ႛꩫ︀က︀ဝ်ꩵ︀ႈꩡ︀ႂ်ႈ။ လ︀ိက︀်ႉက︀မ︀်ႇထွက︀်ႉ ꩭၢင︀်းပ︀ျႃးꩬ︀ူက︀ေႃႇတ︀ူႈꩵ︀ႈꩭၢင︀်ႇ။ လ︀ိက︀်ႉဢ︀ꩫ︀်ႈꩬ︀ူက︀မ︀်ႇထွက︀်ႉꩭႂ်ႛက︀ေႃႇ ꩵ︀ႈꩭၢင︀်ႇပ︀ိူင︀်ႈလ︀ူင︀်။

² ꩬ︀ူၸ︀ူႛꩡ︀ဝ်ႛꩬ︀င︀် လ︀ိက︀်ႉက︀မ︀်ႇထွက︀်ႉတ︀ူႈꩫ︀က︀ꩫ︀်ႈꩫ︀မ︀်။ ꩬ︀ူယ︀ႃႇလ︀ိက︀်ႉဢ︀ꩫ︀်ႈꩫ︀ႂ်းꩡ︀ႂ်ႈတ︀ူႈမ︀ႆ︀ႛတ︀ႅမ︀်ႛဝႆ︀ႇ ဢ︀ꩫ︀်ႈက︀ူꩫ︀်းတ︀င︀်းမ︀ိူင︀်းလ︀ႅမ︀်းꩬ︀ီ ဢ︀မ︀ူးတ︀ူႈၵ︀ႂ်ႈလ︀ႂ်ႈꩫ︀ီႈꩫ︀ꩫ︀ႆ︀ႇ တ︀ွင︀်းꩫ︀ႆ︀ႛꩫ︀ႆ︀ႇꩫ︀မ︀်။

³ ꩬ︀ူယ︀ႃႇ လ︀ိက︀်ႉဢ︀ꩫ︀်ႈꩡ︀ဝ်ႛၵ︀ရ︀ီတ︀် ဢ︀ဝ်ႈဢ︀မ︀ူးတ︀ူႈတ︀ႅမ︀်ႛဝႆ︀ႇꩫ︀မ︀် ꩫ︀ꩫ︀ႆ︀ႇꩡ︀ုꩫ︀်ႈꩬ︀ၢက︀်ꩰꩫ︀မ︀်။ လ︀ိက︀်ႉဢ︀မ︀ႂ်းယ︀ႃႇ ဢ︀ꩫ︀်ႈဢ︀ဝ်ႈမ︀ိုက︀်ႉတ︀ႅမ︀်ႛဝႆ︀ႇမ︀ဝ်ꩡ︀ႂ်ႈꩬ︀ီ ဢ︀ꩫ︀်ႈဢ︀ဝ်ႈၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛ ဢ︀ꩫ︀်ႈဢ︀ꩬ︀ၢက︀်ႉꩫ︀ိပ︀်တ︀ႅမ︀်ႛဝႆ︀ႇ၊ ဢ︀ꩫ︀်ႈၵ︀ႅပ︀်ꩭိꩫ︀်မ︀ႆ︀ႛ တ︀ႅမ︀်ႛဝႆ︀ႇမ︀ဝ်ꩡ︀ႂ်ႈꩬ︀ီ ဢ︀ꩫ︀်ႈꩭူဝ်ꩡ︀ႂ်ႈက︀ူꩫ︀်းမ︀ႆ︀ႛ တ︀ႅမ︀်ႛဝႆ︀ႇꩫ︀မ︀်။

⁴ တ︀ူႈဝႃႈင︀ႆ︀းꩫ︀ႆ︀ႇယ︀ႃႇ ပ︀ၢင︀်ႈꩫ︀ႃႛၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ဢ︀ဝ်ႈတ︀ၢင︀်းꩡ︀ဝ်ႛၵ︀ရ︀ီတ︀်ꩬ︀ီ တ︀မ︀်းꩡ︀ႂ်ႈꩫ︀ီႈꩫ︀ီႈꩬ︀ီဝႃႈꩫ︀မ︀်။

⁵ ဢ︀မ︀ူးꩫ︀ႆ︀ႇယ︀ႃႇ ဢ︀ꩫ︀်ႈတ︀ူႈၸ︀ူႛꩡ︀ဝ်ႛပ︀ီꩫ︀်ႈပ︀ေႇꩬ︀ီ ꩭီတ︀်ꩵ︀ႈꩡ︀ႂ်ႈ။ ဢ︀ꩫ︀်ႈတ︀ူႈꩭီတ︀်မ︀ႃးꩫ︀ႆ︀ႇၵ︀ဝ်တ︀င︀်းမ︀ိူင︀်း ဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛ ꩡ︀ွႆ︀ႈꩭႂ်ႛꩬ︀ီ ꩭီတ︀်ပ︀ီꩫ︀်ႈမ︀ႃးꩫ︀ႆ︀ၢႈꩫ︀မ︀်။

⁶ မ︀ꩫ︀်းꩡ︀ဝ်ႛꩫ︀မ︀် တ︀ူႈမ︀ႆ︀ႛတ︀ꩫ︀်းၵ︀ူဝ်းꩭႂ်ႛꩬ︀ီ ꩭႂ်ႛထၢမ︀်းဢ︀မ︀ူး ၵ︀ၢမ︀်းၵ︀တ︀်ႉမ︀ႂ်ꩫ︀ႆ︀ႇ။ ၵ︀ၢမ︀်းၵ︀တ︀်ႉꩫ︀ႆ︀ႇယ︀ႃႇ ꩬ︀ိꩫ︀်ဢ︀ꩫ︀်ႈဢ︀ဝ်ႈလ︀ိက︀်ႉတ︀ႅမ︀်ႛꩭႂ်ႛꩵ︀ႈꩡ︀ႂ်ႈ။ တ︀ြႃးဢ︀ꩫ︀်ႈ ဢ︀ဝ်ႈၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛ ꩭဝ်းမ︀ႆ︀ႛꩭႂ်ႛꩫ︀မ︀်။ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ꩬ︀ိꩫ︀်ဢ︀ꩫ︀်ႈဢ︀ဝ်ႈလ︀ိက︀်ႉတ︀ႅမ︀်ႛꩭႂ်ႛꩫ︀ႆ︀ႇယ︀ႃႇ ꩭဝ်းမ︀ႆ︀ႛတ︀ၢင︀်းတ︀ႆ︀ၢႈꩭႂ်ႛꩬ︀ီ ၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ ꩭဝ်းမ︀ႆ︀ႛဢ︀ꩬ︀ၢက︀်ႉꩭႂ်ႛဢ︀ူ။

မ︀ူꩫ︀်ႈၸ︀ုင︀်းလ︀ိက︀်ႉၵ︀တ︀်ႉမ︀ႂ်

⁷ မ︀ိူဝ်ႈꩫ︀ꩫ︀်ႇ မ︀ိူဝ်ႈၸ︀ြႃးပ︀ီꩫ︀်ႈꩡ︀ဝ်ႛ ၵ︀ႅပ︀်ꩭိꩫ︀်မ︀ႆ︀ႛ ꩬ︀ိꩫ︀်တ︀ႅမ︀်ႛꩭႂ်ႛꩫ︀ႆ︀ႇ ꩫ︀ႃႛမ︀ေႃꩬ︀ေမ︀ႆ︀ႛ မ︀ူꩫ︀်ႈင︀ဝ်းၸ︀ြႃးပ︀ီꩫ︀်ႈꩡ︀ဝ်ႛ ꩭုင︀်ႈတ︀ွင︀်မ︀ႃးဢ︀ူ။ င︀ဝ်းဢ︀ꩫ︀်ႈꩫ︀ႃႛမ︀ေႃꩬ︀ေမ︀ႆ︀ႛ ꩭုင︀်ႈတ︀ွင︀်ꩫ︀ႆ︀ႇ လ︀ွႆ︀းလ︀ွႆ︀းꩭႆ︀ၢက︀ႃꩫ︀က︀ေႃႇ ဢ︀ီတ︀်ꩬ︀ြေးၵ︀ဝ်ယ︀ႃႇ မ︀ေႃꩬ︀ေမ︀ႆ︀ႛ ယ︀ိုဝ်ႈꩫ︀ူႈ ꩵ︀ႈပ︀ီꩫ︀်ႈမ︀ႃး။ င︀ႆ︀းꩫ︀ႆ︀ႇꩬ︀ီ ꩬ︀ိꩫ︀်ဢ︀ꩫ︀်ႈဢ︀ꩬ︀ၢက︀်ႉက︀ူꩫ︀်းမ︀ႆ︀ႛ ဢ︀ဝ်ႈတ︀ႆ︀ၢႈꩫ︀ႆ︀ၢႈက︀ေႃႇ ၵ︀ႆ︀ႇလ︀ိူင︀်ႈမ︀ူꩫ︀်ႈင︀ဝ်းယ︀င︀်းမ︀ႃးက︀ီး

⁸ မ︀ူꩫ︀်ႈင︀ဝ်းၵ︀ၢမ︀်းၵ︀တ︀်ႉမ︀ႂ်ဢ︀ꩫ︀်ႈ ဢ︀ဝ်ႈၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛꩭႂ်ႛꩫ︀ႆ︀ႇယ︀ႃႇ ၵ︀ႆ︀ႇမ︀ဝ်က︀ႃး တ︀ီတ︀ီမ︀်ႈက︀ုမ︀်မ︀ဝ်ပ︀ိတ︀်ႉꩫ︀မ︀်။

⁹ ၵ︀ၢမ︀်းၵ︀တ︀်ႉက︀ဝ်ဢ︀ꩫ︀်ႈက︀ူꩫ︀်းꩭဝ်းမ︀ႆ︀ႛ ပ︀ူင︀်ႈတ︀ၢမ︀်ဢ︀ပ︀ႅတ︀်ႉꩫ︀ႆ︀ႇ ၵ︀ႆ︀ႇလ︀ိူင︀်ႈမ︀ူꩫ︀်ႈင︀ဝ်းယ︀င︀်းက︀ီး ၵ︀ၢမ︀်းၵ︀တ︀်ႉမ︀ႂ်ဢ︀ꩫ︀်ႈ ပ︀ၢင︀်ႈꩫ︀ႃႛၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ က︀ူꩫ︀်းꩭဝ်းမ︀ႆ︀ႛ ဢ︀ဝ်ႈꩬ︀ိုဝ်ႈတ︀ူဝ်ꩭႂ်ႛꩫ︀ႆ︀ႇယ︀ႃႇ ၵ︀ႆ︀ႇမ︀ဝ်က︀ႃး မ︀ူꩫ︀်ႈၸ︀ုင︀်းတ︀ီတ︀ီမ︀်ႈက︀ုမ︀်ꩫ︀မ︀်။

¹⁰ င︀ႆ︀ႚယ︀ႃႇ ၵ︀ၢမ︀်းၵ︀တ︀်ႉမ︀ႂ်ꩫ︀ႆ︀ႇ မ︀ူꩫ︀်ႈင︀ဝ်းယ︀င︀်းꩬ︀ႃꩫ︀ႆ︀ႇꩬ︀ီ ၵ︀ၢမ︀်းၵ︀တ︀်ႉက︀ဝ်ယ︀ႃႇ မ︀ူꩫ︀်ႈင︀ဝ်းꩭႆ︀ၢꩫ︀ႆ︀ၢႈက︀ႃယ︀ဝ်ႇ။

¹¹ ဢ︀ꩫ︀်ႈက︀ိုမ︀်ႇလ︀ိူင︀်ႈꩫ︀ႆ︀ၢႈ ꩭႆ︀ၢꩫ︀ႆ︀ၢႈက︀ႃꩫ︀ႆ︀ႇ မ︀ူꩫ︀်ႈင︀ဝ်းယ︀င︀်းက︀ီး ဢ︀ꩫ︀်ႈထႃဝရ︀ယ︀င︀်းဢ︀ူꩫ︀ႆ︀ႇ ၵ︀ႆ︀ႇမ︀ဝ်က︀ႃးမ︀ူꩫ︀်ႈၸ︀ုင︀်းတ︀ီယ︀ႂ်ꩫ︀မ︀်။

¹² တ︀ူႈယ︀ႃႇ ꩫ︀င︀်ꩫ︀ႆ︀ႇꩫ︀က︀ꩫ︀်ႈ ယ︀ုမ︀်ယ︀မ︀်ႈတ︀ႂ်းထႃႛꩫ︀ႆ︀ႇꩬ︀ီ မ︀ဝ်က︀ူဝ်ႈမ︀ဝ်ꩬ︀ွင︀် ဢ︀ူꩬ︀ိုဝ်ႈꩰꩫ︀မ︀်။

¹³ ꩭဝ်းယ︀ႃႇ ꩫ︀င︀်မ︀ေႃꩬ︀ေꩫ︀က︀ꩫ︀်ႈ ဢ︀ꩫ︀်ႈဝႃႈတ︀ွပ︀်ႉꩫ︀ႃႛꩵ︀ႈယ︀င︀်း။ မ︀ꩫ︀်းယ︀ႃႇ မ︀ူꩫ︀်ႈင︀ဝ်းဢ︀ꩫ︀်ႈꩫ︀ႃႛမ︀ꩫ︀်းမ︀ႆ︀ႛတ︀ွင︀်ဢ︀မ︀ႂ်း လ︀ွႆ︀းလ︀ွႆ︀းꩭႆ︀ၢက︀ႃꩫ︀ႆ︀ႇ မ︀ႆ︀ႛ ꩭႂ်ႛပ︀ူဝ်း ဢ︀ီတ︀်ꩬ︀ြေးၵ︀ဝ်မ︀ဝ်ꩭꩫ︀်ꩫ︀ႆ︀ႇ တ︀ွပ︀်ႉꩫ︀ႃႛမ︀ႃးဢ︀ူ။

¹⁴ တ︀ေႇတ︀ေႇက︀ေႃႇ ꩭူဝ်ꩡ︀ႂ်ႈၵ︀ဝ်ယ︀ႃႇ တ︀ꩫ︀်ႈမ︀ႃးꩫ︀မ︀်။ တ︀ူက︀်ꩡ︀ိူမ︀်ႈင︀ႆ︀ႚက︀ေႃႇ ꩭူဝ်ꩡ︀ႂ်ႈၵ︀ဝ်မ︀ႆ︀ႛတ︀ွပ︀်ႉဝႆ︀ႇꩫ︀ႆ︀ႇꩬ︀ီ ၵ︀ဝ်ဢ︀ၢꩫ︀်ၵ︀ၢမ︀်းၵ︀တ︀်ႉက︀ဝ်ꩫ︀က︀ေႃႇ ꩵ︀ႈပ︀ွင︀်ꩡ︀ႂ်ႈ။ က︀ꩫ︀်ႛꩫ︀ႂ်းꩡ︀ဝ်ႛယ︀ေꩬ︀ုၵ︀ရ︀ီတ︀်မ︀ႆ︀ႛ ဢ︀ူက︀ီးꩫ︀ႆ︀ၢႈꩬ︀ိုင︀် ဢ︀ꩫ︀်ႈꩡ︀ႂ်ႈၵ︀ဝ်မ︀ႆ︀ႛ တ︀ွပ︀်ႉဝႆ︀ႇဢ︀မ︀ႂ်းမ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛ လ︀ွꩫ︀်ႛꩭႂ်ႛꩬ︀ီ ပ︀ႆ︀ၢႈꩭၢင︀်မ︀ႆ︀ႛ ၵ︀ဝ်တ︀ီပ︀ွင︀်ꩡ︀ႂ်ႈက︀ႃꩫ︀မ︀်။

¹⁵ တ︀ူဝ်ထိုင︀်ဝꩫ︀်းꩫ︀ႆ︀ႇက︀ေႃႇ က︀ျမ︀်းꩬ︀ိꩫ︀်မ︀ေႃꩬ︀ေမ︀ႆ︀ႛ ၵ︀ဝ်မ︀ိူဝ်ႈလ︀ႂ်ႈဢ︀ၢꩫ︀်က︀ေႃႇ ꩭူဝ်ꩡ︀ႂ်ႈၵ︀ဝ်မ︀ႆ︀ႛ တ︀ွပ︀်ႉဝႆ︀ႇဢ︀ူꩫ︀မ︀်။

¹⁶ ꩫ︀ႆ︀ႇꩫ︀က︀ေႃႇ ဢ︀ꩫ︀်ႈတ︀ွပ︀်ႉꩫ︀ႃႛဢ︀မ︀ႂ်း လ︀ွꩫ︀်ႛꩫ︀ႆ︀ႛဢ︀ူ။ ၸ︀ႂ်ꩫ︀က︀ေႃႇ ꩡ︀ဝ်ႛမ︀ႆ︀ႛ ဝိꩫ︀်ꩫ︀ူႈက︀ီး ဢ︀ꩫ︀်ႈက︀ူဝ်ႇဢ︀မ︀ႂ်းမ︀ႆ︀ႛ တ︀ွပ︀်ႉဝႆ︀ႇꩫ︀ႆ︀ႇလ︀ွꩫ︀်ႛꩭႆ︀ၢက︀ႃဢ︀ူ။

¹⁷ ꩫ︀ႆ︀ႇꩬ︀ေႇမ︀ဝ်က︀ႃး ꩡ︀ဝ်ႛꩫ︀ၵ︀ႃ ၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ ꩬ︀ူလ︀ိဝ်ႈꩫ︀ႆ︀ၢႈꩫ︀ႆ︀ႇꩬ︀ီ တ︀ီႈဢ︀ꩫ︀်ႈၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛယ︀င︀်းမ︀ႆ︀ႛ တ︀ၢင︀်းလ︀ွတ︀်ႉယ︀င︀်းဢ︀ူ။

¹⁸ င︀ႆ︀းꩫ︀ႆ︀ႇꩬ︀ီ ꩭဝ်းမ︀ႆ︀ႛယ︀ႃႇ ဢ︀ꩫ︀်ႈတ︀ွပ︀်ႉဝႆ︀ႇဢ︀မ︀ႂ်းꩵ︀ႈယ︀င︀်းယ︀ဝ်ႇ။ မ︀ူꩫ︀်ႈင︀ဝ်းꩡ︀ဝ်ႛထႃဝရ︀ၸ︀ြႃးꩬ︀ိုင︀် ꩭဝ်းမ︀ႆ︀ႛတ︀ွင︀်ဢ︀ူꩫ︀မ︀်။ င︀ႆ︀းꩫ︀ႆ︀ႇꩬ︀ီ ꩡ︀ဝ်ႛ ၸ︀ူႛပ︀ီꩫ︀်ႈၵ︀ွꩫ︀်မ︀ꩫ︀်းꩡ︀ဝ်ႛယ︀ႃႇ ꩭႂ်ႛပ︀ူဝ်းꩭဝ်း ꩫ︀င︀်မ︀ꩫ︀်းꩡ︀ဝ်ႛꩫ︀က︀ꩫ︀်ႈပ︀ီꩫ︀်ႈမ︀ႃးꩫ︀ႆ︀ႇ တ︀ၢင︀်းက︀ႅင︀်းꩭဝ်းမ︀ႆ︀ႛ ဢ︀ဝ်ႈလ︀ႆ︀ၢႈမ︀ႃးꩭႂ်ႛဢ︀ူမ︀ဝ်ꩬ︀ဝ်းꩫ︀မ︀်။