SEPHANAÏAH 3 - KA BAIBL

Ka pop jong ka Jerusalem bad ka jingpynim U Blei

¹ Kordit ïa kata kaba kiat bad kaba tngit, ïa kata ka nongbah kaba banbeiñ!

² Kam shym kohnguh ïa kata ka jingsawa; kam shym pdiang ïa ka jingsneng; kam shym shaniah ha U Trai; kam shym pynjan ha U Blei jong ka.

³ Ki syiem jong ka hapoh jong ka ki long ki sing kiba kyrhuh; ki nongbishar jong ka ki long ki suri mynmiet; kim pynsah ei ei haduh lashai.

⁴ Ki nongïathuhlypa jong ka ki long ki briew kiba sting bad kiba shetkylla; ki lyngdoh jong ka ki la leh sang ïa ka jaka kyntang, ki la leh jubor ïa ka hukum.

⁵ U Trai hapdeng jong ka u long u bahok; un ym leh ïa ka jingbymhok; man ka step u pynmih sha bashai ïa la ka jingbishar, bad um ju pep; hynrei, u bymhok um tip shuh ïa ka rain.

⁶ “Nga la ot noh ïa ki jaid bynriew, ki kut jong ki long ki jaka kynjah; nga la pynjot noh ïa ki lynti shnong jong ki, ba ym don ba ïaid ha ki: ïa ki nongbah jong ki la pynduh, haduh ba ym don briew, ba ym don uba shong shnong shuh.

⁷ Nga la ong, ‘Shisha phan sheptieng ïa nga, phan pdiang ïa ka jingsneng; ba kumta ïa ka jaka shong jong ka yn ym ot noh, katba kum ïa kiei kiei baroh ba nga la buh shaphang jong ka:’ pynban, ki la khie dang step bad ki la pynpyut ïa la ki jingleh baroh.

⁸ “Namar kata, phin ap ïa nga,” ong U Trai, “haduh kata ka sngi ba ngan ïeng ïa ka jinglute: naba ka jingthmu jong nga ka long ba ngan ïalum ïa ki jaid bynriew, ba ngan lum lang ïa ki hima, ïa ka ban theh halor jong ki ïa ka jingbitar jong nga, wat ïa ka jingbitar ba-meh ding jong nga baroh; naba yn jliah ïa ka pyrthei baroh da ka ding ka jingsatnud jong nga.

⁹ “Naba hangta ngan pynai pat ha ki paidbah ïa ka shyntur ka bakhuid, ba baroh kin khot ïa ka kyrteng U Trai, ïa ka ban shakri ïa u da kawei ka jingmut.

¹⁰ Na sha lyndet ki wah ka Ethiopia ki nongduwai jong nga, ka khun jong kiba la pynsakma jong nga keiñ, kin wallam ïa ka jingainguh jong nga.

¹¹ “Ha kata ka sngi, men ym sngewlehrain ïa la ki jingleh baroh, ha kiba me la leh pop ïa nga: naba hangta ngan shim noh napdeng jong me ïa kita kiba kyrkoh sarong jong me, bad men ym long shuh uba sngewmeng ha u lum u bakhuid jong nga.

¹² Hynrei, ngan pynsah hapdeng jong me ki briew ki bajynjar bad baduk, ki te kin shaniah ha ka kyrteng U Trai.

¹³ Kita kiba sah jong u Israel kin ym leh bymhok, lymne kren ïa ka lamler; lymne ïa u thylliej uba shukor yn ym shem ha ka shyntur jong ki: naba kin bam bad kin thiah, te ym don shuh u ban pynsheptieng ïa ki.”

¹⁴ To rwai, ko khun ka Seïon; to risa, ko Israel; to kmen bad to shadkmen da la ka dohnud baroh, ko khun ka Jerusalem.

¹⁵ U Trai u la law noh ïa ki jingbishar jong pha, u la shop noh shabar ïa u nongshun jong pha: u syiem ki Israel, U Trai keiñ, u don hapdeng jong pha: phan ym sheptieng shuh ïa ka basniew.

¹⁶ Ha kata ka sngi, yn ong ha ka Jerusalem, “Wat sheptieng, ko Seïon, wat pynjem ïa la ka kti.

¹⁷ U Trai U Blei jong pha u don hapdeng jong pha u bakhrawbor u ban pynim: un leh kmen halor jong pha da ka jingkmen, un shongthait ha la ka jingieit, un leh kmen halor jong pha da ka jingrwai.

¹⁸ Ngan lum lang ïa kita kiba leh sngewsih namar kata ka jingïaseng ka bakyntang, kiba na pha keiñ: ha kiba kata ka jingkit halor jong ka, ka la long ka jingjahburom.

¹⁹ Ha khmih, ha kata ka por, ngan pynshitom ïa kita baroh kiba pynjynjar ïa pha: bad ngan pynim ïa kata ka ba-dkoh, bad ngan lum ïa kata kaba la pynsakma; bad ngan pynlong ka jingïaroh bad ka jingdonnam ïa kita kiba ka jinglehrain jong ki ka la long ha ka khyndew baroh.

²⁰ Ha kata ka por, ngan ïalam shapoh ïa phi, bad ha kata ka por, ngan lum ïa phi: naba ngan pynlong jingdonnam bad ka jingïaroh ïa phi hapdeng ki briew baroh ka khyndew, haba ngan pynphai noh ïa ka jinglongmraw jong phi ha shuwa ki khmat jong phi,” ong U Trai.