SEPHANAÏAH 2 - KA BAIBL

Ka jingjot ki hima kiba marjan

¹ To ïalum lang, bad to ïawan lang keiñ, ko phi ka jaid bynriew kaba khlem rain;

² katba ka hukum kam pat kha, katba kam pat leit noh ka sngi kum u stait, katba ym pat ngat ha phi ka jingbitar U Trai, katba ka sngi ka jingbitar U Trai kam pat jia halor jong phi.

³ To wad ïa U Trai, phi baroh kiba lui lui jong ka khyndew, kiba la leh ïa ka jingbishar jong u; to wad ïa ka hok, wad ïa ka jinglui lui: lehse yn buhrieh ïa phi ha kata ka sngi ka jingbitar U Trai.

⁴ Naba yn kyntait noh ïa ka Gasa, bad ka Ashkelon kan long ka jaka kynjah: kin beh noh ïa ka Ashdod ha kaba shiteng sngi, bad ïa ka Ekron yn rat noh.

⁵ Kordit ïa phi kiba shong harud ka duriaw, ka jaid ki Khereth! Ka ktien U Trai ka long pyrshah ïa phi, A ka Kanaan, ka ri ki Philistia; ngan pynjot ïa pha, haduh ba ym don bashong ha pha shuh.

⁶ Bad ka rud duriaw kan long ki jaka phlang, bad ki ïingtrep ïa ki nongaplangbrot bad ki jingker langbrot.

⁷ Bad kata ka phang kan long ïa kita kiba sah na ka ïing Judah; kin pynbam phlang ïa la ki langbrot hangta: ha ki ïing ka Ashkelon kin thiah la janmiet; naba U Trai U Blei jong ki un wan-i ïa ki, bad un pynphai noh ïa ka jinglongmraw jong ki.

⁸ “Nga la ïohsngew ïa ka jingkrenbeiñ u Moab, bad ïa ki jingkren sniew ki khun u Ammon, da kiba ki la krenbeiñ ïa ki briew jong nga, bad ba ki la pynkhraw ïa lade pyrshah ïa ka phang jong ki.

⁹ Namar kata, katba nga im,” ong U Trai ki paid, U Blei ki Israel, “da shisha u Moab un long kum ka Sodom, bad ki khun u Ammon kum ka Gomorra, ka jaka ki teiñthap, bad ki thliew mluh, bad ka jaka kynjah junom: kita kiba sah na ki briew jong nga kin lute ïa ki, bad kiba sah na ka jaid bynriew jong nga kin ïoh kynti ïa ki.”

¹⁰ Kane kan jia ïa ki namar ka jingsarong jong ki, namar ki la krenbeiñ bad ki la pynkhraw ïa lade pyrshah ïa u paidbah jong U Trai ki paid.

¹¹ U Trai un long uba shyrkhei ïa ki: naba un pynïapthngan ïa ki blei jong ka khyndew baroh; bad ki briew kin mane ïa U, uwei pa uwei na ki na la ka jaka, ki 'dewlynnong baroh jong ki jaid bynriew.

¹² Ma phi ruh ki Ethiopia, yn pynïap ïa phi da ka waitlam jong nga.

¹³ Bad un kner ïa la ka kti pyrshah ïa ka shatei, bad un pynjot ïa ka Assyria; bad un pynlong ka jaka kynjah ïa ka Ninebeh, bad kaba rkhiang kum ka jaka ryngkhiang.

¹⁴ Bad ki kynhun mrad kin thiah hapdeng jong ka, ki kynja mrad baroh ki jong ki jentil: u pelikan ruh bad u 'ñiangkhit kin ïadem ha ki khlieh païa jong ka: ka jingsawa jong ki kan pah ha ki jingkhang ïit; ka jinglong kynjah kan long ha ki jingkhang: naba la pynlyngkhuit ïa ka jingtrei dieng Kedar.

¹⁵ Kane ka long ka nongbah kaba leh kmen kaba la shong bymsuidñiew, kaba la ong ha la ka dohnud, “Ma nga, bad nalor jong nga ym don shuh;” kumno ka la kylla ka jaka kynjah, ka jaka ïa ki mrad ban thiah ha ka! uwei uwei baroh uba ïaid hajan jong ka un kynshi, bad un kalain ïa la ka kti.