SEKHARAÏAH 8 - KA BAIBL

Ka jingkular ban pynthymmai ïa ka Jerusalem

¹ Pat ka la wan ka ktien U Trai ki paid ha nga, ka da ong,

² “Kumne u ong U Trai ki paid: ‘Nga skuiñ na ka bynta ka Seïon da ka jingskuiñ kaba khraw, bad nga skuiñ na ka bynta jong ka da ka jingbitar kaba khraw.’ ”

³ Kumne u ong U Trai: “Nga la wan phai sha ka Seïon, bad ngan shong sah hapdeng ka Jerusalem: bad ïa ka Jerusalem yn khot ‘Ka nongbah ka jingshisha’; bad ïa u lum U Trai ki paid, ‘U lum u bakhuid.’ ”

⁴ Kumne u ong U Trai ki paid: “Kin don pat ki tymmen shynrang bad kynthei ki ban shong ha ki lynti shnong jong ka Jerusalem, uwei uwei baroh bad la u diengduh ha la ka kti namar ba la tymmen eh.

⁵ Bad ki lynti shnong jong ka nongbah kin boi da ki khynnah shynrang bad kynthei kiba ïalehkai ha kita ki lynti shnong jong ka.”

⁶ Kumne u ong U Trai ki paid: “Lada kane ka long kaba iphylla ha khmat kita kiba sah na une u paidbah ha kito ki sngi, hato kan long kaba iphylla ha khmat jong nga ruh?” ong U Trai ki paid.

⁷ Kumne u ong U Trai ki paid: “Ha khmih, ngan pynim ïa la ki briew na ri mihngi, bad na ri sepngi:

⁸ bad ngan wallam ïa ki, bad kin ïoh shong hapdeng ka Jerusalem; bad kin long u paidbah jong nga, nga ruh ngan long U Blei jong ki, ha ka jingshisha bad ha ka hok.”

⁹ Kumne u ong U Trai ki paid: “To kin long khlaiñ ki kti jong phi, phi kiba ïohsngew ha kine ki sngi ïa kine ki ktien na ka shyntur kita ki nongïathuhlypa, kiba la don ha ka sngi ba la seng ïa ka nongrim jong ka ïing U Trai ki paid, ïa ka templ keiñ, khnang ban tei ïa ka.

¹⁰ Namar mynshuwa kita ki sngi, ym shym don bainong ïa u briew, lymne ka jingbylla ïa u mrad: lymne ym shym don ka jingsuk ïa uta uba mih shabar lymne ïa uba wan shapoh namar uta u nongïaleh pyrshah: naba nga la pynïaleh ïa ki briew baroh uwei uwei ïa la u paramarjan.

¹¹ Hynrei, ngan ym long shuh ha kiba sah na une u paidbah kumba ha kita ki sngi kiba mynshuwa,” ong U Trai ki paid.

¹² “Naba kan don u symbai ka jingsuk; bad u dieng Waiñ un ai la u soh, bad ka khyndew kan ai la ka jingmih; bad ki bneng kin ai la ka umjer; bad ngan pynïoh kynti ha kiba sah jong une u paidbah ïa kine kiei kiei baroh.

¹³ Bad kan long, ba kumba phi la ju long ka jingtim hapdeng ki jaid bynriew, ko phi ka ïing Judah bad ka ïing Israel, kumta ngan pynim ïa phi, bad phin ïoh long ka jingkyrkhu: wat sheptieng, hynrei, to kin long khlaiñ ki kti jong phi.”

¹⁴ Naba kumne u ong U Trai ki paid: “Kumjuh kumba nga, nga la thmu ban leh sniew ïa phi, haba ki kpa jong phi ki la pynkhih bitar ïa nga,” ong U Trai ki paid, “bad ngam shym kylla-ka-bamut;

¹⁵ kumta pat, ha kine ki sngi nga la thmu ban leh bha ïa ka Jerusalem bad ïa ka ïing Judah: wat sheptieng phi.

¹⁶ Kiei kiei kiba phin leh ki long kine: ‘To kren ïa kaba shisha uwei uwei ïa la u paramarjan; to bishar ïa ka jingbishar jong ka jingshisha bad ka jingsuk ha la ki khyrdop:

¹⁷ bad mano mano ruh na phi wat ai ba un tharai sniew ha la ka dohnud ïa la u paramarjan; bad wat ieit ïa kaba smai lamler; naba kine baroh ki long kiei kiei kiba nga isih,’ ” ong U Trai.

¹⁸ Bad ka ktien U Trai ki paid ka la wan ha nga, ka da ong,

¹⁹ “Kumne u ong U Trai ki paid: ‘Ka jingshah jingit jong u bnai u basaw, bad ka jingshah jingit jong u basan, bad ka jingshah jingit jong u bahynñiew, bad ka jingshah jingit jong u bashiphew, kin long ha ka ïing Judah ka jingkmen bad ka jingshadkmen, bad Ki Jingkhawai kiba sngewbha: namar kata, to ieit ïa ka jingshisha bad ka jingsuk.’

²⁰ “Kumne u ong U Trai ki paid: ‘Kan jia pat ba kin wan bun ki paidbah, bad kiba shong ha bun ki nongbah:

²¹ bad kiba shong ha kawei ka shnong kin ïaleit ha kawei pat, ki da ong, “Ïa, ngin ïaleit kloi ban ïakyrpad ïa ka jingisynei U Trai, bad ban wad ïa U Trai ki paid nga ruh ngan leit.”

²² Shisha keiñ, bun ki paidbah bad ki jaid bynriew kiba khlaiñ kin ïawan ban wad ïa U Trai ki paid ha Jerusalem, bad ban kyrpad ïa ka jingisynei U Trai.’ ”

²³ Kumne u ong U Trai ki paid: “Ha kito ki sngi, kan jia ba shiphew ngut ki briew na ki ktien baroh ki jaid bynriew, kin ïabat, kin ïabat keiñ na ka rmiang ka jaiñ jong uta uba long u Jiw, ki da ong, ‘Ngin ïaleit ryngkat bad phi, naba ngi la ïohsngew ba U Blei u don lem bad phi.’ ”