SEKHARAÏAH 7 - KA BAIBL

La pynrem ïa ka jingshah jingit kaba leh mynleh

¹ Te ha ka basaw snem ka jong u syiem Daraïos, ka la wan ka ktien U Trai ha u Sekharaïah ha ka basaw tarik u bnai bakhyndai, ha Khisleb keiñ.

² Te kita kiba na Bethel ki la lah phah ïa u Shareser bad u Regem-melekh, bad la ki briew, ban kyrpad ïa ka jingsngewbha U Trai,

³ bad ban ïakren ha ki lyngdoh ka ïing U Trai ki paid, bad ha ki nongïathuhlypa, ki ïa-ong, “Nga dei ban ïam ha u bnai u basan, da kaba pynkyrpang ïa lade, kumba nga la ju leh baroh katta ki snem?”

⁴ Ynda kumta, ka la wan ka ktien U Trai ki paid ha nga, ka da ong,

⁵ “To kren ha u paidbah ka ri baroh, bad ha ki lyngdoh, to ong, ‘Mynba phi la shah jingit bad phi la ïam sngewsih ha u bnai u basan bad ha u bahynñiew, kine ki hynñiewphew snem, phi la shah jingit ha nga, ha nga keiñ?

⁶ Bad haba phi bam, bad haba phi dih, hato phim ïabam ha lade, bad phi ïadih ha lade?

⁷ Hato phim dei ban sngap ïa kita ki ktien kiba U Trai u la pyrta da ki nongïathuhlypa kiba mynshuwa, mynba ka Jerusalem ka shong briew bad ka man bha, bad kita ki nongbah jong ka baroh sawdong ïa ka, bad ka ri shathie bad ka ri them ki ïashong briew?’ ”

Ka jingbymkohnguh ka long ka daw ïa ka jingpynwir

⁸ Bad ka ktien U Trai ka la wan ha u Sekharaïah, ka ong,

⁹ “Kumne u la kren U Trai ki paid, u da ong, ‘To bishar ïa ka jingbishar kaba shisha, bad to leh isynei bad ïa-isynei lem uwei uwei ïa la u para baroh:

¹⁰ bad wat banbeiñ ïa ka riewkynthei, lymne ïa u khunswet, ïa u nongwei, lymne ïa u baduk; bad mano mano ruh wat tharai sniew ha la ka dohnud ïa la u para.’

¹¹ Hynrei, ki kim ju treh ban sngap, bad ki la phai noh la ka tyrpeng, bad ki la set ïa la ki shkor khnang ba kin ym ïohsngew.

¹² Shisha keiñ, ki la pynlong ïa la ki dohnud kum u mawleiñ, ba ïoh kin ïohsngew ïa ka hukum, bad ïa ki ktien kiba U Trai ki paid u la lah phah da la U Mynsiem da ka kti kita ki nongïathuhlypa kiba mynshuwa: namar kata keiñ, ka la wan ka jingbitar kaba khraw na U Trai ki paid.

¹³ Te ka la jia, ba kumba u la pyrta, bad ki kim sngap; kumta, ki kin pyrta, nga de ngan ym sngap,” la ong U Trai ki paid;

¹⁴ “hynrei, da ka lyer langthari ngan pynsaphred ïa ki hapdeng ki jaid bynriew baroh ïa kiba kim shym la ithuh. Kumne ka ri ka la long ka bymshong briew hadien jong ki, haduh ba ym don uba ïaid lyngba lymne uba wan phai: naba ki la pynlong kaba kynjah ïa ka ri kaba sngewtynnad.”