SEKHARAÏAH 5 - KA BAIBL

Ka kot bakli kaba her

¹ Ynda kumta pat, nga la khmied ïa la ki khmat, bad nga la ïohi, te ha khmih, ka kot bakli kaba her.

² Bad u la ong ha nga, “Me ïohi aïu?” Te nga la ïathuh, “Nga ïohi ïa ka kot bakli kaba her; ka lynter jong ka arphew pruh, bad ka pyngkiang jong ka shiphew pruh.”

³ U te u la ong ha nga, “Kane ka long kata ka jingtim kaba mih noh halor ka khmat ka ri baroh: naba ïa uwei uwei baroh uba tuh yn beh noh na kawei ka liang kat kumba ka long ha ka: bad ïa uwei uwei baroh uba smai yn beh noh na kawei ka liang kat kumba ka long ha ka.”

⁴ “Ngan pynmih noh ïa ka,” ong U Trai ki paid, “bad kan leit bsut hapoh ka ïing jong u nongtuh, bad hapoh ka ïing jong uba smai lamler da ka kyrteng jong nga: bad kan sah hapdeng ka ïing jong u, bad kan bam duh ïa ka, lem bad ki dieng jong ka bad ki maw jong ka.”

Kaba thep ñian ïa ka briew ha ka ephah

⁵ Ynda kumta, uta u angel uba la ïakren bad nga u la mih noh, bad u la ong ha nga, “To khmied ïa la ki khmat te, bad to khmih kaei kane kaba leit mih noh.”

⁶ Te nga la ong, “Ka long aïu?” U la ong te, “Kane ka long kata ka ephah kaba leit mih noh.” U la ong ruh, “Kane ka long ka dur jong ki ha ka ri baroh:”

⁷ (bad ha khmih, la kyntiew ïa ka shi talent ka sisa:) bad kane ka long ka kynthei kaba shong hapdeng kata ka ephah.

⁸ Bad u la ong, “Kane ka long ka jingbymman”; bad u la lyngngeit ïa ka, hapoh kata ka ephah: bad u la pynnoh ïa kata ka jingkhia ka sisa halor ka shyntur jong ka.

⁹ Ynda kumta, nga la khmied la ki khmat, bad nga la ïohi, te ha khmih, ki la mih noh ar ngut ki kynthei, bad ka lyer ka la don ha ki thapniang jong ki; te ki la don ki thapniang keiñ kum ki thapniang ka puka: bad ki la kyntiew ïa kata ka ephah hapdeng ka khyndew bad ka bneng.

¹⁰ Te nga la ong ha uta u angel uba la ïakren bad nga, “Kine ki leit rah ïa kata ka ephah shano?”

¹¹ U te u la ong ha nga, “Ïa ka ban thaw ïing ïa ka ha ka ri Shinar: bad ynda la khreh ïa ka, yn buh noh ïa ka hangta ha la ka jong ka jaka.”