SEKHARAÏAH 4 - KA BAIBL

U dieng pynïeng sharak bad ki dieng Olib

¹ Te uta u angel uba la ïakren bad nga u la wan pat, bad u la kyrsiew ïa nga, kumba kyrsiew ïa u briew na kaba ïohthiah.

² Bad u la ong ha nga, “Me ïohi aïu?” Te nga la ong, “Nga la ïohi, bad ha khmih, u dieng pynïeng sharak uba da ka ksiar baroh, bad la ka shata sharak halor ka kliar jong u, bad la ki hynñiew sharak halor jong u; ki don hynñiew tylli ki tyndong ïa kawei kawei na kita ki sharak kiba halor ka kliar jong u:

³ bad ar tylli ki dieng Olib hajan jong u, kawei sha kamon jong kata ka shata sharak, bad kata kawei sha kadiang jong ka.”

⁴ Te nga la ïathuh bad nga la kren ha uta u angel uba la ïakren bad nga, nga da ong, “Ko kynrad, kine ki long aïu?”

⁵ Ynda kumta, uta u angel uba la ïakren bad nga u la ïathuh bad u la ong ha nga, “Mem tip kine ki long aïu?” Te nga la ong, “Em, kynrad.”

⁶ Ynda kumta, u la ïathuh bad u la kren, u da ong, “Kane ka long ka ktien U Trai ha u Serubbabel, ka da ong, ‘Ym da u paidïapom, lymne da ka bor, hynrei, da U Mynsiem jong nga,’ ” ong U Trai ki paid.

⁷ “Me, me long uei, ko lum bakhraw? ha khmat u Serubbabel men kylla madan: bad un pynmih ïa u maw ba ha khlieh da kaba risa, ‘Ka jingaiei, ka jingaiei, to kan long ha u.’ ”

⁸ Pat ka ktien U Trai ka la wan ha nga, ka da ong,

⁹ “Ki kti u Serubbabel ki la seng ïa ka nongrim jong kane ka ïing; ki kti jong u kin pyndep ruh ïa ka; bad men ïoh tip ba U Trai ki paid u la phah ïa nga ha phi.

¹⁰ Naba uei uba la ñiewbeiñ ïa ka sngi jong kiei kiei kiba rit? Naba kin leh kmen, bad kin ïohi ïa u sawar ha ka kti u Serubbabel, wat kine ki hynñiew tylli, kiba long ki khmat jong U Trai: ki phet shane bad shawei ïa ka khyndew baroh.”

¹¹ Ynda kumta, nga la ïathuh, bad nga la ong ha u, “Kine ki ar tylli ki dieng Olib sha kamon jong u dieng pynïeng sharak bad sha kadiang jong u ki long aïu?”

¹² Bad nga la ïathuh ka ba-ar sien, bad nga la ong ha u, “Kiei kine ki ar tylli ki tnat Olib, kiba hajan kita ki ar tylli ki tyndong ksiar, kiba theh ïa kata ka umphniang ksiar na ki hi?”

¹³ U te u la ïathuh ha nga bad u la ong, “Mem tip kine ki long aïu?” Te nga la ong, “Em, kynrad.”

¹⁴ Ynda kumta, u la ong, “Kine ki long kita ki ar ngut ïa kiba la sleh, kiba ïeng ha khmat U Trai jong ka khyndew baroh.”