SEKHARAÏAH 3 - KA BAIBL

Ka jingithuhpaw ïa u Joshua, u rangbah lyngdoh

¹ Bad u la pyni ha nga ïa u Joshua u rangbah lyngdoh ba u ïeng ha khmat u angel U Trai, bad u Soitan u ïeng ha ka kti kamon jong u kum u nongïaleh pyrshah.

² Te U Trai u la ong ha u Soitan, “To U Trai un sneng ïa me, u Soitan; shisha, U Trai uba la jied ïa ka Jerusalem un sneng ïa me: hato une um long u dieng tyllaw ïa uba la knieh na ka ding?”

³ Te ïa u Joshua la kup da ki jaiñ tngit, bad u la ïeng ha khmat uta u angel.

⁴ U te u la ïathuh bad u la kren ha kita kiba ïeng ha khmat jong u, “To law noh ïa kita ki jaiñ tngit na u.” Bad ha u, u la ong, “Ha khmih, nga la pynkynriah noh ïa ka pop jong me na me, bad ngan pynkup ïa me ha ki jaiñkup kiba kordor.”

⁵ Bad nga la ong, “To kin pynspong ïa ka spong lyngdoh kaba itynnad ha ka khlieh jong u.” Kumta, ki la pynspong ïa ka spong lyngdoh ba-itynnad ha ka khlieh jong u, bad ki la pynkup ïa u da ki jaiñkup; bad u angel U Trai u la ïeng hajan.

⁶ Bad u angel U Trai u la ong skhem ha u Joshua, u da ong,

⁷ “Kumne u ong U Trai ki paid: ‘Lada men ïaid ha ki lynti jong nga, bad lada men ap khmih ïa ka jingsumar jong nga, ynda kumta, me ruh men ïoh bishar ïa ka ïing jong nga, bad men ap khmih ruh ïa ki phyllaw jong nga, bad ngan ai ha me ka jaka ban rung hapdeng kine kiba ïeng hajan.

⁸ To sngap te, ko Joshua u rangbah lyngdoh, ma me bad la ki lok kiba shong ha khmat jong me; naba ki long ki briew kiba long ka dak: naba ha khmih, ngan pynmih noh ïa u shakri jong nga “u Tnat.”

⁹ Naba ha khmih, u maw uba nga la buh ha khmat u Joshua; ha uwei u maw ki don hynñiew tylli ki khmat; ha khmih, ngan shniah ïa ka jingshniah jong u,’ ” ong U Trai ki paid, “bad ngan pynkynriah noh ïa ka pop jong kata ka ri ha kawei ka sngi.”

¹⁰ “Ha kata ka sngi,” ong U Trai ki paid, “u briew baroh un khot ïa la u paramarjan hapoh u dieng Waiñ bad hapoh u dieng Dumbur.”