SEKHARAÏAH 2 - KA BAIBL

Ka jingithuhpaw ïa u briew lem bad u ksai thew

¹ Te nga la khmied la ki khmat, bad nga la ïohi, te ha khmih u briew bad u ksai thew ha ka kti jong u.

² Ynda kumta, nga la ong, “Shano me leit?” Te u la ong ha nga, “Ban thew ïa ka Jerusalem, ban khmih katno ka pyngkiang jong ka, bad katno ka lynter jong ka.”

³ Te ha khmih, uta u angel uba ïakren bad nga u la mih noh, bad uwei pat u angel u la mih noh ban ïashem bad u,

⁴ bad u la ong ha u, “To mareh, to kren ha une u samla, da kaba ong, ‘Yn pynshong briew ha Jerusalem kum ha ki shnong ki bym ker kynroh, namar ka jingbun ki briew bad ki jingri ha ka.’ ”

⁵ “Namar ma nga,” ong U Trai, “ngan long ha ka, ka kynroh ding baroh sawdong, bad ngan long ka burom hapdeng jong ka.”

Ka jingpyllait ïa ka Seïon

⁶ “Kaw, kaw, to phet noh na ka ri shatei,” ong U Trai: “naba nga la pynphriang kylleng ïa phi kum ki saw lyer ka bneng,” ong U Trai.

⁷ “Ko Seïon, to phet ïap noh, pha kaba shong bad ka khun ka Babilon.”

⁸ Naba kumne u ong U Trai ki paid: “Ban wad ïa ka burom, u la phah ïa nga ha kita ki jaid bynriew kiba la lute ïa phi: naba uta uba ktah ïa phi u ktah ïa i briew khmat jong u.

⁹ Naba, ha khmih, ngan pynkhih ïa la ka kti halor jong ki, bad kin long ka jinglute ha kita kiba la ju shakri ïa ki: bad phin ïoh tip ba U Trai ki paid u la phah ïa nga.

¹⁰ To rwai bad to leh kmen, ko khun ka Seïon: naba, ha khmih, nga wan, bad ngan shong hapdeng jong pha,” ong U Trai.

¹¹ Bad bun ki jaid bynriew kin pynïasoh ïa lade ha U Trai ha kata ka sngi, bad kin long ki briew jong nga: bad ngan shong hapdeng jong pha, bad phan ïoh tip ba U Trai ki paid u la phah ïa nga ha pha.

¹² Bad U Trai un shim kynti ïa ka Judah kum la ka bynta ha ka ri bakhuid, bad un jied pat ïa ka Jerusalem.

¹³ To sngap jar, ka doh baroh, ha khmat U Trai: naba u la khie na la ka jaka shong ka bakhuid.