SEKHARAÏAH 1 - KA BAIBL

Ka jingkhot ban kylla-ka-bamut

¹ Ha u baphra u bnai, ha ka snem ka ba-ar jong u Daraïos, la wan ka ktien U Trai ha u Sekharaïah u khun u Berekhaïah, u khun u Iddo, u nongïathuhlypa, ka da ong,

² “U Trai u la ju sngewsih sat bad ki kpa jong phi.

³ Namar kata, to ong ha ki, ‘Kumne u ong U Trai ki paid: “To phai phi sha nga,” ’ ” ong U Trai ki paid, “te nga ruh ngan phai sha phi,” ong U Trai ki paid.

⁴ “Wat long kum ki kpa jong phi, ha kiba ki nongïathuhlypa kiba mynshuwa ki la pyrta, ki ïa-ong, ‘Kumne u ong U Trai ki paid, “Mynta to phai noh phi na ki lynti basniew jong phi, bad na ki jingleh basniew jong phi:” pynban, kim shym la sngap, lymne shahshkor ïa nga,’ ” ong U Trai.

⁵ “Ki kpa jong phi, ki ha-ei? bad ki nongïathuhlypa, ki ju im junom?

⁶ Hynrei, kita ki ktien jong nga bad kita ki hukum jong nga, kiba nga la hukum ïa ki shakri jong nga ki nongïathuhlypa, ki la lap ne em ïa ki kpa jong phi? bad ki la phai bad ki la ong, ‘Kumba U Trai ki paid u la thmu ban leh ïa ngi, katba kum ki lynti jong ngi, bad katba kum ki jingleh jong ngi, kumta u la leh keiñ ïa ngi.’ ”

Ka jingithuhpaw ïa ki kulai

⁷ Ha ka ba-arphew saw ka sngi u bnai bakhatwei, uba long u 'nai Shebat, ha ka snem ka ba-ar jong u Daraïos, la wan ka ktien U Trai ha u Sekharaïah u khun u Berekhaïah, u khun u Iddo, u nongïathuhlypa, ka da ong,

⁸ “Nga la ïohi mynmiet, te ha khmih u briew uba shong halor u kulai basaw, bad u la ïeng hapdeng ki dieng Myrtl kiba ha ka them; bad hadien jong u, ki la don ki kulai, ki basaw, ki babyrsaw, bad ki balieh.

⁹ Te nga la ong, ‘Ko kynrad, kine ki long aïu?’ Bad uta u angel uba ïakren bad nga u la ong ha nga, ‘Ngan sa pyni ha me aïu kine ki long.’

¹⁰ Te uta u briew uba ïeng hapdeng kita ki dieng Myrtl u la ïathuh bad u la ong, ‘Kine ki long kita kiba U Trai u la phah ba kin ïaid shane bad shawei ïa ka khyndew.’

¹¹ Ki te ki la ïathuh ha uta u angel U Trai uba ïeng hapdeng kita ki dieng Myrtl, bad ki la ong, ‘Ngi la ïaid shane bad shawei ïa ka khyndew, te ha khmih, ka khyndew baroh ka shong jar jar, bad ka suk.’

¹² Ynda kumta, u angel U Trai u la ïathuh bad u la ong, ‘A Trai ki paid, sa katno pat ba mem isynei ïa ka Jerusalem bad ïa ki nongbah ka Judah, ïa kiba me la bat jingbitar kine ki hynñiewphew snem?’

¹³ Te U Trai u la phai ktien ïa uta u angel uba ïakren bad nga da ki ktien ki babha, ki ktien pyntngen keiñ.

¹⁴ Kumta, uta u angel uba ïakren bad nga u la ong ha nga, ‘To pyrta, da kaba ong, “Kumne u ong U Trai ki paid: Nga sngewskuiñ na ka bynta ka Jerusalem bad na ka bynta ka Seïon da ka jingsngewskuiñ kaba khraw.

¹⁵ Bad nga sngewsih sat ïa kita ki jaid bynriew kiba shongsuk: naba nga la sngewsih tang khyndiat, ki te ki la nang pynjur ïa ka jingpynshitom.” ’

¹⁶ Namar kata, kumne u ong U Trai: ‘Nga la phai pat sha ka Jerusalem bad ki jingleh isynei; yn sa tei ïa ka ïing jong nga ha ka,’ ong U Trai ki paid, ‘bad yn ring ïa u ksai halor ka Jerusalem.’

¹⁷ To pyrta pat, da kaba ong, ‘Kumne u ong U Trai ki paid: “Ki nongbah jong nga da ka jingmanbha kin phriang kylleng pat; bad U Trai un pyntngen pat ïa ka Seïon, bad un jied pat ïa ka Jerusalem.” ’ ”

Ka jingithuhpaw ïa ki reng bad ki bania

¹⁸ Te nga la khmied ïa la ki khmat, bad nga la ïohi, te ha khmih saw tylli ki reng.

¹⁹ Bad nga la ong ha uta u angel uba ïakren bad nga, “Kine ki long aïu?” Te u la ïathuh, “Kine ki long kita ki reng kiba la pynsaphred ïa ki Judah, ïa ki Israel, bad ïa ka Jerusalem.”

²⁰ Bad U Trai u la pyni ha nga saw ngut ki bania.

²¹ Te nga la ong, “Kine ki wan ban leh aïu?” U te u la kren, u da ong, “Kine ki long kita ki reng kiba la pynsaphred ïa ki Judah, haduh ba ym don u ban pynïeng ïa la ka khlieh: hynrei, kine ki la wan ïa ka ban pynma ïa ki, ban pynkyllon ïa ki reng jong ki jaid bynriew, kiba la kyntiew ïa la ki reng pyrshah ïa ka ri Judah ïa ka ban pynsaphred ïa ka.”