RUTH 4 - KA BAIBL

U Boas u shongkurim ïa ka Ruth

¹ Ynda kumta, u Boas u la leit kiew sha ka khyrdop, bad u la shong hangta: te ha khmih, uta u kur bajan ba u Boas u la kren shaphang jong u, u la ïaid nangta; te u la ong ha u, “Ko uba kumta kumta! ale shane, shong hangne.” U te u la leit shata, bad u la shong.

² Bad u la shim shiphew ngut na ki tymmen basan kata ka shnong, bad u la ong, “To shong hangne.” Ki te ki la shong.

³ Te u la ong ha uta u kur bajan, “Ka Naomi, kaba la wan phai pat na ka ri Moab, kan sa die noh ïa kata ka lynnong ka khyndew, kaba la long ka jong u Elimelekh uba u para jong ngi.

⁴ Bad nga la pyrkhat ban ïathuh ha me, da kaba ong, To thied ïa ka ha khmat kita kiba shong hangne, bad ha khmat ki tymmen basan ki briew jong nga. Lada men siewspah ïa ka, to siewspah: hynrei, lada men ym siewspah ïa ka, to ïathuh ha nga, ba ngan ïoh tip keiñ: naba nalor jong me ym don shuh u ban siewspah ïa ka; te hadien jong me sa ma nga.” U te u la ong, “Ngan siewspah keiñ.”

⁵ Ynda kumta, u Boas u la ong, “Ha kata ka sngi kaba men thied ïa kata ka lyngkha na ka kti ka Naomi, men thied ruh ïa ka na ka Ruth ka nong Moab, ka tnga uta u baïap, ïa ka ban pynmih ïa ka kyrteng jong u baïap ha kata ka bynta jong u.”

⁶ Te uta u kur bajan u la ong, “Nga ngam lah ban siewspah ïa ka ha lade, ïoh ba ngan pynsniew ïa la ka jong ka bynta: to shim ma me ha lade ïa ka hok jong nga ban siewspah; naba nga ngam lah ban siewspah ïa ka.”

⁷ Kane te ka la ju don ka rukom mynno mynno ha Israel shaphang kaba siewspah bad shaphang kaba ïapli, ïa ka ban pynskhem ïa kiei kiei baroh; “u briew u la ju loit noh ïa la ka juti, bad u la ju ai ha la u paramarjan:” bad kane ka la long ka jingsakhi ha Israel.

⁸ Kumta, uta u kur bajan u la ong ha u Boas, “To siewspah ïa ka ha lade.” Bad u la loit noh ïa la ka juti.

⁹ Bad u Boas u la ong ha kita ki tymmen basan, bad ha uta u paidbah baroh, “Phi long ki sakhi ha kane ka sngi, ba nga la thied ïa kiei kiei baroh ki jong u Elimelekh bad ïa kiei kiei baroh ki jong u Shilion bad u Mahlon, na ka kti ka Naomi.

¹⁰ Ïa ka Ruth ruh ka nong Moab, ka tnga u Mahlon, nga la thied ban long ka tnga jong nga, ban pynmih ïa ka kyrteng jong uta uba la ïap ha kata ka bynta jong u, ba yn ym duh noh ka kyrteng jong u baïap napdeng ki para jong u, bad na ka khyrdop ka jaka jong u: phi long ki sakhi keiñ ha kane ka sngi.”

¹¹ Te uta u paidbah baroh uba ha kata ka khyrdop, bad kita ki tymmen basan, ki la ïa-ong, “Ngi long sakhi keiñ. To U Trai un pynlong ïa kata ka kynthei kaba wan shapoh ka ïing jong me, kum ka Rakhel bad kum ka Leah, kita ar ngut keiñ kiba la tei ïa ka ïing Israel: to men man khraw bor ha Ephratah, bad to long uba donnam ha Bethlehem.

¹² To ka ïing jong me kan long kum ka ïing u Phares, ïa uba la kha ka Tamar ha u Judah, na uta u symbai ba U Trai un sa ai ha me na kane ka samla.”

¹³ Kumta u Boas u la shim ïa ka Ruth, bad ka la long ka tnga jong u; bad haba u la leit shapoh sha ka, U Trai u la ai ïa ka, ïa ka ban punkhun, bad ka la kha u khun shynrang.

¹⁴ Bad kita ki kynthei ki la ïa-ong ha ka Naomi, “To long ba la kyrkhu ïa U Trai, u bym shym la iehnoh ïa pha ha kane ka sngi khlem u kur bajan, bad ai ba ka kyrteng jong u kan ïoh long kaba donnam ha Israel.

¹⁵ Te un long ha pha u nongpynthymmai ïa ka jingim, bad u nongsumar ïa ka jinglong tymmen jong pha: namar kane ka pyrsa kurim jong pha, kaba ieit ïa pha, kaba long ruh kham bha ïa pha ban ïa hynñiew ngut ki khun shynrang, ka la kha khun ïa u.”

¹⁶ Ka Naomi te ka la shim ïa ita i khynnah, bad ka la kdup ïa i ha la ka shadem, bad ka la long ka nongri khun ïa u.

¹⁷ Te kita ki paramarjan kynthei jong ka ki la kyrteng ïa u, ki da ong, “La kha khun shynrang ha ka Naomi,” bad ka la kyrteng ïa u, “u Obed”: u te u la long u kpa u Jesse, uba u kpa u Dabid.

Ka jinghiar pateng u Dabid

¹⁸ Kine ki jingkha pateng u Phares: u Phares u la pynkha ïa u Hesron;

¹⁹ bad u Hesron u la pynkha ïa u Ram, bad u Ram u la pynkha ïa u Amminadab;

²⁰ bad u Amminadab u la pynkha ïa u Nahshon, bad u Nahshon u la pynkha ïa u Salmon;

²¹ bad u Salmon u la pynkha ïa u Boas, bad u Boas u la pynkha ïa u Obed;

²² bad u Obed u la pynkha ïa u Jesse, bad u Jesse u la pynkha ïa u Dabid.