RUTH 3 - KA BAIBL

Ka Ruth bad u Boas ha ka kyntem

¹ Ynda kumta, ka Naomi ka kiaw kurim jong ka, ka la ong ha ka, “Ko khun, nga te ngan ym wad ïa kaba jahthait ïa pha ba kan long bha ïa pha?

² Hato te u Boas um long u kur jong ngi, uta keiñ ba pha la don bad ki samla kynthei jong u? Ha khmih, ha kane ka miet u peh ïa u Kew Barli ha ka kyntem.

³ Namar kata to sum, to sleh ruh, bad kup ïa la ki jaiñ, bad leit hiar sha kata ka kyntem: hynrei, wat pynithuh ïa lade ha uta u briew, tad ynda u la lah bam lah dih.

⁴ Te haba u la thiah, to khmih keiñ ïa ka jaka ha kaba un thiah, bad to leit bad khyndied ïa ki jaiñ na ki sla'jat jong u, bad to thiah noh; u te un ïathuh ha pha ïa kaba pha dei ban leh.”

⁵ Ka te ka la ong ha ka, “Ngan leh keiñ ïa kita baroh kiba pha ong ïa nga.”

⁶ Te ka la leit hiar sha kata ka kyntem, bad ka la leh keiñ katba kum kita kiei kiei baroh ïa kiba la hukum ka kiaw kurim jong ka ïa ka.

⁷ Bad haba u Boas u la bam u la dih ruh, bad ka dohnud jong u ka la kmen, u la leit thiah noh harud kata ka kynton Kew: ka ruh ka la wan jar jar, bad ka la khyndied ïa ki sla'jat jong u, bad ka la thiah.

⁸ Te ha kaba shiteng synñia, uta u briew u la sngewkyndit, bad u la kylla: te, ha khmih, ka kynthei ka thiah ha ki sla'jat jong u.

⁹ Te u la kylli, “Mano?” Ka te ka la ïathuh, “Nga ka Ruth ka shakri jong me: namar kata, to tap ïa la ka jaiñ halor ka shakri jong me; naba me long u kur jong nga uba hajan.”

¹⁰ U te u la ong, “Ko khun, to long pha ïa kaba la kyrkhu na U Trai: namar pha la pyni kham bun ka jinglehsbun ha ka bakut ban ïa ha ka banyngkong, naba pham shym leit beh ïa ki samla shynrang ki baduk lymne ki bariewspah.

¹¹ Mynta te, ko khun, wat sheptieng; ïa kata baroh ïa kaba pha la ong ngan leh keiñ ïa pha: naba ka shnong ki briew jong nga baroh ka tip ba pha long ka briew ka babha.

¹² Te ka long kaba shisha keiñ ba nga long u kur uba hajan: la kumta ruh don uwei pat u kur uba kham jan ban ïa nga.

¹³ To sah kane ka miet, mynstep te, lada uta un pyndep ha pha ïa kata ka hok kaba dei ïa u kur, ñiuma, ai ba un pyndep ha pha ïa kata ka hok kaba dei ïa u kur: hynrei, lada un ym pyndep ha pha ïa kata ka hok kaba dei ïa u kur, te kumta, ngan pyndep ma nga ha pha ïa kata ka hok kaba dei ïa u kur, katba u im U Trai: to thiah noh haduh mynstep.”

¹⁴ Te ka la thiah ha ki sla'jat jong u haduh mynstep: bad ka la khie haba ym pat imat ban ithuh briew. U te u la ong, “Wat ai ba yn tip ba ka kynthei ka la wan ha ka kyntem.”

¹⁵ U la ong ruh, “Wallam ïa kata ka jaiñkup kaba pha kup, bad bat ïa ka;” te ka la bat ïa ka: bad haba u la thew hynriew pyrha u Kew Barli, u la pynkit ïa ka; ka ruh ka la leit sha shnong.

¹⁶ Te haba ka la poi ha la ka kiaw kurim, ka la kylli, “Ko khun, ka la long kumno ïa pha?” Ka te ka la ïathuh ha ka ïa kiei kiei baroh kiba uta u briew u la leh ïa ka.

¹⁷ Bad ka la ong, “Ïa kine ki hynriew pyrha u Kew Barli u la ai ha nga; naba u la ong ha nga, ‘Wat leit suda sha la ka kiaw kurim.’ ”

¹⁸ Ynda kumta, ka ruh ka la ong, “To da ap, ko khun, tad ynda phan ïoh tip kumno kane ka kam kan long: namar uta u briew un ym shongthait tad ynda u la pyndep ïa kane ka kam ha kane ka sngi.”