RUTH 2 - KA BAIBL

Ka Ruth ka tam Kew ha lyngkha u Boas

¹ Te uta u tnga ka Naomi u la don u kur uba khraw spah, na ka ïing u Elimelekh; bad ka kyrteng jong u, “u Boas”.

² Te ka Ruth ka nong Moab ka la ong ha ka Naomi, “To shah ïa nga ba ngan leit sha lyngkha, ban tam Kew nadien uta ba ngan shem sngewbha ha khmat jong u.” Ka ruh ka la ong ha ka, “Khie leit, khun.”

³ Te ka la leit, ka la wan ruh bad ka la tam Kew ha ka lyngkha nadien ki nongot: te ka la jia ryngkhat ba kata ka bynta na ka lyngkha ka la dei ka jong u Boas, uba na ka ïing u Elimelekh.

⁴ Te, ha khmih, u Boas u la wan na Bethlehem, bad u la ong ha kita ki nongot, “To U Trai un long ryngkat bad phi.” Ki ruh ki la ïathuh ha u, “To U Trai un kyrkhu ïa me.”

⁵ Ynda kumta, u Boas u la kylli ïa uta u shakri jong u uba halor kita ki nongot, “Kane ka samla ka jongno?”

⁶ Te uta u shakri uba halor kita ki nongot u la ïathuh bad u la ong, “Ka long kata ka samla kaba na Moab kaba la wan ryngkat bad ka Naomi na ka ri Moab:

⁷ bad ka la ong, ‘Nga kyrpad ba ngan ïoh tam Kew bad lum nadien ki nongot hapdeng kita ki song;’ kumta ka la wan bad ka la sah ruh naduh mynstep haduh mynta, hynrei, tang ba ka la shong khyndiat ha ïing.”

⁸ Ynda kumta, u Boas u la ong ha ka Ruth, “Ko khun, pha ïohsngew ne em? Wat leit ban tam Kew sha kawei pat ka lyngkha, bad wat leit noh nangne, hynrei, sah hangne bad kine ki samla kynthei jong nga.

⁹ To ki khmat jong pha kin long ha kata ka lyngkha ïa kaba ki ot ma ki, bad to bud ïa ki: balei nga ngam shym hukum ïa kine ki samla shynrang ba kin ym ktah ïa pha? bad haba pha sliang, khie leit sha kita ki pliang bad to dih na kata kaba ki la tong kita ki samla shynrang.”

¹⁰ Ynda kumta, ka la hap dem la ka khmat, bad ka la dem ngon haduh khyndew, bad ka la ong ha u, “Namar balei ba nga la shem ka jingsngewbha ha khmat jong me, bad me la khmih ïa nga, haba nga long ka nongwei ruh?”

¹¹ Te u Boas u la ïathuh ha ka bad u la ong, “La ïathuh ha nga biang biang ruh ïa kiei kiei baroh kiba pha la leh ha ka kiaw kurim jong pha naduh kaba la ïap u tnga jong pha: bad ba pha la iehnoh noh ïa la u kpa bad ïa la ka kmie, bad ïa ka ri ha kaba la kha ïa pha, bad ba pha la wan sha ki briew ïa kiba pham ju ithuh mynshuwa.

¹² To U Trai un pynbiang kum ka kam jong pha, bad to ai ba ka bainong jong pha kan long kaba janai na U Trai, U Blei ki Israel, uba pha la wan ban rieh hapoh ki thapniang jong u.”

¹³ Ynda kumta, ka la ïathuh, “To ai ba ngan shem kaba sngewbha ha khmat jong me, ko kynrad; namar ba me la pyntngen ïa nga, bad ba me la kren sbun ha ka shakri jong me, la ngam long kum kawei na ki shakri kynthei jong me.”

¹⁴ Te u Boas u la ïathuh ha ka, “Ha ka por bam ja to wan shane, bad bam na une u kpu, bad wieh ïa la ka shi dkhot ha kane ka sirka.” Te ka la shong hajan kita ki nongot: u la ai ruh ïa ka na uta u Kew sdieh, bad ka la bam bad ka la kdang, bad ka la pynsah ruh.

¹⁵ Te haba ka la ïeng ïa ka ban tam, u Boas u la hukum ïa la ki shakri, u da ong, “To shah ruh ba kan tam Kew hapdeng kita ki song bad wat mai ïa ka.

¹⁶ Bad phin pynhap khnang ruh khyndiat na kita ki song ïa ka, iehnoh ïa ki ruh, te kan tam, bad wat mai ïa ka.”

¹⁷ Kumta, ka la tam Kew ha kata ka lyngkha haduh janmiet; bad ka la shoh ïa kata kaba ka la tam, te ka la long kumba shi ephah u Kew Barli.

¹⁸ Bad haba ka la shim ïa ka, ka la leit sha shnong: te ka kiaw kurim jong ka, ka la ïohi ïa kata kaba ka la tam: te ka la sei ruh ïa kaba ka la pynsah haba ka la kdang bad ka la ai ha ka.

¹⁹ Te ka kiaw kurim jong ka, ka la kylli ïa ka, “Hangno pha la tam Kew ha kane ka sngi? bad hangno pha la trei? long ba la kyrkhu ïa uta uba la ïakhmih ïa pha.” Ka te ka la ïathuh ha la ka kiaw kurim badno ba ka la trei, bad ka la ong, “Ka kyrteng uta u briew ba nga la trei bad u ha kane ka sngi long ‘u Boas’.”

²⁰ Ka Naomi te ka la ïathuh ha la ka pyrsa kurim, “To un long ba la kyrkhu na U Trai, u bym shym la wai noh ïa la ka jingleh isynei ïa ki ba-im bad ïa ki baïap ruh.” Ka Naomi ka la ong ruh ha ka, “Uta u briew u long u kur bajan ïa ngi, uba don hok ïa ka ban siewspah na ka bynta jong ngi.”

²¹ Te ka Ruth ka nong Moab ka la ong, “U la ong ruh ha nga, ‘Phan sah lem bad kine ki samla shynrang jong nga, tad ynda ki la pyndep ïa ka jingot jong nga baroh.’ ”

²² Ka Naomi te ka la ong ha ka Ruth ka pyrsa kurim jong ka, “Ko khun ka long ka babha keiñ ba phan leit lem bad kita ki samla kynthei jong u, bad ba kin ym ïakynduh bad pha ha kawei pat ka lyngkha.”

²³ Kumta, ka la bud bad kita ki samla kynthei jong u Boas ïa ka ban tam haduh ba la wai noh kata ka aïom ot u Kew Barli bad ka aïom ot Kew; bad ka la shong ruh bad ka kiaw kurim jong ka.