RUTH 1 - KA BAIBL

Ka Ruth bad ka Naomi

¹ Te ha kita ki sngi, mynba ki nongbishar ki dang bishar, la don ka 'nemsniew ha kata ka ri. Bad uwei u briew uba na Bethlehem Judah, u la leit shong sha ka ri Moab, ma u bad ka tnga jong u, bad ki khun shynrang jong u, ar ngut.

² Te ka kyrteng uta u briew ka long “u Elimelekh”, bad ka kyrteng ka tnga jong u “ka Naomi”, bad ki kyrteng ki khun shynrang jong u, “u Mahlon”, bad “u Shilion”, ki nong Ephrath keiñ na Bethlehem Judah. Kine te, ki la wan poi sha ri Moab bad ki la sah hangta.

³ Te u Elimelekh, u tnga ka Naomi u la ïap noh: bad u la iehnoh ïa ka, bad ïa kita ki khun jong ka, ar ngut.

⁴ Te kita ki la shim kurim ha lade, na ki kynthei Moab; bad ka kyrteng kawei ka long “ka Orpah”, bad ka kyrteng kata kawei pat “ka Ruth”: te ki la shong hangta kumba shiphew snem.

⁵ Te u Mahlon bad u Shilion ruh ki la ïap noh baroh ar ngut; bad ïa kata ka kynthei la iehnoh weibriew ba la ïap ki khun shynrang jong ka bad u tnga jong ka.

⁶ Ynda kumta, ka la ïeng lem bad kita ki pyrsa kurim jong ka, ïa ka ban leit phai noh pat na kata ka ri Moab: naba ka la ïohsngew ha ri Moab ba U Trai u la wan-i ïa la ki briew da kaba u la ai kpu ïa ki.

⁷ Kumta, ka la mih noh na kata ka jaka ha kaba ka la don bad kita ki pyrsa kurim jong ka baroh ar ngut lem bad ka; bad ki la leit ha lynti ïa ka ban leit phai noh pat sha ka ri Judah.

⁸ Te ka Naomi ka la ong ha kita ki ar ngut ki pyrsa kurim jong ka, “To khie phi to leit phai noh ha la ïing la ïing ka kmie: to U Trai un leh isynei ïa phi, kumba phi ruh phi la leh isynei ïa kita kiba la ïap, bad ïa nga ruh.

⁹ To U Trai un ai ïa phi ba phin shem kaba jahthait ha la ka ïing ka ïing la u tnga.” Ynda kumta, ka la doh ïa ki; ki te ki la pynjam ïa la ka ktien bad ki la ïam.

¹⁰ Bad ki la ong ha ka, “Em, ngi ngin leit lem bad pha sha kita ki briew jong pha.”

¹¹ Ka Naomi te ka la ong, “To phai noh phi ko khun: ïa ka ban lei phin leit lem bad nga? ma nga, nga dang don shuh ki khun shynrang ha ka kpoh, ïa ka ban long ki tnga jong phi?

¹² To phai noh phi, ko khun, khie leit wan noh; naba ïa kaba ngan ïoh kurim pat nga la tymmen. Lada ngan ong, ‘Nga dang don ka jingkyrmen, lada ngan ïoh tnga ha kane hi ka miet, bad ngan kha ki khun shynrang ruh;

¹³ phi phin da ap ïa kita haduh ba kin da san? phi phin da ap namar kata khlem da shongkurim?’ Em, ko khun; naba nga khuslai sat na ka bynta jong phi, namar ba ka kti U Trai ka la mih pyrshah ïa nga.”

¹⁴ Ki te ki la pynjam ïa la ka ktien, bad ki la ïam pat: bad ka Orpah ka la doh ïa la ka kiaw kurim; hynrei, ka Ruth ka la snoh ha ka.

¹⁵ Ka te ka la ong, “Ha khmih, kata ka para tnga jong pha ka la leit phai noh sha la ki briew, bad sha uta u blei jong ka: to phai noh ma pha ruh nadien kata ka para tnga jong pha.”

¹⁶ Ka Ruth te ka la ong, “Wat kyrpad ïa nga ba ngan khlad noh na pha, ïa ka ban phai noh na kaba bud ïa pha: naba sha kaba phan leit ma pha, hangta nga ruh ngan leit; bad ha kaba phan shong basa ma pha, hangta nga ruh ngan shong basa: ki briew jong pha kin long ki briew jong nga, bad U Blei jong pha un long U Blei jong nga:

¹⁷ ha kaba phan ïap ma pha, hangta hi nga ruh ngan ïap, hangta ruh yn tep ïa nga: to U Trai un leh kumta ïa nga, bad tam ruh, lada ei ei sa tang ka jingïap ka ban pynkhlad ïa nga na pha.”

¹⁸ Te haba ka la ïohi ba ka la thew skhem ïa ka ban leit ryngkat bad ka, kam shym kren shuh ha ka.

¹⁹ Kumta, ki la leit baroh ar ngut tad ynda ki la wan poi sha Bethlehem. Te haba ki la poi sha Bethlehem, kata ka shnong baroh keiñ ka la khie namar jong ki, bad ki la ïakylli, “Kane ka Naomi?”

²⁰ Ka te ka la ong ha ki, “Wat khot shuh ïa nga ‘ka Naomi’, khot ïa nga ‘ka Mara’ keiñ: naba U Badonbor Baroh u la leh kthang eh ïa nga.

²¹ Nga, nga la leit mih noh kaba dap, te U Trai u la wallam pat ïa nga sha la ïing kaba suda: balei phin khot pat ïa nga ka Naomi, haba U Trai u la sakhi pyrshah ïa nga, bad ba U Badonbor Baroh u la pynjynjar ïa nga?”

²² Kumta, ka Naomi ka la wan phai pat bad ka Ruth ka nong Moab, ka pyrsa kurim jong ka, kaba la wan noh na ka ri Moab, ryngkat bad ka: te ki la wan sha Bethlehem ha kaba sdang ka aïom ot Kew Barli.