Ka Shithi U Paul Sha Ki Nong Rom 9 - KA BAIBL

U Blei bad kiba la jied jong u

¹ Nga kren ïa kaba shisha ha U Khrist, ngam lamler keiñ, ka jingïatiplem jong nga ka da ïaphla shai ryngkat bad nga ha U Mynsiem Bakhuid,

² ba nga don ka jingsngewsih bakhraw, bad ka jingpangnud khlem da pud ha la ka dohnud.

³ Namar nga da lah ban kwah keiñ ban long ïa lade uba la tim noh na U Khrist, na ka bynta ki para jong nga kiba ki para jaid jong nga katba kum ka doh:

⁴ kiba long ki Israel; kiba ki jong ki, long kata ka jingtingkhun, bad kata ka jingpyndonburom, bad kita ki jutang, bad kata ka jingai ka hukum, bad kata ka jingleh niam ka jong U Blei, bad kita ki jingkular;

⁵ kiba ki jong ki, long kita ki kpa, bad na ki, ba la mih U Khrist katba kum ka doh, uba long halor baroh, U Blei ba la kyrkhu keiñ sha ki bymjukut! Amen.

⁶ Hynrei, kam long kumta keiñ, kumba kata ka ktien ka jong U Blei ka la hap duh noh. Namar ym baroh kiba na Israel, kiba long Israel:

⁷ lymne kim long ki khun baroh, tang namar ba ki long u symbai u Abraham: hynrei, “Ha u Isaak yn khot u symbai jong me.”

⁸ Kata ka long kumne: “Ym dei ki khun jong ka doh kiba long ki khun U Blei; hynrei, yn ñiew u symbai ïa kita ki khun jong kata ka jingkular.”

⁹ Namar kane ka long ka ktien ka jingkular: “Hamar kane ka Ïa ngan wan, te ka Sara kan sa ïoh khun shynrang.”

¹⁰ Bad ym tang kumta hi, hynrei, ka Rebekka ruh mynba ka la punkhun na uwei, kata na u Isaak uba u kpa jong ngi;

¹¹ namar haba ym pat kha ïa kita ki khun, lymne kim pat shym leh ïa kaei kaei ruh ka babha lane ka basniew, ba kata ka jingthmu ka jong U Blei katba kum ka jingjied jong u kan ïoh neh skhem, ym na ki jingleh, hynrei, na uta uba khot keiñ;

¹² la ïathuh ha ka: “Uta uba shuwa un shakri ïa uta u bakhatduh.”

¹³ Kumba la thoh: “Ïa u Jakob nga la ieit, hynrei ïa u Iso nga la isih.”

¹⁴ Kumno te ngin ïa-ong? Don ka bymhok bad U Blei? Em, ym kumta!

¹⁵ Namar u ong ha u Moses: “Ngan isynei ïa uba ngan isynei, bad ngan sngewsynei ïa uba ngan da sngewsynei.”

¹⁶ Kumta te, kam long na uta uba mon, ne na uta uba phet, hynrei, na U Blei uba leh isynei.

¹⁷ Namar kata Ka Jingthoh ka ong ha uta u Pharaoh: “Khnang ïa kane hi keiñ nga la pynïeng ïa me, ba ngan da ïoh pyni shynna ïa ka borbah jong nga ha me, bad ba yn ïoh ïalap shai ïa ka kyrteng jong nga ha ka pyrthei baroh kawei.”

¹⁸ Kumta keiñ, ïa uba u mon, u isynei; bad ïa uba u mon, u pyneh.

Ka jingbitar U Blei bad ka jingisynei jong u

¹⁹ Men ong te ha nga, “Balei u dang kynnoh pop? Namar uei ba la pynlah ïa ka mon jong u?”

²⁰ Ym kumta, hynrei, A u briew, me, me long uei ba me ïasaid pyrshah ïa U Blei? Hato in ong ita i dur ba la thaw ha uta uba thaw dur ïa i, “Balei me la thaw ïa nga kumne?”

²¹ Ne u nongthaw khiew u don bor ne em halor kata ka 'dewbyrtha, ban thaw na kata kajuh hi ka shi lynglun ïa uwei u khiew sha kaba donburom, hynrei, ïa uwei pat sha kaba khlem burom?

²² Kumno te lada U Blei, ba u da mon ban pyni ïa la ka jingbitar, bad ban pyntip noh ïa ka borbah jong u, u la ïaishah da shibun ka jingïaishah-slem ïa ki khiew ka jingbitar ba la pynbit sha ka jingpynjot;

²³ bad ba un ïoh pyntip noh ïa kata ka jingkynrei spah ka burom jong u ha ki khiew ka jingisynei, ïa kiba u la lah pynkhreh lypa sha ka burom,

²⁴ ïa ngi keiñ, ïa kiba u la khot ruh, ym tang na ki Jiw hi, hynrei, na ki Jentil ruh?

²⁵ Kumba u ong ruh ha u Hosea: “Ngan khot ‘U paidlang jong nga’ ïa uta u bym ju long u paidlang jong nga bad ‘Ka ba-ieit’ ïa kata ïa kaba ym ju la ieit.”

²⁶ “Kan jia ruh ha kata ka jaka ha kaba la ïathuh ha ki, ‘Phim long u paidlang jong nga’ ba hangta yn khot ïa ki ‘Ki khun shynrang U Blei ba-im.’ ”

²⁷ Hynrei, u Isaïah u pyrta noh shaphang ki Israel: “La ka jingkheiñ ki khun Israel ka da long kat u shyiap ka duriaw; tang ïa ita i bynta ba dang pynsah, yn ri pynim:

²⁸ namar U Trai un pynïaid noh ïa la ka ktien ha ka khyndew, u da pyndep noh ïa ka, bad u da pynkut noh kloi ïa ka.”

²⁹ Ruh, kumba u Isaïah u la ïathuh mynshuwa: “Lymda U Trai ki Paid u la lah pynsah symbai ïa ngi, ngin da la jia long kum ka Sodom, bad la lah pynlong ïa ngi kum ka Gomorra.”

U paidlang Israel bad ka Gospel

³⁰ Aïu pat ngin ïa-ong? Ba ki Jentil ki bym ju la beh ïa ka hok, ki la ïoh kot sha ka hok, wat ïa kata ka hok keiñ kaba na ka jingngeit.

³¹ Hynrei, ki Israel haba ki ju beh ïa ka aiñ ka hok, kim shym la lap ïoh ïa kata ka aiñ.

³² Na ka balei? Naba kim shym la beh ïa ka, da ka jingngeit, hynrei, kumba da ki jingleh. Namar ki la jynthut ha uta u “maw ka jingjynthut;”

³³ kumba la thoh: “Ha khmih, nga buh ha ka Seïon ïa u maw ka jingjynthut bad ïa u mawsiang ka jingpynthut; hynrei, ïa uno uno baroh uba ngeit ha u, yn ym pynrain buhkhoh.”