Ka Shithi U Paul Sha Ki Nong Rom 8 - KA BAIBL

Kiba ïaid katba kum U Mynsiem

¹ Namar kata, mynta, ym don ka jingpynrem ïa kita kiba ha U Khrist Jisu, ki bymïaid katba kum ka doh, hynrei, katba kum U Mynsiem.

² Namar kata ka hukum ka jong U Mynsiem ka jingim ha U Khrist Jisu ka la pyllait ïa nga na kata ka hukum ka jong ka pop bad ka jong ka jingïap.

³ Namar ïa kata kaba ka hukum kam shym lah ban leh, naba ka la tlot na kata ka doh, U Blei, da kaba u la phah ïa U Khun jong u hi ha ka dur ka doh pop, bad ban long ka jingkñia namar ka pop, u la pynrem ïa ka pop ha kata ka doh;

⁴ ba kumta, yn ïoh pyndep ïa ka jingdawa jong kata ka hukum ha ngi, kiba ïaid ym katba kum ka doh, hynrei, katba kum U Mynsiem.

⁵ Namar kita kiba long katba kum ka doh ki ïaimut brai ïa kiei kiei ruh ki jong kata ka doh; hynrei, kita kiba long katba kum U Mynsiem ïa kiei kiei ruh ki jong uta U Mynsiem.

⁶ Namar ka jingïaimut brai ka jong kata ka doh, ka long ka jingïap; hynrei, ka jingïaimut brai ka jong kata ka mynsiem, ka long ka jingim bad ka jingsuk keiñ.

⁷ Naba kata ka jingïaimut brai ka jong kata ka doh, ka long ka jingshun ïa U Blei; namar kam pynhapoh ïa lade ïa ka hukum U Blei, lymne shisha kam lah keiñ.

⁸ Kumta te, kita kiba long ha ka doh kim lah ban pynsngewbha ïa U Blei.

⁹ Hynrei, ma phi phim long ha ka doh, hynrei, ha U Mynsiem, lada U Mynsiem U Blei u shong sah hapoh jong phi. Hynrei, lada uno uno ruh um don U Mynsiem U Khrist, uta keiñ, um long u jong U.

¹⁰ Bad lada U Khrist u don hapoh jong phi, kata ka met ka long kaba ïap namar ka pop; hynrei, kata ka mynsiem ka long ka jingim namar ka hok.

¹¹ Hynrei, lada U Mynsiem jong uta uba la pynmih pat ïa U Jisu na ki baïap u shong sah hapoh jong phi, uta uba la pynmih pat ïa U Khrist na ki baïap, un pynlong im ruh ïa kita ki met baïap jong phi, da uta U Mynsiem jong u, uba shong sah hapoh jong phi.

¹² Kumta te, ko parabangeit, ngi long ki nongkit ram, ym na kata ka doh, ïa ka ban im katba kum ka doh.

¹³ Namar, lada phi im katba kum ka doh, phin ïap noh keiñ; hynrei, lada phi pynïap troiñ da U Mynsiem ïa ki jingleh ki jong kata ka met, phin im keiñ.

¹⁴ Namar, kat kiba la ïalam da U Mynsiem U Blei, kita keiñ ki long ki khun U Blei.

¹⁵ Namar phim shym la pdiang ïa ka mynsiem ka jinglongmraw pat ïa ka ban sheptieng; hynrei, phi la pdiang ïa U Mynsiem ka jingtingkhun, da uba ngi ïaïam kyrpad, Abba! ko Pa!

¹⁶ Uta U Mynsiem hi keiñ, u ïaphla shai ryngkat bad ka mynsiem jong ngi, ba ngi long ki khun U Blei:

¹⁷ kumta, lada ngi long ki khun, ngi long ki nongïoh pateng ruh; ki nongïoh pateng U Blei keiñ bad ki nongïaïoh pateng lem bad U Khrist de; lada shisha ngi ïashah shitom lem bad u, yn ïoh pyndonburom lem ïa ngi ruh bad u.

Ka burom ïa ka ban sa pynpaw

¹⁸ Namar nga kheiñ ba kita ki jingshahshitom ki jong ka pyrthei sngi kaba mynta, kim long ei ei ruh em ban ïanujor bad kata ka burom ka ban sa pynpaw ha ngi.

¹⁹ Namar kata ka jingkhmih kyrmen kmang ka jong ka jingthaw, ka khmih lynti hir hir ïa kane ka jingpynpaw ïa ki khun U Blei.

²⁰ Namar ïa kata ka jingthaw la pynlong hapoh ka jingthala, ym da la ka mon hi, hynrei, da uta uba la pynhapoh ïa ka,

²¹ ha ka jingkyrmen ba yn pyllait noh ïa kata ka jingthaw hi ruh, na kata ka jinglongmraw hapoh kata ka jingpyut, sha ka jinglaitluid ka burom kita ki khun U Blei.

²² Namar ngi tip ba ka jingpynlong baroh kawei ka ïa-ud lang bad ka ïasuh khun lang haduh mynta.

²³ Bad ym tang kata, hynrei, ma ngi hi ruh kiba don ki soh nyngkong jong U Mynsiem, wat ma ngi hi keiñ, ngi ïa-ud sat hapoh lade hi, da kaba ap khmih hir hir ïa ka jingtingkhun, kaba long, ka jingsiewspah ïa ka met jong ngi.

²⁴ Namar ha ka jingkyrmen la pynim ïa ngi; hynrei, ka jingkyrmen ïa kaba ïohi kam long ka jingkyrmen: namar ïa kata ba uno uno ruh u ïohi, kumno u kyrmen pat ïa kata?

²⁵ Hynrei, lada ngi kyrmen ïa kata kaba ngim ïohi, te da kaba ïaishah ngi khmih lynti ïa kata.

²⁶ Kumjuh de, U Mynsiem ruh u ïarap lem ïa ka jingtlot jong ngi; namar ïa kaei ngin duwai kat ka ban dei biang, ngim tip shuh; hynrei, shisha uta U Mynsiem hi u kyrpad na ka bynta jong ngi ha ki jingud hir hir ki bym lah ong.

²⁷ Hynrei, uta keiñ uba ïit ïa ki dohnud, u ithuh kaei kata ka jingmut ka jong U Mynsiem; naba u kyrpad na ka bynta ki riewkhuid katba kum ka mon U Blei.

²⁸ Bad ngi ïatip ruh ba kiei kiei baroh ki ïatrei lem ïa ka ban pynbha ïa kita kiba ieit ïa U Blei, ïa kita keiñ ïa kiba la khot katba kum ka jingthmu jong u.

²⁹ Namar ïa kiba u la ithuh lypa, u la thmu lypa ruh ban long kiba shidur keiñ bad ka dur ka jong U Khun jong u, ba un ïoh long uba la kha nyngkong hapdeng kiba bun ki para.

³⁰ Bad ïa kiba u la thmu lypa, ïa kita u la khot ruh; bad ïa kiba u la khot, ïa kita u la pynksan ruh; te ïa kiba u la pynksan, ïa kita u la pyndonburom ruh.

Ka jingieit U Blei ha U Khrist Jisu

³¹ Kumno te ngin ïa-ong ïa kine kiei kiei ruh? Lada U Blei u long na ka bynta jong ngi, uei uta u ban ïaleh bad ngi?

³² Uta u bym shym la bynnud wat ïa la U Khun jong u hi, hynrei, u la aiti noh ïa u na ka bynta jong ngi baroh, kumno te un ym ai ei lem bad u ruh ïa kiei kiei baroh ha ngi?

³³ Uei u ban mudui ïa kiba la jied ki jong U Blei? Dei U Blei keiñ uba pynksan.

³⁴ Uei uta uba pynrem? Dei U Khrist uba la ïap, shisha kham tam keiñ uba la mihpat ruh, uba long ruh sha ka kti kamon U Blei, uba ïai-ïasaid ruh na ka bynta jong ngi.

³⁵ Uei u ban pynïakhlad noh ïa ngi na kata ka jingieit ka jong U Khrist? ka lanot lane ka shipa, lane ka jingpynshitom beiñ, lane ka jingthngan, lane ka jinglyngkhuit, lane ka jingma, lane ka waitlam?

³⁶ Kat kumba la thoh: “Na ka bynta jong me la dang pynïap ïa ngi baroh shi sngi, la ñiew ïa ngi kum ki langbrot ïa ka jingpynïap.”

³⁷ Hynrei, ha kine kiei kiei baroh keiñ ngi jop thiaw da uta uba la ieit ïa ngi.

³⁸ Namar nga ngeit skhem ba ka jingïap, lymne ka jingim, lymne ki angel, lymne ki nongsynshar, lymne kiba don bor, lymne kiei kiei ruh kiba long mynta, lymne kiei kiei ruh ki ban sa long,

³⁹ lymne ka jingjrong, lymne ka jingjylliew, lymne kaei kaei ruh kawei pat ka jingthaw, kan ym lah keiñ ban pynïakhlad noh ïa ngi na kata ka jingieit ka jong U Blei kaba ha U Khrist Jisu uba U Trai jong ngi.