Ka Shithi U Paul Sha Ki Nong Rom 6 - KA BAIBL

Kiba la ïap ha ka pop, hynrei, kiba ïai-imti ha U Khrist

¹ Aïu pat te ngin ïa-ong? Ngin ïaineh ha kata ka pop, ba kata ka jingaiei kan ïoh nang roi byllien?

² Ym kumta, em! Ma ngi kiba la ïap ïa ka pop, kumno ngin dang ïai-im shuh ha ka?

³ Ne phim ju tip, ba kat kiba na ngi, ïa kiba la ïoh pynbaptis ha U Khrist Jisu, la pynbaptis ïa ngi keiñ, ha kata ka jingïap jong u?

⁴ Namar kata keiñ, la btep lem ïa ngi bad u, da ka jingpynbaptis ha kata ka jingïap jong u: ba kat kumba la pynmih pat ïa U Khrist na ki baïap, da ka burom ka jong U Kpa, kumta ba ngi ruh, ngin ïa-ïaid ha ka jingthymmai ka jingim.

⁵ Namar, lada la pynïabsap lem ïa ngi ha ka jingsyriem kata ka jingïap jong u, kumta ruh, ngin ïoh long ha kata ka jingsyriem ka jingmihpat jong u:

⁶ ba ngi da tip ïa kane, ba la sahnarphna lem bad u, ïa u briew batymmen jong ngi, ba yn da ïoh pynjot noh ïa ka met ka jong ka pop, khnang ba ngin ym long mraw shuh ha kata ka pop.

⁷ Namar ïa uta uba la ïap, la pyllait ksan ïa u na ka pop.

⁸ Te lada ngi la ïap lem bad U Khrist, ngi ngeit skhem ba ngin im ruh lem bad u:

⁹ ba ngi da tip, ba U Khrist, haba la pynmih noh ïa u na ki baïap, un ym ïap shuh keiñ; ka jingïap kam leh don bor shuh halor jong u.

¹⁰ Namar, ha kaba u la ïap, u la ïap noh shi sien ïap keiñ namar ka pop: hynrei, ha kaba u im, u ïai-imti keiñ ha U Blei.

¹¹ Kumjuh ruh, ma phi, to ñiew ïa lade kiba la ïap keiñ ïa ka pop, hynrei, kiba ïai-imti ïa U Blei ha U Khrist Jisu uba U Trai jong ngi.

¹² Wat ai ba ka pop, namar kata, kan synshar ha ka met ka baïap jong phi, ïa ka ban kohnguh ïa ka, ha kita ki jingkwah jakhlia jong ka:

¹³ lymne wat aiti noh ïa ki dkhot met jong phi ha ka pop kum ki atiar ka jingbymhok: hynrei, to aiti noh ïa lade ha U Blei kum kiba la im na ki baïap, bad ïa kita ki dkhot met jong phi ha U Blei kum ki atiar ka hok.

¹⁴ Namar, ka pop kan ym don bor shuh halor jong phi: naba phim long hapoh ka hukum, hynrei, hapoh ka jingaiei.

Ki mraw jong ka hok

¹⁵ Kumno te? ngin ïai-leh pop, naba ngim long hapoh ka hukum, hynrei, hapoh ka jingaiei? Em, ym kumta.

¹⁶ Phim ju tip, ba ha uba phi aiti noh ïa lade kum ki mraw ïa ka ban kohnguh, phi long ki mraw keiñ ïa uta ha uba phi kohnguh; la ki jong ka pop, sha ka jingïap; lane ki jong ka jingkohnguh, sha ka hok?

¹⁷ Hynrei, to long ka jingnguh ha U Blei, ba, la phi la ju long ki mraw ki jong ka pop, hynrei, phi la jia long kiba kohnguh naduh ka dohnud ïa kata ka dur ka jinghikai ha kaba la aiti ïa phi.

¹⁸ Te ba la pyllait noh ïa phi na ka pop, la pynlong shakri ïa phi ïa ka hok.

¹⁹ Nga kren keiñ kum ka rukom briew, namar ka jingtlot ka jong ka doh jong phi: namar, kat kumba phi la aiti noh shi sien ïa kita ki dkhot met jong phi kum ki shakri ïa kaba jakhlia bad ïa ka jingbymman sha ka ban nang bymman; kumta te, mynta, to aiti noh ïa kita ki dkhot met jong phi kum ki shakri ïa ka hok sha ka jingpynkhuid.

²⁰ Namar, mynba phi la long ki mraw jong ka pop, phi la long kiba laitluid shaphang ka hok.

²¹ Te u soh aïu phi la ïoh kheit mynkata, na kita kiei kiei ruh ïa kiba phi sngewlehrain mynta? namar ka jingkut ka jong kita kiei kiei ruh, ka long ka jingïap keiñ.

²² Hynrei, mynta, ba la pyllait noh ïa phi na ka pop, bad ba la pynlong shakri ïa phi ha U Blei, phi ïoh kheit ïa u soh jong phi sha ka jingpynkhuid, bad ka bakut kan long ka jingim bymjukut keiñ.

²³ Namar ka bainong ka pop, ka long ka jingïap; hynrei, ka jingaiei ka jong U Blei, ka long ka jingim bymjukut da U Khrist Jisu uba U Trai jong ngi.