Ka Shithi U Paul Sha Ki Nong Rom 5 - KA BAIBL

Ngi don ka jingïasuk bad U Blei

¹ Namar kata, ba la pynksan ïa ngi da ka jingngeit, ngi don ka jingïasuk bad U Blei da U Trai jong ngi U Jisu Khrist;

² da u ruh, ngi la ïoh ïa ka jinglamphrang da kata ka jingngeit shapoh kane ka jingaiei ha kaba ngi ïaïeng; bad ngi sngewkmen ha ka jingkyrmen ïa ka burom U Blei.

³ Bad ym tang kumta hi keiñ, hynrei, ngi sngewkmen ruh ha ki jingjynjar, da tip biang ba ka jingjynjar ka pynlong ïa ka jingïaishah;

⁴ bad kata ka jingïaishah, ïa ka jingshem mynsiem; bad kata ka jingshem mynsiem, ïa ka jingkyrmen;

⁵ bad kata ka jingkyrmen kam ju pynrain buhkhoh keiñ; naba ïa ka jingieit U Blei la theh ïar noh buk buk ha ki dohnud jong ngi da U Mynsiem Bakhuid, ïa uba la ai noh ha ngi.

⁶ Namar, U Khrist, mynba ngi dang long ki batlot bor, hamar kaba biang ka Ïa u la ïap ïapli ïa ki bymriewblei.

⁷ Namar ym ju don eh u ban ïap ïapli ïa u bahok; hynrei, lehse don u ban da nud wat ban ïap ïapli ïa u babha sbun.

⁸ Hynrei, U Blei u pyni shynna ïa la ka jong ka jingieit sha ngi, ha kaba haba ngi dang long ki bapop, U Khrist u la ïap ïapli ïa ngi.

⁹ Te kham tam shibun, haba mynta la pynksan ïa ngi da ka snam jong u, yn pynim ïa ngi da u na kata ka jingbitar U Blei.

¹⁰ Namar lada, mynba ngi la long ki nongshun, la pynïasuk noh ïa ngi bad U Blei da ka jingïap U Khun jong u, te kham tam shibun, haba la pynïasuk ïa ngi, yn pynim ïa ngi da ka jingim jong u.

¹¹ Bad ym tang kumta, hynrei, ngi sngewkmen ruh ha U Blei hi da U Trai jong ngi U Jisu Khrist, da u, ba mynta ngi la ïoh pdiang ïa kane ka jingpynïasuk.

U Adam bad U Khrist

¹² Naba kumta keiñ, kat kumba da uwei u briew, ka pop ka la bsut sha ka pyrthei; bad da kata ka pop, ka jingïap; bad kumta, kata ka jingïap ka la wanhap ha ki bynriew baroh phar, namar ba baroh ki la leh pop:

¹³ Namar, haduh ka hukum keiñ, ka pop ka la don ha ka pyrthei; hynrei, ym ju kheiñ ïa ka pop haba ym don ka hukum.

¹⁴ Pynban, kata ka jingïap ka la synshar naduh u Adam haduh u Moses, wat halor kita ruh ki bym shym la lah leh pop ha kaba syriem ïa kata ka jingpalat u Adam, uba long ka dur jong uta u ban sa wan.

¹⁵ Hynrei, ym kum kata ka jingryngkang, kumta ruh, ka long kata ka jingaiei: namar, lada da kata ka jingryngkang jong uta uwei, kita kiba bun ki la ïap noh, da kham tam shibun keiñ kata ka jingaiei U Blei, bad kata ka jingai kaba da ka jingaiei ka jong uta uwei u briew, uba U Jisu Khrist, ki la roi kyrhai sha kita kiba bun.

¹⁶ Bad ym kat kumba da uta uwei uba la leh pop, kumta long kata ka jingaiei: namar kata ka jingkut bishar ka la jia namar uwei ïa ka ban pynrem; hynrei, kata ka jingaiei ka long namar kiba bun ki jingryngkang ïa ka ban pynksan.

¹⁷ Namar, lada da kata ka jingryngkang ka jong uta uwei, kata ka jingïap ka la synshar da uta uwei; da kham tam shibun keiñ, kita kiba pdiang ïa ka jingkynrei ka jong kata ka jingaiei, bad ka jong kata ka jingai ka jong ka hok, kin ïoh synshar ha ka jingim da uta uwei, uba U Jisu Khrist.

¹⁸ Kumta, kat kumba da kawei ka jingryngkang, kata ka jingkut bishar ka la wanhap ha ki bynriew baroh, ïa ka ban pynrem; kumta ruh, da kawei ka jinglehhok, kata ka jingaiei ka la jia ha ki bynriew baroh, sha ka jingpynksan bad ka jingim ïa baroh.

¹⁹ Namar, kat kumba da kata ka jingbymkohnguh jong uta uwei u briew, la pynlong ki bapop ïa kita kiba bun; kumta ruh, da kata ka jingkohnguh ka jong uta uwei pat, yn pynlong ki bahok ïa kita kiba bun.

²⁰ Bad ka hukum ka la rung nalor kata, khnang ba kata ka jingryngkang kan da mih byllien. Hynrei, ha kaba ka pop ka la roi byllien, ka jingaiei ka la roi kyrhai kham tam eh:

²¹ ba kat kumba kata ka pop ka la synshar sha ka ban pynïap, kumta ruh, kata ka jingaiei kan da synshar noh da ka jingpynksan sha ka ban pynim bymjukut da U Jisu Khrist uba U Trai jong ngi.