Ka Shithi U Paul Sha Ki Nong Rom 4 - KA BAIBL

Ka jingngeit u Abraham

¹ Aïu te ngin ïa-ong ba u Abraham, uba u kpa jong ngi katba kum ka doh, u la shem?

² Namar lada la pynksan ïa u Abraham na ki jingleh, u don daw ïa ka ban sngewsarong, hynrei, ym ha khmat U Blei.

³ Namar kumno kata Ka Jingthoh ka ong? “U Abraham te u la ngeit ha U Blei, bad ïa kata, la ñiew ka hok ha u.”

⁴ Te ïa uta uba trei, ïa ka bainong ym ju ñiew kum ka jingaiei, hynrei, kum ka ram.

⁵ Hynrei, ha uta u bymtrei, hynrei, uba ngeit ha uta uba pynksan ïa u bymriewblei, yn ñiew ka hok ïa ka jingngeit jong u.

⁶ Kat kumba u Dabid ruh u ïathuh shaphang ka jingsuk jong uta u briew ha uba U Blei u ñiew ïa ka hok khlem ki jingleh,

⁷ u da ong: “Suk kita kiba la ïohmap noh ïa ki jingpalat jong ki, bad kiba la ïoh tyllep noh lin ïa ki pop jong ki.

⁸ Suk uta u briew, uba U Trai un ym ñiew shuh ïa ka pop ha u.”

⁹ Kane ka jingsuk te ka jia tang ha kata ka jingotsher, ne ha kata ka jingbym-otsher ruh? namar ngi ïa-ong, ba ha u Abraham la ñiew ka hok ïa ka jingngeit jong u.

¹⁰ Ha kaba kumno te la ñiew ïa ka? mynba u long ha ka jingotsher, ne ha ka bym-otsher? ym ha ka jingotsher keiñ, hynrei, ha ka bym-otsher.

¹¹ Bad u la ïoh pdiang ïa ka dak ka jingotsher, ban long ka synjat jong kata ka hok ka jong kata ka jingngeit kaba u la don keiñ ha ka bym-otsher; khnang ba un long ma u, u kpa kita baroh kiba ngeit, la ki long ha ka bym-otsher; khnang ba yn ñiew ïa kata ka hok ha ki ruh;

¹² bad u kpa ka jingotsher ruh ha kita keiñ ki bymlong shu tang na ka jingotsher hi, hynrei, kiba da ïaid beit ruh ha ki jingjam kata ka jingngeit ka jong u Abraham uba u kpa jong ngi, kaba u la don keiñ ha ka bym-otsher.

Ka jingkular U Blei ka jia da ka jingngeit

¹³ Namar ym da ka hukum la jia kata ka jingkular ha u Abraham, ne ha u symbai jong u, ba un ïoh long ma u, u trai ka pyrthei; hynrei, da ka hok ka jingngeit.

¹⁴ Namar lada kita kiba na ka jong ka hukum ki dei ki trai, ïa kata ka jingngeit te la pynlong bymlarkam shuh, bad ïa kata ka jingkular la pynlehnohei ruh.

¹⁵ Namar kata ka hukum ka pynlong noh ïa ka jingpynbitar; namar ha ka bymdon ka hukum, hangta ym don ka jingpalat.

¹⁶ Namar kata ka long na ka jingngeit, ba kan ïoh long da ka jingaiei; khnang ba kata ka jingkular kan long skhem bha ha uta u symbai baroh; ym tang ha uta hi uba na ka jong ka hukum, hynrei, ha uta ruh uba na ka jingngeit u Abraham; uba long u kpa jong ngi baroh,

¹⁷ (kat kumba la thoh: “Nga la pynlong ïa me u kpa kiba bun ki jaid bynriew,”) ha khmat uta U Blei ha uba u la ngeit, uba pynim ïa kiba la ïap, bad uba khot ïa kita kiei kiei ruh ki bymlong, kumba ki da long.

¹⁸ Uba khlem ka jingkyrmen, pynban, u la ngeit ha ka jingkyrmen, ïa kaba un jia long ma u, u kpa kiba bun ki jaid bynriew katba kum kata ïa kaba la ong: “Kumta uta u symbai jong me un long.”

¹⁹ Bad da kaba u long bymtlot ha ka jingngeit, um shym la ñiew ïa la ka met ba la lah kylla sdot noh lypa, haba u la long jin shispah snem ka rta, lymne ïa kata ka jingkylla sdot noh ka kpoh ka Sara;

²⁰ bad da kaba u khmih ha kata ka jingkular ka jong U Blei, um shym la lyngngoh artatien da ka jingbymngeit; hynrei, la pynkhlaiñ ïa u ha kata ka jingngeit, u da pyndonburom ïa U Blei;

²¹ haba u la sngewskhem ruh ba kat kaba u la lah kular, u don bor ïa ka ban pyndep ruh.

²² Namar kata te, “la ñiew ka hok ïa kata ha u.”

²³ Hynrei, ym shym la thoh ïa kata tang na ka bynta jong u hi, ba la ñiew ïa kata ha u;

²⁴ hynrei, na ka bynta jong ngi ruh ha kiba yn sa ñiew ïa ka, ha kita keiñ kiba ngeit ha uta uba la pynmih pat ïa U Jisu uba U Trai jong ngi na ki baïap;

²⁵ ïa uba la aiti noh na ka bynta ki jingpalat jong ngi, bad ïa uba la pynmih pat na ka bynta ka jingpynksan jong ngi.