Ka Shithi U Paul Sha Ki Nong Rom 3 - KA BAIBL

¹ Ka jingmyntoi tam aïu te ka long ka jong u Jiw? Lane ka myntoi aïu ka jingotsher?

² Shibun la ha kano kano ka rukom, kham tam eh naba ha ki la ai pynrieh ïa ki ktien ki jong U Blei.

³ Kumno te lada don ki bym shym la ngeit? Kata ka jingbymngeit jong ki kan pyndam noh ïa ka jingïaineh skhem ka jong U Blei?

⁴ Ym kumta em! Hynrei, to ai ba yn ñiew ïa U Blei uba shisha, la u briew baroh u long uba lamler; kumba la thoh: “Ba yn lah pynksan ïa me ha ki ktien jong me, bad ba men lah thiaw haba yn bishar ïa me.”

⁵ Hynrei, lada ka jingbymhok jong ngi, ka pyni shai noh ïa ka hok U Blei, kaei ngin ïa-ong? U Blei u long u bymhok ne em, uba pynhap ïa la ka jingbitar? (Nga kren katba kum ka rukom briew.)

⁶ Ym kumta, em! namar haba kumta, kumno U Blei un bishar ïa ka pyrthei?

⁷ Hynrei, lada kata ka jingshisha ka jong U Blei, da kata ka jinglamler jong nga ka la ïoh roi kham tam sha ka burom jong u, hato balei ba dang bishar ïa nga ruh, kum u bapop?

⁸ Shisha balei ym ong noh syndon (kat kumba la kynnoh beiñ ïa ngi, bad kumba don kiba ïathuh skhem ba ngi ong), “Ïa, ngin leh ïa ka basniew ba ka babha kan ïoh jia?” kiba ka jingpynrem jong ki ka long kaba hok.

Ym don uwei ruh u bahok

⁹ Kumno te? ka jinglong jong ngi ka kham sniew ban ïa ka jong ki? Em, haba da lei lei ruh: namar mynshuwa ngi la ong skhem ba ki Jiw ruh bad ki Grik ki long baroh hapoh ka pop.

¹⁰ Kumba la thoh: “Ym don u bahok, em, ym don uwei ruh;

¹¹ ym don uba shemphang, ym don keiñ uba wad ïa U Blei;

¹² baroh ki la ïasakma noh, ki la ïakylla bymmyntoi lang noh; ym don uba leh babha, ym don wat uwei ruh;

¹³ ka ryndang jong ki ka long ka jingtep ba ang ryngheng; da ki thylliej jong ki, ki ju shukor; ka bih 'seiñïong ka long hapoh ki rmiang shyntur jong ki:

¹⁴ kiba ka shyntur jong ki ka dap da ka jingtim bad da ka jingkthang:

¹⁵ ki kjat jong ki, ki long kiba stet ïa ka ban pynmih noh ïa ka snam;

¹⁶ ka jingpynjot bad ka jinglanot ki long ha ki lynti jong ki;

¹⁷ bad ïa ka lynti ka jingpynsuk kim shym la ithuh:”

¹⁸ “Ym don ka jingsheptieng ïa U Blei ha pyrshah ki khmat jong ki.”

¹⁹ Te ngi ïatip biang ba ïa kiei kiei ruh, kat kiba ka hukum ka ong, ka kren ha kita keiñ, kiba hapoh kata ka hukum; ba kumta, yn ïoh pynsngap noh jar ïa ka shyntur baroh, bad ba ka pyrthei baroh kan long hapoh ka jingpynrem U Blei.

²⁰ Naba kumta, na ki jingleh ka hukum, yn ym pynksan ïa kawei ka doh ha khmat jong u; namar da ka hukum, long ka jingtip ïa ka pop.

La pynksan ïa u briew da ka jingngeit

²¹ Hynrei, mynta, la pynpaw shynna ïa ka hok U Blei khlem ka hukum, ba la phla shai noh ïa ka, da kata Ka Hukum bad da Ki Nongïathuhlypa;

²² kata ka long ka hok U Blei kaba da ka jingngeit ha U Jisu Khrist, ïa kita baroh bad ha kita baroh kat kiba ngeit; namar ym don shuh ka jingïapher;

²³ namar baroh ki la leh pop, bad ki la duh lehnohei ïa ka burom ka jong U Blei;

²⁴ ïa kiba la pynksan ei da ka jingaiei jong u keiñ, da kata ka jingsiewspah kaba ha U Khrist Jisu;

²⁵ ïa uba la buh paw U Blei ban long ka jingpynïasuk da ka jingngeit ha ka snam jong u, ban pynpaw ïa ka hok jong u, na ka bynta kaba map ïa kita ki pop ïa kiba la leh mynshuwa, ha ka jingïaishah ka jong U Blei;

²⁶ ïa ka ban pynpaw ïa ka hok jong u ha kane ka por kaba mynta, ba un long u bahok, bad uba pynksan ruh ïa uta uba don ka jingngeit ha U Jisu.

²⁷ Hangno te ka jingsngewsarong? La khang noh khop ïa ka. Da kano ka rukom? da ka jong ki jingleh? Em keiñ; hynrei, da ka rukom ka jingngeit.

²⁸ Namar kata, ngi ïakut nia noh ba pynksan ïa u briew da ka jingngeit khlem ki jingleh ka hukum.

²⁹ Lane U Blei u long tang u jong ki Jiw hi? Um long u jong ki Jentil ruh? Ho-oid keiñ, u jong ki Jentil ruh:

³⁰ naba U Blei u long uwei, u ban pynksan ïa uba la otsher na ka jingngeit, bad ïa u bym la otsher ruh da ka jingngeit.

³¹ Te ngi ïa-pyndam noh ïa ka hukum da kane ka jingngeit? Ym kumta, em! hynrei, shisha ngi ïa-pynskhem ïa ka hukum.