Ka Shithi U Paul Sha Ki Nong Rom 2 - KA BAIBL

Ka jingbishar hok U Blei

¹ Naba kumta, me long uba khlem jingkren ksan, A u briew, la me long uei uei ruh, me uba bishar; namar ha kata hi ha kaba me bishar ïa uwei pat, me pynrem ïa lade; namar ba me uba bishar, me ïai-leh ïa kita kijuh kiei kiei ruh.

² Bad ngi ïatip skhem ba ka jingkut bishar U Blei ka long katba kum ka jingshisha, pyrshah ïa kita kiba ïai-leh kat kita kiei kiei ruh.

³ Hynrei, me mut ïa kane, A u briew, me uba bishar ïa kita kiba ïai-leh kat kita kiei kiei ruh, bad haba me leh hi ïa kita kijuh, ba ma me men ïohlait noh na kata ka jingpynrem ka jong U Blei?

⁴ Ne me ñiewbeiñ ïa ka jingkynrei ka jingsbun, bad ka jingïaishah, bad ka jingshahslem ruh ka jong u, khlem da pyrkhat satia ba kata ka jingsbun ka jong U Blei ka thew ïalam ïa me sha ka jingkylla-ka-bamut?

⁵ Hynrei, katba kum kata ka jinglong eh ka jong me bad ka dohnud bymkylla-ka-bamut, me ïaikynshew ïa lade ka jingbitar ïa kaba akher ka sngi ka jingbitar, bad ka jingpynpaw ïa ka jingbishar hok ka jong U Blei;

⁶ U ban ai nong ha uwei pa uwei u briew katba kum ki jingleh jong u;

⁷ ha kita keiñ, kiba da ka jingïaineh minot ha kaba leh babha, ki wad sliang ïa ka jinglong burom bad ïa ka burom bad ïa ka jingbymïap, un ai ka jingim bymjukut:

⁸ hynrei, ha kita kiba leh kiat, bad ki bymkohnguh ïa ka jingshisha, hynrei, kiba kohnguh ïa ka jingbymhok, yn long ka jingbitar bad ka jingbitar baïaibat.

⁹ Ka jingjynjar bad ka jingsngewpisa yn long ha ka mynsiem baroh jong u briew uba da ïai-leh ïa ka basniew, ka jong u Jiw nyngkong, bad ka jong u Grik ruh;

¹⁰ hynrei, ka jinglong burom bad ka burom bad ka jingsuk yn long ha u briew baroh uba da ïai-leh ïa ka babha, ha u Jiw nyngkong, bad ha u Grik ruh.

¹¹ Namar ym don ka jingñiew shiliang khmat ha U Blei.

¹² Namar kat kiba la leh pop khlem ka hukum, kin jot ruh khlem ka hukum; bad kat kiba la leh pop hapoh ka hukum, yn bishar ïa ki da ka hukum;

¹³ namar ym dei ki nongsngew ïa ka hukum kiba long ki bahok ha khmat U Blei, hynrei, ïa ki nongleh keiñ ïa kata ka hukum yn pynksan.

¹⁴ Namar haba ki Jentil ki bymdon ka hukum, ki leh na la ka kynja tynrai ïa kiei kiei ruh ki jong kata ka hukum, kine, haba kim don ka hukum, ki long ka hukum ïa lade hi;

¹⁵ ha kaba ki ïa-pyni ïa ka jingleh ka jong kata ka hukum ba la shab ha ki dohnud jong ki, ka jingïatiplem jong ki ruh ka phla shai ryngkat, bad ki jingpyrkhat jong ki markylliang paralok hi, ki da ïamudui lane ki da ïasaid pynksan ïa ki;

¹⁶ ha kaba akher ka sngi, ynda U Blei un bishar kut ïa kiei kiei kiba rieh ki jong ki briew da U Jisu Khrist, katba kum ka gospel jong nga.

Ki Jiw bad ka Hukum

¹⁷ Ha khmih, ïa me la kyrteng “Jiw”, bad me shaniah ha kata ka hukum, bad me sngewsarong ha U Blei,

¹⁸ bad me tip ïa ka mon jong u, bad me nang bishar shai ïa kita kiei kiei ruh kiba shong pher, ba la hikai ïa me na ka jong ka hukum.

¹⁹ Te me sngewskhem ba me long hi u nongïalam lynti jong ki bamatlah, ka jingshai ka jong kita kiba ha ka jingdum,

²⁰ u nongpynstad u jong ki babieit, u nonghikai jong ki khunlung, uba ha kata ka hukum me don ka dur ka jong ka jingtip bad ka jong ka jingshisha.

²¹ Me te uba hikai ïa uwei pat, mem hikai ïa lade? me uba ïalap ban ym tuh, me hi me tuh?

²² Me uba ong ban ym klim, me hi me klim? me uba ijli ïa ki bleithaw, me hi me tuh kyntang?

²³ Me uba sngewsarong ha ka hukum, da la ka jingryngkang ïa kata ka hukum me hi me pynjahburom ïa U Blei?

²⁴ “Namar ïa ka kyrteng U Blei la krenbeiñ hapdeng ki Jentil na ka bynta jong phi,” kumba la thoh.

²⁵ Namar ka jingotsher ka pynmyntoi shisha, lada me sumar biang ïa ka hukum; hynrei, lada me long u nongryngkang ïa ka hukum, kata ka jingotsher jong me, ka la kylla long keiñ, ka jingbym-otsher.

²⁶ Namar kata, lada kata ka jingbym-otsher ka sumar biang ïa ki jingbuh rukom ki jong kata ka hukum, hato yn ym ñiew ïa kata ka jingbym-otsher jong u, kum ka jingotsher?

²⁷ Hato kan ym long ruh ba kata ka jingbym-otsher kaba na la ka kynja tynrai, lada ka la pyndep ïa kata ka hukum, kan bishar ïa me, uba bad ka dak bad ka jingotsher ruh, me long u nongryngkang ïa ka hukum?

²⁸ Namar uta um long u Jiw uba tang ha kaba paw; lymne kata kam long ka jingotsher kaba ha kaba paw, ha ka doh;

²⁹ hynrei, uta u long u Jiw uba long kumta ha kaba rieh; bad ka jingotsher ka long kata ka jong ka dohnud, ha ka mynsiem ym ha ka dak keiñ; uba ka jingïaroh jong u, kam long na ki briew, hynrei, na U Blei.