Ka Shithi U Paul Sha Ki Nong Rom 16 - KA BAIBL

Ki jingkhublei na u Paul

¹ Te nga aiti ïaroh ha phi ïa ka Phibi ka parabangeit jong ngi, kaba long ka basan jong ka balang kaba ha Kenkhria:

² ba phin ïoh pdiang sngewbha ïa ka ha U Trai, kumba dei biang ïa ki riewkhuid, bad ba phin ïarap ïa ka ha kaei kaei ruh ka kam kat kaba ka sngewdonkam na phi; namar ma ka hi ruh, ka la long ka nongsumar ïa kiba bun, bad ïa nga hi ruh.

³ To khublei ïa ka Priskila bad ïa u Akwila, ki lok baïatrei lem jong nga ha U Khrist Jisu,

⁴ kiba la ïa-pynshah ïa la ki jong ki ryndang na ka bynta ka jingim jong nga; ha kiba nga ainguh ym tang ma nga hi, hynrei, kita ki balang baroh ki jong ki Jentil ruh.

⁵ To khublei ruh ïa ka balang kaba ha ïing jong ki. To khublei ïa u Epainetos u hep ba-ieit jong nga, uba long u soh nyngkong ka Asia ha U Khrist.

⁶ To khublei ïa ka Mari, kaba la trei minot shibun ïa ngi.

⁷ To khublei ïa u Andronikos bad ïa u Junias, ki kur jong nga bad ki para basah byndi lem jong nga; kiba long bapawnam babha hapdeng ki apostol, kiba la long ruh ha U Khrist mynshuwa jong nga.

⁸ To khublei ïa u Amplias, u hep ba-ieit jong nga ha U Trai.

⁹ To khublei ïa u Urbanos, u lok baïatrei lem jong ngi ha U Khrist, bad ïa u Stakhus u hep ba-ieit jong nga.

¹⁰ To khublei ïa u Apellis, ïa uba la tynjuh ha U Khrist. To khublei ïa kita kiba na ïing u Aristobulos.

¹¹ To khublei ïa u Herodion u kur jong nga. To khublei ïa kita kiba na ïing u Narkissos, kiba long ha U Trai.

¹² To khublei ïa ka Truphina bad ïa ka Truphosa, kiba trei minot keiñ ha U Trai. To khublei ïa ka Persis ïa kaba la ieit eh, kaba la trei minot shibun eh keiñ ha U Trai.

¹³ To khublei ïa u Rouphos ïa uba la jied ha U Trai, bad ïa ka kmie jong u bad jong nga.

¹⁴ To khublei ïa u Asonkritos, ïa u Phlegon, ïa u Hermes, ïa u Patrobas, ïa u Hermas, bad ïa kita ki parabangeit kiba don lem bad ki.

¹⁵ To khublei ïa u Philologos bad ka Julia, ïa u Nireus bad ïa ka para jong u, bad ïa u Olumpas, bad ïa kita ki riewkhuid baroh kiba don lem bad ki.

¹⁶ To ïakhublei paralok hi da ka jingïadoh bakhuid. Ki balang ki jong U Khrist baroh ki ïakhublei ïa phi.

¹⁷ Ruh putet, nga kyrpad ïa phi, ko parabangeit, ban khmih thuh ïa kita kiba pynlong ïa kita ki jingïakhlad bad ïa kita ki jingjynthut, da kumwei pat ïa kata ka jinghikai ïa kaba phi la ïoh nang ma phi; bad to kiar noh na ki.

¹⁸ Namar kiba kum kita, kim shakri ïa U Jisu Khrist uba U Trai jong ngi, hynrei, ïa la ka jong ka kpoh; bad da ka ktien jali ja-um bad ka ktien ïaroh arsap, ki ïashukor ïa ki dohnud jong kiba lui lui.

¹⁹ Namar ïa ka jingkohnguh jong phi la bna sha ki briew baroh. Nga sngewkmen, namar kata, shaphang jong phi; hynrei, nga kwah ïa phi ban long ki bastad shisha shaphang ka babha, bad kiba lui lui shaphang ka basniew.

²⁰ Te U Blei ka jingsuk un pynlwet jin shen shen keiñ ïa uta u Soitan hapoh ki kjat jong phi! ka jingaiei ka jong U Jisu Khrist uba U Trai jong ngi to kan long lem bad phi.

²¹ U Timothi u lok baïatrei lem jong nga, bad u Lukios, bad u Jason, bad u Sosipatros, ki kur jong nga, ki ïakhublei ïa phi.

²² Ma nga u Tertios, uba la thoh ïa kane ka shithi, nga khublei ïa phi ha U Trai.

²³ U Gaïos u lok bakhot shong sngewbha ïa nga bad ïa ka balang baroh kawei, u khublei ïa phi. U Erastos u nongsumar jingkynshew kane ka nongbah, bad u Kuartos u parabangeit, ki khublei ïa phi.

²⁴ Ka jingaiei U Jisu Khrist uba U Trai jong ngi to kan long lem bad phi baroh: Amen.

Ka jingkyrkhu pynwai

²⁵ Te mynta, ha uta uba lah ban pynneh skhem ïa phi katba kum kata ka gospel jong nga, bad kata ka jingïalap ïa U Jisu Khrist, katba kum ka jingpynpaw ïa ka jingmaïan ba la ri jar jar na ki rta ba mynhyndai kulong,

²⁶ hynrei, mynta, la pynpaw shynna ïa ka, bad da ki jingthoh ki nongïathuhlypa, katba kum ka hukum ka jong U Blei Bymjukut, la pyntip ïa ka ha ki kynja bynriew baroh khnang ïa ka jingkohnguh ïa ka jingngeit:

²⁷ ha U Blei, u bastad tang ma u hi, ha une keiñ, da U Jisu Khrist, to kan long ka burom sha ki bymjukut: Amen.