Ka Shithi U Paul Sha Ki Nong Rom 14 - KA BAIBL

Wat bishar ïa la u parabangeit

¹ Te phin shim lok ha lade ïa uta uba long tlot ha la ka jingngeit, hynrei, ym sha ka ban ïasaid pynrem ïa ki jingmut kyndiah jong u.

² Namar uwei u ngeit ba u bit ban bam ïa kiei kiei baroh; hynrei, uta u batlot u bam tang ïa ki jhur.

³ Me uba bam, wat ñiewbeiñ noh ïa uta u bym bam; lymne me u bym bam, wat pynrem ïa uta uwei uba bam; namar U Blei u la pdiang ïa u.

⁴ Te ma me, me long uei, ba me bishar ïa u shakri jong uwei pat? Ha la U Kynrad hi keiñ u ïeng, ne u kyllon. Hynrei, yn pynïeng ïa u keiñ; namar U Blei u long uba lah eh ban pynïeng skhem ïa u.

⁵ Uwei u kham ñiewkor ïa kawei ka sngi ban ïa kawei pat ka sngi; uwei pat te u ñiewkor ryngkat ïa ki sngi baroh. To long uwei uwei baroh ba la sngew-kut-nia skhem ha la ka jong ka jong ka jingmut hi.

⁶ Uta uba ñiew ïa kata ka sngi, u ñiew keiñ ha U Trai. Kumjuh uta uba bam, u bam keiñ ha U Trai, namar u ainguh ha U Blei; bad uta u bym bam, um bam keiñ ha U Trai, kumjuh ruh u ainguh ha U Blei.

⁷ Namar ym don uwei na ngi uba im kynti ïa lade, bad ym don uwei uba ïap kynti noh ïa lade.

⁸ Namar la ngi ïoh im te, ngi im keiñ ha U Trai; lane la ngi ïap ruh, ngi ïap keiñ ha U Trai; namar kata te, la ngi im ne la ngi ïap ruh, ngi long ki jong U Trai.

⁹ Namar ïa kane khnang U Khrist u la ïap noh ruh, bad u la im pat, ba un ïoh long U Trai halor ki baïap bad ki ba-im ruh.

¹⁰ Hynrei, me balei me bishar ïa la u parabangeit? lane balei ruh me ñiewbeiñ ma me ïa la u parabangeit? namar ngi baroh ngin ïeng ha khmat ka khet bishar ka jong U Blei.

¹¹ Namar la thoh: “Katba nga im,” ong U Trai, “ka khohsiew baroh kan dem khrup ha nga, bad u thylliej baroh un phla ha U Blei.”

¹² Naba kumta te uwei pa uwei na ngi un ai jingkheiñ shaphang ïa lade hi ha U Blei.

Wat long ka daw ka jingjynthut

¹³ Namar kata, wat ai ba ngin bishar shuh paralok hi; hynrei, phin kham kut bishar ïa kane, ïa ka ban ym buh ïa ka jingjynthut ïa la u parabangeit, lane ïa ka daw ban kyllon.

¹⁴ Nga tip biang, bad nga sngewskhem da U Jisu uba U Trai, ba ym don kaei kaei ruh ka basang na lade hi; tang ïa uta uba ñiew sang ïa kaei kaei ruh, ïa uta keiñ ka sang.

¹⁵ Hynrei, lada la pynsngewsih ïa uta u parabangeit jong me na ka bynta i jingbam, mem ïaid shuh katba kum ka jingïa-ieit. Wat pynjot noh da ita i jingbam jong me ïa uta uba na ka bynta jong u, U Khrist u la ïap noh.

¹⁶ Namar kata te, wat ai ba yn krenbeiñ ïa kata ka babha jong phi;

¹⁷ namar ka hima ka jong U Blei kam long keiñ kaba bam bad kaba dih; hynrei, ka hok, bad ka jingïasuk, bad ka jingkmen ha U Mynsiem Bakhuid.

¹⁸ Namar uta uba shakri ïa U Khrist ha kine kiei kiei ruh, u long uba la pynsngewbha eh ïa U Blei bad ba la pdiang hun da ki briew.

¹⁹ Naba kumta te, ïa, ngin ïabeh brai ïa kita kiei kiei ruh ki jong kata ka jingïasuk, bad ïa kita kiei kiei ruh da kiba ngin ïatei paralok hi.

²⁰ Na ka bynta ka jingbam, to wat lied noh ïa ka jingleh ka jong U Blei. Kiei kiei baroh shisha ki long ki bakhuid; hynrei, ka long ka basniew keiñ ïa uta u briew uba da bam da ka jingsngewthut.

²¹ Ka long ka babha keiñ ïa ka ban ym bam ïa ka doh, lane ban ym dih ïa ka Waiñ, lane ban ym leh ei ei ruh da kaba u parabangeit jong me u da thut, lane u da jynthut, lane u da sngewtlot.

²² Me don ka jingngeit? to ri khop ïa ka ha lade ha khmat U Blei. Suk uta u bym pynrem ïa lade ha kata ïa kaba u mynjur.

²³ Hynrei, uta uba sngew-artatien, lada u bam, la pynrem ïa u, naba um shym bam na ka jingngeit: te kaei kaei baroh ka bymlong na ka jingngeit, ka long pop keiñ.