Ka Shithi U Paul Sha Ki Nong Rom 13 - KA BAIBL

Ka kamram sha ki nongsynshar

¹ To ai ba ka mynsiem baroh kan pynhapoh ïa lade ha ki bor kiba ha khlieh. Namar ym don kano kano ruh ka bor lymda na U Blei; te kita ki bor kiba don, la buh beit ïa ki da U Blei keiñ.

² Kumta keiñ, uno uno ruh uba ïeng ïaleh pyrshah ïa kata ka bor, u ïaleh pyrshah ïa kata ka jingbuh beit ka jong U Blei; te kita kiba ïeng ïaleh kumta, kin ïoh pdiang ïa ka jingpynshitom ha lade hi.

³ Namar kita ki nongsynshar kim long ka jingshyrkhei ïa ki jingleh babha, hynrei, ïa ki bymman. Me mon te ban ym sheptieng ïa kata ka bor? To leh te ïa ka babha, kumta men ïoh ka jingïaroh na ka;

⁴ namar uta u long u shakri U Blei khnang ïa ka ban pynbha ïa me. Hynrei, lada men leh ïa ka basniew, to sngewshyrkhei me; namar um ju rah lehnohei keiñ ïa ka waitlam; namar u long u shakri U Blei, u nongpynhiar kput keiñ khnang ïa ka jingpynshitom ha uta uba leh ïa ka basniew.

⁵ Naba kumta, ka la dei keiñ ïa phi ban pynhapoh ïa lade, ym tang namar kata ka jingbitar hi, hynrei, na ka bynta ka jingïatiplem ruh.

⁶ Namar na ka bynta kane hi phi ai khajna ruh; namar ki long ki shakri U Blei, kiba ïaiminot khnang ïa kane kajuh hi ka kam.

⁷ To ai noh ha ki briew baroh ïa ka hok jong ki; ka khajna ha uba ïoh ka khajna; ka khrong ha uta uba ïoh ïa ka khrong; ka jingsheptieng ha uba dei ban ïoh ka jingsheptieng; ka burom ha uba dei ban ïoh burom.

Ha ka jingïadei paralok

⁸ Phi wat kit ram ei ei nano nano ruh, hynrei, tang ïa ka ban ïa-ieit paralok hi; namar uta uba ieit ïa uwei pat, u la pyndep keiñ ïa ka hukum.

⁹ Namar kane, “Men ym klim, Men ym pynïap, Men ym tuh, Men ym sakhi lamler, Men ym ikwah”; lada don ruh kano kano kawei pat ka hukum, la kup kyllum ïa ka ha kane ka jingong, ha kane keiñ, “Men ieit ïa la u paramarjan kumba ïa lade.”

¹⁰ Ka jingieit kam ju trei ïa ka basniew ha la u paramarjan: ka jingieit, namar kata, ka long ka jingpyndep ïa ka hukum.

Ka jingpynim ka kham hajan ïa ngi mynta

¹¹ Bad ïa kane, haba ngi ithuh ïa ka Ïa, ba mynta, la dap biang ka por ïa ngi ban khie joit na kaba ïohthiah; namar mynta, ka jingpynim ka kham hajan ïa ngi ïa kaba mynba ngi la ngeit.

¹² Ka miet katta ka la nang dier noh shibun, te ka sngi ka la jan; namar kata, to ngin ïabred noh ïa kita ki jingleh jong ka jingdum; bad to ngin ïakieng noh ïa ki atiar ka jingshai.

¹³ To ngin ïa-ïaid da leh don akor, kumba ha pyrshah ka sngi; ym ha ki jingïadih kyiad khynwin bad ha ki jingïabuaid, ym ha ki jingïakai kynthei bad kiba ïanuti jakhlia, ym ha kaba ïamai bad kaba ïa-pihuiñ.

¹⁴ Hynrei, to kup phi ïa U Jisu Khrist uba U Trai, bad wat sumar sukher lypa ïa ka jong ka doh, khnang ïa ka ban pynbrai ïa ki jingkwah bymman jong ka.