Ka Shithi U Paul Sha Ki Nong Rom 12 - KA BAIBL

Ka jingim ka bathymmai ha U Khrist

¹ Namar kata, nga kyrpad ïa phi, ko parabangeit, na kita ki jingisynei ki jong U Blei, ban aiti noh ïa ki met jong phi kum ka jingkñia ba-im, bakhuid, bad ba pynsngewbha eh ïa U Blei, kaba long keiñ ka jingshakri bakynja mynsiem jong phi.

² Bad to wat pynsyriem ryngkat ïa lade bad kane ka pyrthei; hynrei, to pynkylla dur noh ïa lade keiñ da ka jingpynthymmai ïa ka jingmut jong phi, khnang ba phin ïoh tip kaba kumno ka long ka mon ka jong U Blei, ka babha, bad kaba pynsngewbha eh, bad ka bajanai de.

³ Namar nga ong, da kata ka jingaiei ïa kaba la ai ha nga, ïa uwei pa uwei uba long hapdeng jong phi ban ym ñiew kham kor ïa lade nalor kaba ka dei ïa u ban ñiew; hynrei, ban ñiew adkar ïa lade, kat kumba U Blei u la sam ïa ka jingthew ka jingngeit ha uwei pa uwei.

⁴ Namar kat kumba ha kawei ka met ngi don shibun ki dkhot, hynrei, kita ki dkhot baroh kim ïadon kajuh ka jingkam;

⁵ kumjuh ma ngi, la ngi long shibun, ngi long kawei ka met ha U Khrist, bad uwei pa uwei ki ïalong ki dkhot ki jong ki paralok hi.

⁶ Te ba ngi don ki jingai kiba ïapher katba kum kata ka jingaiei ïa kaba la sam ha ngi, la ka long ka jingïathuhlypa, to ngin ïathuhlypa katba ka shong kata ka jingthew jong ka jingngeit;

⁷ la ka long ka jingshakri, to ngin minot ha kata ka jingshakri; la ka long uta uba hikai, to un minot ha kata ka jinghikai;

⁸ lane uta uba sneng, to un minot te ha kata ka jingsneng; lane uta uba ïasam, to un leh kumta da ka jingkylluid sngur; lane uta uba synshar, un leh kumta da ka jingleh minot; uta uba leh isynei, un leh kumta da ka jingkmen.

Bad ki jingsneng kyntu

⁹ To ka jingieit kan long kaba khlem arsap. To kiar noh sngewtriem na kata ka basniew, to snoh ha kata ka babha.

¹⁰ Ha ka jingïa-ieit parabangeit, to long kiba ïa-ieit noh paralok hi; ha ka jingïañiew burom, to long kiba ïañiew kor paralok hi;

¹¹ ha ka jingleh minot, to wat long kiba alhia; kiba shitrhem ha ka mynsiem, kiba shakri ïa U Trai;

¹² kiba kmen ha ka jingkyrmen; kiba ïaishah ha ka jingjynjar; kiba ïaineh minot ha ka jingduwai;

¹³ ha ki jingkyrduh jong ki riewkhuid kiba ïasam isynei; kiba ïabeh brai ïa ka jingkhot ieit basa.

¹⁴ To kyrkhu ïa kita kiba lehbeiñ ïa phi; to phin kyrkhu keiñ, bad wat tim phi.

¹⁵ To ïakmen lem bad kita kiba ïakmen, to ïaïam lem bad kita kiba ïam.

¹⁶ To long kiba ïamut ïa kajuh paralok hi; to wat ïaimut brai ïa kiei kiei ruh ki jinglong meng, hynrei, to pynryngkat ïa lade bad ki barit. Wat long phi kiba tharai stad ïa lade hi.

¹⁷ Wat leh markylliang hano hano ruh ïa ka basniew namar ka basniew; to pyrkhat lypa ïa kiei kiei ruh ki babha tynnad ha khmat ki briew baroh;

¹⁸ lada long kaba lah, katba shong kata ha phi to long kiba ïashong suk noh bad ki briew baroh.

¹⁹ Wat long ma phi hi kiba pynhiar kput, ko ki hep, hynrei, phin ai jaka ïa ka jingbitar U Blei, namar la thoh: “Ka jingpynhiar kput ka long ka jong nga hi, ngan leh kylliang ma nga,” ong U Trai.

²⁰ “Hynrei, lada u nongshun jong me u thngan, men bsa ïa u, lada u sliang, men ai dih ïa u; namar da kaba leh kumta, men kynton ïa ki rnga ding barhem halor ka khlieh jong u.”

²¹ Wat ai ba yn jop noh ïa me da ka jong ka basniew, hynrei, to jop noh ma me ïa ka basniew da ka babha.