Ka Shithi U Paul Sha Ki Nong Rom 11 - KA BAIBL

I bynta ba sah

¹ Nga kylli te: U Blei u la kyntait noh khoit ïa uta u paidlang jong u? Em, kam long kumta! Namar nga ruh, nga long u kynja Israel, na u symbai u Abraham, na ka jaid Benjamin.

² U Blei um shym la kyntait noh khoit ïa uta u paidlang jong u ïa uba u la ithuh lypa. Ne phim tip ïa kaei kaba ong Ka Jingthoh shaphang u Elias? kumno u leit kyrpad pyrshah ïa ki Israel ha U Blei, u da ong:

³ “A Trai, ki la ïa-pynïap noh ïa ki nongïathuhlypa jong me, bad ki la ïakynrang pynkyllon ïa ki duwan jong me; bad la pynsah sa tang ïa nga marwei, bad ki ïawad ïa ka mynsiem jong nga ruh.”

⁴ Hynrei, kata ka jingpynphai ktien ka jong U Blei ka ong kumno ha u? “Nga la pynsah ha lade hi hynñiew hajar ki rangbah, ki bym shym la dem khohsiew ha u Baal.”

⁵ Kumjuh te ha ka pyrthei sngi kaba mynta ruh, don i bynta basah katba kum ka jingjied ka jingaiei.

⁶ Te lada ka long da ka jingaiei, kam long shuh na ki jingleh; la ym kumta, kata ka jingaiei kam long shuh ka jingaiei.

⁷ Kumno te? Ïa kaba ki Israel ki wad khnang, ïa kata pleng kim shym la shem; hynrei, kata ka jingjied ka la shem keiñ; hynrei, ïa kita kiba sah, la pyneh noh;

⁸ kat kumba la thoh: “U Blei u la ai ha ki, ïa ka mynsiem ka jingïohthiah lyngngai, ïa ki khmat ïa ka ban ym ïohi bad ïa ki shkor ïa ka ban ym ïohsngew, haduh kane ka sngi keiñ.”

⁹ Bad u Dabid u ong: “To ai ba ka miej jong ki kan long ka jingriam, bad ka jingpynngat, bad ka jingjynthut, bad ka kput kylliang de ha ki.

¹⁰ To ai ba yn pyndum ïa ki khmat jong ki ba kin ym ïohi, bad to pyn'dor ryngkhung ma me ïa ka ingdong jong ki ha la ka sngi.”

Ka jingpynim ïa ki Jentil

¹¹ Nga kylli te: Shisha ki la ïajynthut khnang ban ïahap duh noh? Em, ym kumta! Hynrei, pleng da kata ka jingryngkang jong ki, kata ka jingpynim ka la jia ha ki Jentil, ïa ka ban pynsngewpihuiñ ïa ki.

¹² Te lada kata ka jingryngkang jong ki, ka jia long ka jingmanbha ïa ka pyrthei; bad kata ka jingduh jong ki, ka jia long ka jingmanbha ïa ki Jentil; hato kaba katno tam keiñ kan long ka jingdap jong ki?

¹³ Hynrei, nga kren ha phi ki Jentil, namar haba nga long ma nga te u apostol ki Jentil, nga pyndonburom ïa kata ka kam jong nga;

¹⁴ lada lah kumno re kumno ba ngan da ïoh pynsngewskuiñ ïa i doh i snam jong nga, bad ba ngan ïoh pynim ïa kiba na ki.

¹⁵ Namar lada kata ka jingkyntait noh ïa ki, ka jia long ka jingpynïasuk ïa ka pyrthei; kaei te kan long kata ka jingpdiang ïa ki, tang ka jingim na ki baïap?

¹⁶ Bad lada u soh nyngkong u long u bakyntang, kumjuh ruh, ka long kata ka shi lynglun; bad lada u tynrai u long u bakyntang, kumjuh ruh, kin long ki tnat.

¹⁷ Hynrei, lada la pynkheiñ noh ïa kiba na kita ki tnat, bad la pynïadait ïa me uba long u tnat Olib khlaw hapdeng jong ki, bad la pynlong ïa me u nongïaïoh lem na u tynrai bad na ka khleiñ ka jong uta u dieng Olib;

¹⁸ me wat leh risa halor kita ki tnat: hynrei, lada me leh risa ruh, mem bah ma me ïa uta u tynrai; hynrei, uta u tynrai ïa me.

¹⁹ Men ong te, “La pynkheiñ noh ïa kita ki tnat, ba yn ïoh pynïadait ïa nga.”

²⁰ Ñiuma; hynrei, la pynkheiñ noh ïa ki, da ka jingbymngeit, bad me ruh me ïai-ïeng da ka jingngeit. Me wat sngewmeng, hynrei, to sheptieng;

²¹ namar lada U Blei um shym la riej shuh ïa kita ki tnat trai, un ym riej ïa me ruh.

²² Ha khmih te ïa ka jingsbun bad ïa ka jinglehhok ki jong U Blei; sha kita kiba la hap noh, shisha ka jinglehhok; hynrei, sha me, ka jingsbun U Blei, lada men ïaineh ha kata ka jingsbun jong u; lymda kumta, ïa me ruh yn ot noh keiñ.

²³ Bad ïa ki ruh, lada kim da ïaineh ha kata ka jingbymngeit, yn pynïadait keiñ; namar U Blei u long uba lah eh ban pynïadait pat ïa ki.

²⁴ Namar lada la ot noh ïa me na ka jong uta uba long na la ka jinglong tynrai, u dieng Olib khlaw; bad da kaba kumwei pat na kaba ju long, la pynïadait ïa me ha u dieng Olib babha, te kaba katno tam ïa kine kiba long kita ki tnat trai, yn pynïadait ïa ki ha u dieng Olib jong ki hi?

Ka jingleh isynei U Blei ka long ïa baroh

²⁵ Namar ngam mon ïa phi ban ym tip, ko parabangeit, shaphang kane ka jingmaïan, ïoh phi long kiba tharai stad ïa lade, ba ka jingeh ka la jia long ïa shiteng shiliang na ki Israel, tad ynda ba kata ka jingdap jong ki Jentil kan da ïoh wan hapoh.

²⁶ Ynda kumta te, yn pynim ïa ki Israel baroh, kumba la thoh: “U Nongpyllait noh un wan mih noh na Seïon, bad un pynphai noh ïa ka jingbymriewblei na u Jakob;

²⁷ bad kane ka long ka jutang jong nga ha ki, ynda ngan kit noh ïa ki pop jong ki.”

²⁸ Kumta, shaphang ka gospel, ki long ki nongshun na ka bynta jong phi; hynrei, shaphang kata ka jingjied, ki long ba la ieit ïa ki na ka bynta kita ki kpa.

²⁹ Namar kita ki jingaiei bad kata ka jingkhot U Blei ki long ba khlem jingkylla-ka-bamut.

³⁰ Namar kumba ma phi ruh mynno mynno ruh phi la ju long ki bymkohnguh ïa U Blei, hynrei, mynta, phi la ïoh ka jingisynei da kata ka jingbymkohnguh jong ki;

³¹ kumjuh ruh kita, mynta, ki la long ki bymkohnguh, ba da kata ka jingleh isynei kaba sha phi, yn ïoh leh isynei keiñ ïa ki ruh.

³² Namar U Blei u la set lang khop ïa baroh ha ka jingbymkohnguh, ba kumta un ïoh leh isynei keiñ ïa baroh.

³³ A ka jingjylliew bah ka jingkynrei spah ka jingstad bad ka jingtip U Blei! A katno ba kita ki jingkut bishar jong u ki long ki bym lah ïit shuh, bad kita ki lynti jong u ki bym lah bud shuh!

³⁴ “Namar uei ba la tip ïa ka jingmut U Trai? Lane uei ba la ju long u nongïasylla lem jong u?”

³⁵ “Lane uei ba la ai shuwa ha u, bad ba yn ai jingai kylliang pat ha uta?”

³⁶ Naba na u, bad da u, bad sha u, long kiei kiei baroh; ha uba to long ka burom sha ki bymjukut! Amen.