Ka Shithi U Paul Sha Ki Nong Rom 1 - KA BAIBL

Ka jingkhublei

¹ U Paul, u shakri U Jisu Khrist, ïa uba la khot ban long apostol, ba la pynkyrpang sha ka gospel U Blei,

² ïa kaba u la lah ïakular mynshuwa da ki nongïathuhlypa jong u ha Ki Jingthoh Bakhuid,

³ shaphang uta U Khun jong u, ïa uba la pynmih na u symbai u Dabid katba kum ka doh;

⁴ ïa uba la pynithuh shynna ba u long U Khun U Blei da ka bor, katba kum U Mynsiem ka jingkhuid, da ka jingmihpat na ki baïap, U Jisu Khrist keiñ uba U Trai jong ngi,

⁵ da uba ngi la ïa-pdiang ïa ka jingaiei bad ïa ka kam apostol, khnang ïa ka jingkohnguh ka jingngeit hapdeng ki kynja bynriew baroh, na ka bynta ka kyrteng jong u;

⁶ hapdeng kita, ma phi ruh, phi long, kiba la khot ki jong U Jisu Khrist:

⁷ Ha kita baroh kiba ha Rom kiba ieit ki jong U Blei, ba la khot ban long ki riewkhuid: Long ka jingaiei ha phi bad ka jingsuk na U Blei uba U Kpa jong ngi bad na U Jisu Khrist U Trai.

Ka jingduwai ainguh

⁸ Nyngkong te, nga ainguh ïa U Blei jong nga da U Jisu Khrist na ka bynta jong phi baroh, naba la bna nam babha ïa ka jingngeit jong phi ha ka pyrthei baroh kawei.

⁹ Namar U Blei u long u sakhi jong nga, ïa uba nga shakri ha ka mynsiem jong nga ha ka gospel ka jong U Khun jong u, ba khlem da pud nga pynlong ka jingkynmaw shaphang jong phi,

¹⁰ ha la ka sngi nga da kyrpad ha ki jingduwai jong nga, ba lada kumno kumno ruh, ynda la katta, yn sa plie lad ïa nga, da ka mon ka jong U Blei, ïa ka ban wan sha phi.

¹¹ Namar nga kwah hir hir ban ïohi ïa phi, ba ngan ïoh ïasam ha phi ïa kaei kaei ka jingai ba dei mynsiem, khnang ïa ka ban pynskhem ïa phi;

¹² kata ka long, ba ha phi yn pynïasngewtngen lem ïa nga bad phi, da la ka jingngeit jingngeit jong ngi paralok hi, ka jong phi ruh bad ka jong nga de.

¹³ Te ngam kwah ba phin ym tip, ko para, ba bunsien nga la thmu ban wan sha phi (hynrei, la pynpep ïa nga haduh mynta), ba nga lah ban ïoh ïa uno uno u soh hapdeng jong phi ruh, kumjuh kumba hapdeng kita kiwei pat ki Jentil.

¹⁴ Nga long u nongkit ram ha ki Grik bad ha ki nongkyndong ruh, ha ki bastad ruh bad ha ki bymstad de.

¹⁵ Kumta te, katba ka shong ha nga, nga la kloi ban ïalap ïa ka gospel ha phi ruh kiba ha Rom.

Ka jingkordor ka gospel

¹⁶ Namar ngam sngewlehrain ïa ka gospel U Khrist; naba ka long ka bor U Blei ïa ka ban pynim ïa uwei pa uwei uba ngeit, ïa u Jiw nyngkong bad ïa u Grik ruh.

¹⁷ Namar ha ka, la pynpaw ïa ka hok U Blei da ka jingngeit sha ka jingngeit: kat kumba la thoh, “Hynrei, uta u bahok da ka jingngeit un ïoh im.”

Ka jingbymman jong ki briew

¹⁸ Namar ïa ka jingbitar U Blei la pynpaw na bneng pyrshah ïa ka jingbymriewblei bad ïa ka jingbymhok baroh phar ki jong ki briew, kiba pynpep keiñ ïa ka jingshisha da ka jingbymhok jong ki.

¹⁹ Naba ïa kata kaba lah ban tip shaphang U Blei ka long kaba paw ha ki; namar U Blei u la pynpaw ïa ka ha ki;

²⁰ namar ïa kita kiei kiei ruh ki bym lah ïohi ki jong u naduh ka jingpynlong ïa ka pyrthei la ïohi shynna, ba la shemphang ïa ki na kita kiei kiei ruh ba la thaw, kiba long, ka bor bymjukut ruh bad ka jinglong Blei jong u, khnang ba kin long khlem jingkrendong shuh.

²¹ Namar haba ki la tip ïa U Blei, kim shym la pyndonburom ïa u kum U Blei, lymne kim shym la ainguh: hynrei, ki la man thala noh ha ki jingpyrkhat jong ki, kumta la pynsynñia tiaw ïa ka dohnud bieit jong ki.

²² Haba ki kren phlan duman ba ki long ki bastad, ki la man bieit noh pynban;

²³ bad ki la ïapli ïa ka burom ka jong U Blei u bympyut bad iba kum i dur i jong u briew bapyut, bad i jong ki sim, bad i jong ki mrad ba saw kjat, bad i jong kiei kiei ruh ki bapar de.

²⁴ Naba kumta, U Blei ruh u la iehnoh ïa ki, ha kita ki jingkwah jakhlia ki dohnud jong ki hi, ha ka jingbymkhuid, ïa ka ban pynjahburom ïa ki met jong ki hapdeng paralok hi;

²⁵ kiba la ïapli ïa ka jingshisha U Blei bad ita iba lamler, bad ki la ïamane blei bad ki la ïashakri ïa i jingthaw ïa ka ban lyndet ïa U Nongthaw, uba long ba la kyrkhu sha ki bymjukut: Amen.

²⁶ Namar kane keiñ, U Blei u la iehnoh ïa ki ha ki jingsngewbrai bakhlem rain: namar wat ki kynthei jong ki, ki la ïa-pynkylla ïa kata ka rukom bakynja tynrai jong ki hi sha kata kaba da kumwei na ka jinglong tynrai.

²⁷ Kumjuh ruh de, ki shynrang, da kaba ki iehnoh ïa kata ka rukom bakynja tynrai shaphang ka kynthei, ki la ïa-ingkhong noh ha ka jingthrew jakhlia jong ki shaphang paralok hi; ki shynrang bad ki shynrang ki da ïaïai-leh noh ïa kaba awria ba-ijli, te ki da pdiang ha lade ïa kata ka bainong shitom kaba dei biang na ka bynta kata ka jingïaidwir jong ki.

²⁸ Te kat kumba kim shym la treh ban bat ïa U Blei ha ka jingtip jong ki, kumta, U Blei u la iehnoh ïa ki ha ka jingmut bymsuidñiew, ban ïai-leh ïa kita kiei kiei ruh ki bymbit;

²⁹ ba ki la dap da ka jingbymhok baroh, da ka jingbymman, da ka jingkhwan, da ka jingpynsniew; kiba la dap da ka jingsngewpihuiñ sat, da kaba pynïap, da kaba ïamai, da ka jingshukor, da ka jingrunar,

³⁰ ki nongkrensiar pasiaw, ki nongkrensiar blab blab, ki nongshun ïa U Blei, kiba lehbeiñ eh, kiba leh khraw eh, kiba kren sarong eh, ki nongthaw buit ïa kiei kiei ki basniew, ki bymkohnguh ïa la ki kmie ki kpa,

³¹ kiba khlem sngewthuh, ki nongpynkheiñ jutang, kiba khlem jingieit ïa la ki jong, kiba khlem jingisynei;

³² kiba haba ki la ïatip biang ïa kata ka jingbuh hukum ka jong U Blei, ba kita kiba ïai-leh kat kita kiei kiei ruh, ka dei ïa ki, ban ïap, pynban, ym tang ba ki shu leh ïa ki, hynrei, ki ïasngewbha lem ruh bad kita kiba ïai-leh ïa ki.