PROBERB 9 - KA BAIBL

Ka jinghikai ka jingstad bad ka jingbakla ka jingbieit

¹ Ka jingstad ka la tei ïa la ka ïing, ka la shtah ïa la ki hynñiew rishot.

² Ka la pynïap ïa la ki mrad; ka la khleh ïa la ka Waiñ; bad ka la siang jingbuh ïa la ka miej.

³ Ka la phah noh ïa la ki shakri kynthei, ka pyrta halor ki jaka bajrong jong ka shnong,

⁴ “Jar u babieit, to un phai shane:” te uta uba suda jingshemphang, ka ong ha u,

⁵ “Ale, to bam phi na u kpu jong nga, bad to dih na ka Waiñ kaba nga la khleh.

⁶ To keiñ noh, phi ki babieit, bad to im; bad to ïaid ha ka lynti ka jingshemphang.”

⁷ Uta uba sneng ïa u nongkrenbeiñ u ïoh ka jinglehrain ha lade: uta uba sneng pynrem ïa u bymman u ïoh kaba kynthoh ha lade.

⁸ Wat sneng pynrem ïa u nongkrenbeiñ, ïoh u shun ïa me: to sneng ïa u bastad, te un ieit ïa me.

⁹ To ai jinghikai ïa u bastad, te un nang kham stad: to hikai ïa u bahok, te un nang roi ha ka jinghikai.

¹⁰ Ka jingsheptieng ïa U Trai ka long ka jingsdang ka jingstad: bad ka jingtip ïa uta U Bakhuid long ka jingshemphang.

¹¹ Naba da nga ïa ki sngi jong me yn pynbun, bad ïa ki sngi ka jingim jong me yn pynroi.

¹² Lada me long u bastad, ïa lade hi me long stad: bad lada me krenbeiñ, ma me hi men kit ïa kata.

¹³ Ka kynthei ka babieit ka long kaba bun ktien kaw kaw; ka long ka babieit, bad kam tip ei ei.

¹⁴ Bad ka shong ha ka jingkhang ka ïing jong ka, ha ka jingshong ha ki jaka bajrong jong ka shnong,

¹⁵ ba kan khot ha kita kiba ïaid nangta, kiba leit beit la ka lynti,

¹⁶ “Jar u babieit, to un phai shane:” te ïa uta uba suda ka jingshemphang, ka ong,

¹⁷ “Ki um tuh kiba thiang, bad u kpu ba la bam harieh uba bang.”

¹⁸ Hynrei, um tip ba ki baïap ki don hangta; ba kiba la khot jong ka ki don ha ki jingjylliew ka dujok.