PROBERB 8 - KA BAIBL

Ka jingbha kor tam bad ka jingneh junom jong ka jingstad

¹ Hato ka jingstad kam pyrta, bad ka jingshemphang kam pynjam ïa la ka ktien?

² Ha khlieh ki jaka bajrong hajan ka lynti, ha kaba ïakynduh ki lad, ka ïeng;

³ hajan ki khyrdop, ha kaba rung sha shnong, ha kaba leit bsut na ki jingkhang, ka pyrta jam:

⁴ “Ha phi, ko ki rangbah, nga pyrta; bad ka ktien jong nga ka long ha ki khun shynrang ki briew.

⁵ Ko phi ki babieit, to sngewthuh ïa ka jingsian; bad phi ki babieit runar, to long ki bashemphang la ka dohnud.

⁶ To sngew, naba ngan kren ïa kiei kiei ki babha eh; bad ka jingplie ïa ki rmiang shyntur jong nga kin long kiei kiei kiba beit.

⁷ Naba ka shyntur jong nga kan kren ïa ka jingshisha; bad ka jingbymman ka long ka jingijli ïa ki rmiang shyntur jong nga.

⁸ Ki ktien ka shyntur jong nga baroh ki long ha ka hok; ym don ha ki, kaei kaei ka bymbeit lane mutlop.

⁹ Ki long kiba shai baroh ha uta uba shemphang, bad kiba beit ha kita kiba shem ïa ka jingtip.

¹⁰ To pdiang ïa ka jinghikai jong nga, te ym ïa ka rupa: bad ïa ka jingtip ban ïa ka ksiar ba la kynsai.

¹¹ Namar ka jingstad ka kham bha ban ïa ki maw Rubi; bad kiei kiei baroh ïa kiba lah ban ikwah kim dei ban ïapyrshang bad ka.

¹² “Nga ka jingstad nga la pynlong ka jingsian ka ïingshong jong nga, bad nga shem ïa ka jingtip bad ka jingpyrkhat.

¹³ Ka jingsheptieng ïa U Trai long ban shun ïa ka basniew: ïa ka jingsarong, bad ka jingsngewmeng, bad ka lynti ka basniew, bad ïa ka shyntur kaba mutlop, nga isih.

¹⁴ Ka jingpyrkhat ka jong nga, bad ka jingtip kaba shisha: nga long ka jingshemphang; nga, nga don ka bor.

¹⁵ Da nga ki syiem ki synshar, bad ki myntri ki ïabishar ïa ka hok.

¹⁶ Da nga ki nongsynshar ki synshar, bad ki bakhraw batri, baroh keiñ ki nongbishar jong ka khyndew.

¹⁷ Nga ieit ïa kita kiba ieit ïa nga; bad kita kiba wad biang biang ïa nga kin shem ïa nga.

¹⁸ Ki spah bad ka burom ki don bad nga; ki spah kiba ïaineh keiñ bad ka hok.

¹⁹ U soh jong nga u kham bha ban ïa ka ksiar, shisha, ban ïa ka ksiar nylla; bad ka jingmih jong nga ban ïa ka rupa ba la kynsai.

²⁰ Nga ïaid ha ka lynti ka hok, hapdeng ki lynti ïaid ka jingbishar:

²¹ ba nga lah ban pynïoh kynti ïa ka jingshisha ha kita kiba ieit ïa nga, bad ba ngan ïoh pyndap ïa ki jingkynshew jong ki.

²² “U Trai u la pynïoh ïa nga ha ka jingsdang ka lynti jong u, mynshuwa ki kam jong u mynbarim.

²³ La pynïeng ïa nga naduh bymjukut, naduh ka jingsdang, ha bym pat la long ka khyndew.

²⁴ Mynba ym pat la don ki jingjylliew, ïa nga la kha; mynba ym pat la don ki pukri ki bashlei da ka um.

²⁵ Myn shuwa bym pat thung ïa ki lum bah, shuwa ïa ki lum rit ïa nga la kha:

²⁶ katba um pat thaw ïa ka khyndew, lymne ïa ki lyngkha, lymne ïa ka jingsdang ka 'dewmet jong ka khyndew.

²⁷ Mynba u la pynskhem ïa ki bneng, nga la don hangta: mynba u la buh ïa ka dur pyllun halor ka khmat ka jingjylliew:

²⁸ mynba u la pynskhem ïa ka suiñbneng: mynba ki pukri ka jingjylliew ki la man khlaiñ:

²⁹ mynba u la buh ha ka duriaw ïa la ka pud, ba ki um kin ym ryngkang ïa ka hukum jong u: mynba u la pynthikna ïa ki nongrim jong ka khyndew:

³⁰ hangta nga la don hajan jong u, kum u rangbah nongtei: bad nga la long ka jingsngewbha jong u ha la ka sngi, nga da leh kmen borabor ha khmat jong u;

³¹ nga da leh kmen ha ka khyndew ba shong briew jong u; bad ka jingsngewbha jong nga ka la long bad u khun bynriew.

³² “Namar kata te, ko khun, to sngew ïa nga: naba suk kita kiba sumar ïa ki lynti jong nga.

³³ To sngap ïa ka jinghikai, bad to long stad, bad wat kyntait ïa ka.

³⁴ Suk uta u briew uba sngew ïa nga, uba ap ha la ka sngi ha ki khyrdop jong nga, uba ap khmih ha ki shawkad ki jingkhang jong nga.

³⁵ Naba jar uba shem ïa nga u shem ïa ka jingim, bad un ïoh ka jingisynei na U Trai.

³⁶ Hynrei, uta uba leh pop ïa nga u pynsniew ïa la ka jong ka mynsiem: baroh kat kiba shun ïa nga ki ieit ïa ka jingïap.”