PROBERB 7 - KA BAIBL

Ka buit sianti ka nuti

¹ Ko khun, to sumar ïa ki ktien jong nga, bad to ri khop ïa ki hukum jong nga bad me.

² To sumar ïa ki hukum jong nga bad to im; bad ïa ka aiñ jong nga kum i briew khmat jong me.

³ To teh ïa ki halor la ki shynriah'ti; to thoh ïa ki ha u maw lyngkniap ka dohnud jong me.

⁴ To ong ïa ka jingstad, “Pha long ka para jong nga;” bad to ting ka kur jong me ïa ka jingshemphang:

⁵ ba kin ïoh sumar ïa me na kata ka kynthei nongwei, na kata ka nongwei kaba kren roh da la ki ktien.

⁶ Naba ha ka jingkhang ïit ka ïing jong nga, nga la khmih na ka phrah jong nga;

⁷ te nga la khmih hapdeng ki babieit, nga la ïohi hapdeng ki samla, ïa u samla uba suda ka jingshemphang,

⁸ ba u da ïaid na ka lynti shnong hajan ka dong jong ka, bad u la leit lynti sha ka ïing jong ka;

⁹ haba kem ïongreiñ, ha ka por premmiet, ha ka jingïong ka miet bad ka jingdum.

¹⁰ Te ha khmih, la ïashem bad u ka kynthei kaba la riam kum ka nuti, bad kaba sianti ka dohnud.

¹¹ Ka long kaba bun ktien jam bad kaba leh mon; ki kjat jong ka kim neh ha ka ïing jong ka:

¹² Mynta ka don ha ki lynti shnong, la shibit ka don ha ki jaka kylluid, ka ap thap ha ka dong baroh.

¹³ Kumta, ka la bat ïa u, bad ka la doh ïa u, bad ka la pyneh ïa la ka khmat bad ka la ong ha u:

¹⁴ “Ki jingkñia ki jingainguh pynïasuk ki don bad nga; ha kane ka sngi nga la sait ïa la ki kular.

¹⁵ Namar kata, nga la wan mih ban ïashem bad me; ban wad biang biang ïa ka khmat jong me, te nga la shem ïa me.

¹⁶ Nga la siang ïa la ka palong da ki jaiñ siang ba la mutdur, da ki jaiñ thoh pynïeng kiba da u ksai Ijipt.

¹⁷ Nga la pyniwbih ïa la ka jingthiah da ka mirr, ka aloes, bad ka sisia.

¹⁸ Ale, to ngin ïapynkdang ïa lade da kaba ïa-ieit haduh mynstep; to ngin ïa-pynhun ïa lade da ki jingïa-ieit.

¹⁹ Naba u tnga jong nga um don ha ïing, u la leit jingleit sha jngai.

²⁰ U la rah sbai bad u shi 'saipan; un sa wan ha la ïing ynda pyllun bnai.”

²¹ Da la kaba bun ka jingkren khroh ka la pynkohnguh ïa u, da ka jingarsap ki rmiang shyntur jong ka, ka la ring bor ïa u.

²² U bud ïa ka shisyndon, kumba leit u masi dab sha ka jingpynïap, lane kum ki nar pyndait ha ka jingpynshitom ïa kiba bieit;

²³ tad ynda u khnam u pynpei ïa ka dohnud jong u; kumba u sim u pynkloi ha ka jingriam, bad um tip ba ka long ïa ka jingim jong u.

²⁴ Namar kata te, ko khun, to shahshkor ïa nga, bad to sngap ïa ki ktien ka shyntur jong nga.

²⁵ Wat ai ba ka dohnud jong me kan dem sha ki lynti jong ka, wat leit sakma sha ki lynti ïaid jong ka.

²⁶ Namar shibun ka la pynkyllon ba la pynmong ïa ki: bad baroh kiba la pynïap jong ka ki long u paidbah bakhraw.

²⁷ Ka ïing jong ka, ka long ka lynti sha ka jingtep, kaba leit hiar sha ki kamra ka jingïap.