PROBERB 6 - KA BAIBL

Ka jingmaham pyrshah ïa ka jingalhia bad ïa ka jingleh bymman

¹ Ko khun, lada me la long u nongbahjamin na ka bynta la u paramarjan, bad me la thab la ki kti na ka bynta u nongwei,

² la riam ïa me da ki ktien ka shyntur jong me, la pynngat ïa me da ki ktien ka shyntur jong me.

³ Ïa kane te to leh, ko khun, bad to pyllait ïa lade, namar ba me la hap ha ka kti la u paramarjan; to khie, to pynrit ïa lade, bad to kyrpad ïa la u paramarjan.

⁴ Wat ai thiah ïa la ki khmat, lymne ka jingsamthiah ïa la ki irmat.

⁵ To pyllait ïa lade kum ka skei na ka kti u nongbeh mrad, bad kum u sim na ka kti u nongriam sim.

⁶ Khie leit sha u dkhiew, me uba jaipdeh; to pyrkhat ïa ki lynti jong u, bad to long stad:

⁷ u bymdon u nongïalam, u nongkhmih, lane u nongsynshar,

⁸ uba khreh lypa mynlyiur ïa la ka jingbam, bad uba kynshew ïa la ka jingbam ha ka aïom ot.

⁹ Slem katno men ïohthiah, ko jaipdeh? Lano men sa kyndit na la kaba ïohthiah?

¹⁰ Sa khyndiat pat ban dang ïohthiah, sa khyndiat ka jingsamthiah, sa khyndiat ban thain kti ban thiah:

¹¹ kumta ka jingduk jong me kan wan kum u nongtuh, bad ka jingkyrduh jong me kum u briew ba la kieng atiar.

¹² U briew uba thala, u briew ka jingbymhok; u ïaid bad ka shyntur kaba mutlop;

¹³ u khapbrip da la ki khmat, u kren da la ki kjat, u pynlong ki dak da la ki shynriah'ti;

¹⁴ ka jingmutlop ka don ha ka dohnud jong u, u pun ïa ka basniew ha la ka sngi; u bet ïa ki jingïakajia.

¹⁵ Namar kata, ka jingjynjar jong u kan wan kyndit; ha kaba kyndit yn pynlwet ïa u, bad kata bymdon jingshna shuh.

¹⁶ Don hynriew tylli kiei kiei kiba U Trai u isih; shisha, hynñiew kiba long ka jingijli ïa u:

¹⁷ ki khmat kiba sarong, u thylliej uba lamler, bad ki kti kiba pynmih noh ïa ka snam balui lui;

¹⁸ ka dohnud kaba pun ïa ki jingpyrkhat bymman, ki kjat kiba stet ban phet sha ka jingsniew;

¹⁹ u sakhi uba lamler uba pyrsad ïa ki lamler, bad uta uba bet ïa ka jingïakajia hapdeng ki para.

Ka jingsniew jong kaba klim

²⁰ Ko khun, to sumar ïa ka hukum u kpa jong me, bad wat iehnoh noh ïa ka aiñ ka kmie jong me.

²¹ To khum ïa ki ha la ka sngi halor la ka dohnud, to teh ïa ki baroh sawdong la ka ryndang.

²² Haba me ïaid, kan ïalam ïa me; haba me thiah kan ap ïa me; bad haba me peit kan ïakren bad me.

²³ Namar kata ka hukum ka long ka sharak; bad kata ka aiñ ka long ka jingshai; bad ki jingsneng ka jinghikai ki long ka lynti ka jingim:

²⁴ ban sumar ïa me na ka kynthei ka basniew, na ki ktien roh u thylliej ka nongwei.

²⁵ Wat ikwah ïa ka jingbhabriew jong ka ha la ka dohnud; lymne wat shah ba kan pynngat ïa me da la ki irmat.

²⁶ Naba namar ka kynthei kaba klim ïa u briew la pynkhim sha kaba shi lyngkhot u kpu: bad ka nuti ka beh ban ïoh ïa ka jingim ka bakordor.

²⁷ Hato u briew u lah ban rah ding ha la ka shadem, bad ban ym ing la ki jaiñ?

²⁸ Lane uno uno u lah ban ïaid halor ki rnga barhem, bad ban ym ing la ki kjat?

²⁹ Kumta uta uba leit sha ka tnga u paramarjan jong u; jar uba ktah ïa ka yn ym ñiew khuid ïa u.

³⁰ Ki briew kim ju ibeiñ ïa u nongtuh, lada u shu tuh ban pynkdang ïa la ka mynsiem haba u thngan:

³¹ hynrei, lada shem ïa u, un pynbiang hynñiew shah; un ai keiñ ïa kiei kiei baroh katba don ha ka ïing jong u.

³² Uta uba klim bad ka kynthei u long uba suda ka jingshemphang: u leh ïa kata ka ban pynjot ïa la ka jong ka mynsiem.

³³ Ki jingmong bad ka jahburom un ïoh; bad ïa ka jinglehrain jong u yn ym pyndam noh.

³⁴ Namar ka jingskuiñ ka long ka jingbitar lep u briew; bad un ym map ha ka sngi ka jingpynhiar kput.

³⁵ Un ym ñiewkor ïa kano kano ka jingai kuna; lymne un ym sngewhun, la me ai shibun ki jingai.