PROBERB 5 - KA BAIBL

Ka jingmaham pyrshah ïa ka jingklim

¹ Ko khun, to shahshkor ïa ka jingstad jong nga: to pyndem ïa la ka shkor ha ka jingshemphang jong nga:

² ba men ïoh ri khop ïa ka jingsian, bad ba ki rmiang shyntur jong me kin bat ïa ka jingtip.

³ Naba ki rmiang shyntur ka kynthei nongwei ki pynjaw ïa ka ngap, bad ka shyntur jong ka, ka kham jem ban ïa ka umphniang:

⁴ Hynrei, ka bakut jong ka, ka kthang kat u 'hur kthang, kaba nep kum ka waitlam ba ar liang syrti.

⁵ Ki kjat jong ka ki leit hiar sha ka jingïap; ki jingjam jong ka ki bat ïa ka jingtep;

⁶ kumta ba kam shem ïa ka lynti bamadan jong ka jingim; ki lynti jong ka ki bymskhem, te kam tip ïa kata.

⁷ Namar kata te, ko khun, to sngap ïa nga, bad wat iehnoh noh ïa ki ktien ka shyntur jong nga.

⁸ To kynriah ïa la ka lynti sha jngai na ka, bad wat leit hajan ka jingkhang ka ïing jong ka:

⁹ ïoh men ai la ka burom ha kiwei pat, bad ïa la ki snem ha kaba dom:

¹⁰ ïoh ban pyndap ïa ki nongwei da ka bor jong me; bad ba ki jingtrei minot jong me kin long ha ka ïing jong u sohshnong;

¹¹ bad ba men ïam ha ka bakut jong me, haba ïa ka doh jong me bad ka met jong me la bam duh noh,

¹² bad ba men ong, “Kumno nga la isih ïa ka jinghikai, bad ba ka dohnud jong nga ka la ñiewbeiñ ïa ka jingsneng;

¹³ lymne ngam shym kohnguh ïa ka ktien ki nonghikai jong nga, lymne pyndem ïa la ka shkor ha kita kiba la hikai ïa nga!

¹⁴ Nga la long la jan ha ka jingsniew baroh hapdeng u paidbah bad ka jingïaseng.”

¹⁵ To dih um na la ka jong ka nan, bad ki umtuid na la ka jong ka pukri.

¹⁶ Hato ïa ki umpohliew jong me dei ban pynphred kylleng, bad ïa ki wah um ha ki lynti shnong?

¹⁷ Ai ba kin long tang ïa me hi, bad ym ïa ki nongwei ruh ryngkat bad me.

¹⁸ To ka pukri jong me kan long kaba la kyrkhu; bad to leh kmen ha ka tnga ka jinglong samla jong me.

¹⁹ Kum ka sier ba-ieit bad ka skei basngewbha, to ki jymbuiñ jong ka kin pynhun ïa me ha la ka sngi; bad to long me uba shadkmen than borabor ha ka jingieit jong ka.

²⁰ Namar balei, ko khun, ba men shadkmen than ha ka kynthei kaba nongwei, bad ba men kdup ïa ka shadem ka nongwei?

²¹ Namar ki lynti u briew ki don ha pyrshah ki khmat U Trai, bad u pynmadan ïa ki lynti ïaid jong u baroh.

²² Ki jingleh bymhok jong u hi kin pynngat ïa u bymman, bad yn bat ïa u da ki tyllai ka pop jong u.

²³ Un ïap noh ba u kyrduh jinghikai; bad ha ka jingkhraw ka jingbieit jong u un leit sakma noh.