PROBERB 4 - KA BAIBL

Ka dor jong ka jingstad

¹ To sngew, phi ki khun, ïa ka jinghikai u kpa, bad to shahshkor ban tip ïa ka jingshemphang:

² Naba nga ai ha phi ïa ka jinghikai ka babha; to wat iehnoh noh ïa ka aiñ jong nga.

³ Namar nga la long u khun ïa la u kpa, uba lung bad kumba marwei hi ha ka jingñiew ka kmie jong nga.

⁴ Te u la hikai ïa nga, bad u la ong ha nga, “To ka dohnud jong me kan bat ïa ki ktien jong nga; sumar ïa ki hukum jong nga, bad to im:

⁵ to pynïoh ïa ka jingstad, to pynïoh ïa ka jingshemphang; wat klet ïa ka, lymne wat phai noh na ki ktien ka shyntur jong nga:

⁶ Wat iehnoh noh ïa ka, te kan ri khop ïa me; to ieit ïa ka, te kan sumar ïa me.

⁷ Ka jingstad ka long kaba kongsan; to ïoh te ïa ka jingstad: bad da kiei kiei baroh kiba me don to ïoh ïa ka jingshemphang.

⁸ To kyntiew ïa ka, te ka ruh kan kyntiew ïa me: kan wallam ïa me sha ka burom, haba me piam ïa ka.

⁹ Kan ai ka jingdeng ka jingaiei ïa ka khlieh jong me: ïa ka pansngiat ka jingitynnad kan aiti ha me.”

¹⁰ To sngew, ko khun, bad to pdiang ïa ki jingong jong nga; te ki snem ka jingim jong me kin long shibun.

¹¹ Nga la hikai ïa me ha ka lynti ka jingstad; nga la ïalam ïa me ha ki lynti ka jingbeit.

¹² Haba me leit, ïa ki jingjam jong me yn ym pynkhim; bad haba me mareh, men ym jynthut.

¹³ To bat skhem ïa ka jinghikai; wat pyllait ïa ka: to sumar khop ïa ka; naba ka long ka jingim jong me.

¹⁴ Wat leit sha ka lynti ïaid ki bymman, bad wat ïaid ha ka lynti ki riewsniew.

¹⁵ To kiar na ka, wat ïaid ha ka; to phai noh na ka, te shu nang ïaid.

¹⁶ Naba kin ym thiah noh, lymda ki la leh sniew; bad ka jingïohthiah jong ki ka la duh noh, tad ynda ki la pynkyllon ïano ïano.

¹⁷ Namar ki bam ïa u kpu ka jingbymman, bad ki dih ïa ka Waiñ ka jingleh-jubor.

¹⁸ Hynrei, ka lynti jong u bahok ka long kum ka jingshai ka batyngshaiñ, kaba nang tyngshaiñ nang tyngshaiñ haduh kaba janai ka sngi.

¹⁹ Ka lynti ki bymman ka long kum ka jingdum: kim tip ha-ei ki ïajynthut.

²⁰ Ko khun, to shahshkor ïa ki ktien jong nga; to pyndem ïa la ka shkor ha ki jingong jong nga.

²¹ Wat ai ba kin leit noh na ki khmat jong me; to sumar ïa ki hapdeng la ka dohnud.

²² Namar ki long ka jingim ïa kita kiba shem ïa ki, bad ka jingkhiah ïa ka doh jong ki baroh.

²³ To ri khop ïa la ka dohnud da kaba sumar eh; naba na ka ki wan ki jingmih ka jingim.

²⁴ To buh noh na me ïa ka shyntur bamutlop, bad ïa ki rmiang shyntur bamutlop to buh noh sha jngai na me.

²⁵ To ki khmat jong me kin khmih sha ba-beit, bad ki irmat jong me to kin khmih beit sha shuwa jong me.

²⁶ To pynmadan ïa ka lynti ïaid ki kjat jong me, bad to ai ban pynskhem ïa ki lynti jong me baroh.

²⁷ Wat phai noh lymne sha kamon lymne sha kadiang: to pynkynriah ïa la ka kjat na ka basniew.