PROBERB 31 - KA BAIBL

Ki jinghikai ban leh adkar

¹ Ki ktien u syiem Lemuel; ka orakl kaba ka kmie jong u ka la hikai ïa u.

² “Kumno, khun? Bad kumno, ko khun ka kpoh jong nga? Bad kumno, ko khun ki kular jong nga?

³ Wat ai ïa la ka bor ha ki kynthei, lymne ïa la ki lynti ha kata kaba pynjot ïa ki syiem.

⁴ Kam dei ïa ki syiem, ko Lemuel, kam dei ïa ki syiem ban dih Waiñ; lymne ïa ki myntri syiem ban ong, ‘Hangno ka kyiad?’

⁵ Ïoh haba ki dih, ki klet ïa ka aiñ, bad pynbakla ïa ka jingbishar kino kino ïa kiba la pynjynjar.

⁶ To ai ïa ka kyiad ha uta uba la jan ïap, bad ka Waiñ ha uba kthang la ka mynsiem:

⁷ to ai un dih uta, bad un klet ïa la ka jingkyrduh, bad un ym kynmaw shuh ïa la ka jingshitom.

⁸ To plie ïa la ka shyntur na ka bynta uta u bymnangkren, ha ka kam jong kita baroh kat kiba la pynsah kynjah.

⁹ To plie ïa la ka shyntur, to bishar hok, bad to leh ïa ka jingbishar ha u baduk bad u bakyrduh.”

Ka jingïaroh ïa ka briew ka babha

¹⁰ Ïa ka briew ka babha uei uba lah ban shem? Naba ka dor jong ka, ka kham kor shibun ïa ki Rubi.

¹¹ Ka dohnud u tnga jong ka, ka shaniah ha ka, te un ym kyrduh jingmyntoi.

¹² Ka leh bha ïa u te ym ka basniew baroh ki sngi ka jingim jong ka.

¹³ Ka wad ïa u 'ñiuh langbrot bad u kynphad, bad ka trei mon sngewbha da la ki kti.

¹⁴ Ka long kum ki lieng khaïi; ka wallam ïa la ka jingbam na sha jngai.

¹⁵ Ka khie thiah ruh haba dang miet, bad ka ai jingbam ïa la ki ba-ha-ïing, bad ïa ka kam jong ki ha la ki shakri kynthei.

¹⁶ Ka pyrkhat ïa ka lyngkha, te ka thied ïa ka: da u soh ki kti jong ka, ka thung ïa ka brisoh Waiñ.

¹⁷ Ka panpoh ïa la ka syngkai da ka bor, bad ka pynlong khlaiñ ïa la ki ksang'ti.

¹⁸ Ka ïohi ba ka jingkhaïi jong ka, kaba myntoi: ka sharak jong ka kam ju lip mynmiet.

¹⁹ Ka buh ïa la ki kti ha u dieng kyllaiñ ksai, bad ki kti jong ka ki bat ïa u dieng thir ksai.

²⁰ Ka plie ïa la ka kti ha ki baduk; shisha, ka kner ïa la ki kti ha ki bakyrduh.

²¹ Kam sheptieng na ka ïor shaphang la ki ba-ha-ïing; naba ïa ki ba-ha-ïing jong ka baroh la pynkup da ki jaiñ saw syng-iang.

²² Ka thaw ha lade ki syngkhlieh ba la suh syntiew; ki jaiñkup jaiñsem jong ka ki long linen bani bad jaiñ saw bthuh.

²³ Ïa u tnga jong ka la ithuh ha ki khyrdop, haba u shong hapdeng ki tymmen basan jong ka ri.

²⁴ Ka thaw ki jaiñ linen bad ka die ïa ki; bad ka ai ki jingpanpoh ha u nongkhaïi.

²⁵ Ka bor bad ka burom ki long ka jaiñkup jong ka; bad ka rkhie ïa ka por ka ban sa wan.

²⁶ Ka ang ïa la ka shyntur ha ka jingstad; bad ka aiñ ka jinglehsbun ka ha u thylliej jong ka.

²⁷ Ka khmih bha ïa ki lynti jong ki ba-ha-ïing jong ka, bad kam ju bam ïa u kpu ka jingalhia.

²⁸ Ki khun jong ka ki ïeng, bad ki khot ïa ka, “kaba suk;” u tnga jong ka ruh, bad u ïaroh ïa ka, u da ong:

²⁹ “Shibun ki kynthei ki la leh bha, hynrei pha, pha la palat ïa ki baroh.”

³⁰ Ka jingitynnad ka long ka jingshukor, bad ka jingbhabriew ka long kaba thala: hynrei, ka kynthei kaba sheptieng ïa U Trai, kata ka ban ïoh ïaroh.

³¹ To ai ha ka na u soh ki kti jong ka; bad to ai ba ki kam jong ka kin ïaroh ïa ka, ha ki khyrdop.