PROBERB 30 - KA BAIBL

Ka jingphla u Agur

¹ Ki ktien u Agur u khun u Jakeh; ka orakl. Uta u briew u la ong ha u Ithiel, ha u Ithiel bad u Ukal:

² “Shisha nga kham bieit ban ïa uno uno u briew, bad ngam don ka jingshemphang briew:

³ bad ngam shym hikai ka jingstad, lymne ngam don ka jingtip ïa uta U Bakhuid.

⁴ Uei uba la kiew artet sha bneng, bad ba la hiar? Uei ba la lum ïa ka lyer ha la ki kti ba la kham? Uei ba la tehsong ïa ki um ha la ka jaiñkup? Uei ba la pynskhem ïa baroh ki bakut ka khyndew? Kaei ka kyrteng jong u, bad kaei ka kyrteng u khun jong u, lada me tip?

⁵ “Ka ktien baroh ka jong U Blei ka long ba la pynphrang: u long ka stieh ha kita kiba shaniah ha u.

⁶ Me wat pynlang ha ki ktien jong u, ïoh ba un sneng ïa me, bad ban shem ïa me uba lamler.”

⁷ Ar tylli kiei kiei nga la pan na me; wat kyrngah ïa ki ha nga katba ngam pat ïap:

⁸ to pynkynriah sha jngai na nga ïa ka jingthala bad ki jinglamler: wat ai ïa nga lymne ka jingkyrduh lymne ka spah; to bsa ïa nga da ka jingbam kat ban biang ïa nga:

⁹ ïoh ba ngan sngewdap, bad ba ngan len ïa me, bad ngan ong, “U Trai u long uei?” lane ïoh ba ngan duk, bad ba ngan tuh, bad pyndonkambeiñ ïa ka kyrteng U Blei jong nga.

¹⁰ Wat krenbeiñ siar ïa u shakri ha u kynrad jong u, ïoh ba u tim ïa me, bad ba me kit pop.

¹¹ Don ka pateng bynriew kaba tim ïa u kpa jong ki, bad ka bymkyrkhu ïa ka kmie jong ki.

¹² Don ka pateng bynriew ka bakhuid ha la ka jong ka jingñiew, te pynban ym shym la sait ïa ki na ka jingtngit jong ki.

¹³ Don ka pateng bynriew, Wa katno kiba meng ki khmat jong ki! bad ïa ki irmat jong ki la khyllie.

¹⁴ Don ka pateng bynriew kaba ki bniat jong ki, ki long kum ki waitlam, bad ki 'niat tyngam jong ki, ki long kum ki tari, ban bam duh ïa ki baduk na ka khyndew, bad ïa ki bakyrduh napdeng ki briew.

¹⁵ U thliem masi u don ar tylli ki khun kynthei, kiba pyrta, “Ai, ai.” Don lai tylli kiei kiei ki bym ju kdang, shisha, saw tylli ki bym ju ong, “Keiñ noh:”

¹⁶ ka jingtep; bad ka kpoh kaba lyngki; ka khyndew ka bym la kdang da ka um; bad ka ding ka bym ong, “Keiñ noh.”

¹⁷ Ka khmat kaba rkhiebeiñ ïa la u kpa, bad kaba ñiewbeiñ ban kohnguh ïa la ka kmie, ïa kata, ki tyngab ka ri them kin khlaw noh, bad ki khun pukni kin bam ïa ka.

¹⁸ Don lai tylli kiei kiei kiba phylla eh ïa nga, shisha, saw tylli kiba ngam ithuh:

¹⁹ ka lynti ka pukni ha ka suiñ; ka lynti u bseiñ halor u mawsiang; ka lynti ka lieng hapdeng ka duriaw; bad ka lynti u briew bad ka samla.

²⁰ Kumta, long ka lynti ka kynthei baklim; ka bam, bad ka ñiad ïa la ka shyntur, bad ka ong, “Ngam shym leh bymman ei ei.”

²¹ Namar lai tylli kiei kiei ka khyndew ka kyiuh, bad namar saw tylli, kiba kam lah shah:

²² namar u shakri haba u long syiem; bad u babieit haba u la kdang jingbam;

²³ namar ka kynthei kaba isih haba ka la shongkurim: bad ka shakri kaba long ka nongïoh pateng ka kynrad jong ka.

²⁴ Don saw tylli kiei kiei kiba rit ha ka khyndew, hynrei, ki long ki bastad shikatdei:

²⁵ ki dkhiew kim long ki briew kiba khlaiñ, pynban, ki khreh lypa ïa la ka jingbam mynlyiur;

²⁶ ki heiraks ki long tang ki paid tlot, pynban, ki thaw ïa la ki ïing ha ki mawsiang;

²⁷ ki puit kim don u syiem, pynban, ki ïaleit mih baroh ha ki kynhun;

²⁸ u ñiangbshiah u bat da la ki kti, bad u don ha ki ïingsyiem.

²⁹ Don lai tylli kiei kiei kiba ishyeng ha la ka jingïaid, shisha, saw tylli kiba ishyeng ha kaba ïaid:

³⁰ u sing, uba khlaiñ tam hapdeng ki mrad khlaw, bad um phai noh na uno uno ruh;

³¹ u 'sew beh; u 'lang sohmoh ruh; bad u syiem, bym lah ban ïeng ïaleh ïa u.

³² Lada me la leh bieit ha kaba kyntiew ïa lade, lane lada me la pyrkhat ïa ka basniew, to tap ïa la ka kti halor la ka shyntur.

³³ Naba kaba kynruh ïa ka dud ka pynmih ïa ka makhon, bad kaba jyrwait ïa ka khmut ka pynmih ïa ka snam: kumta kaba kynroi ïa ka jingbitar ka pynmih ka jingïakajia.