PROBERB 3 - KA BAIBL

Ka jingkyntu ïa ka jingkohnguh

¹ Ko khun, wat klet ïa ka aiñ jong nga; hynrei, ka dohnud jong me to kan sumar ïa ki hukum jong nga:

² naba ïa ka jingslem ki sngi, bad ki snem ka jingim, bad ka jingsuk, kin pynlang ha me.

³ Wat ai ba ka jingisynei bad ka jingshisha kin iehnoh noh ïa me: to teh ïa ki ha ka ryndang jong me; to thoh ïa ki ha u maw lyngkniap ka dohnud jong me:

⁴ kumta, men shem ïa ka jingsngewbha bad ïa ka jingshemphang ka babha ha khmat U Blei bad ki briew.

⁵ To ngeit ha U Trai da la ka dohnud baroh, bad wat shaniah ha la ka jong ka jingshemphang.

⁶ Ha la ki lynti baroh to phla ïa u, te un pynbeit ïa ki lynti ïaid jong me.

⁷ Wat long u bastad ha la ka jong ka jingñiew; to sheptieng ïa U Trai, bad to kiar na ka basniew:

⁸ kata kan long ka jingkoit ïa u sohpet jong me, bad ka khleiñ ïa ki shyieng jong me.

⁹ To burom ïa U Trai da la ka spah, bad da ki soh nyngkong ka jingmih jong me baroh:

¹⁰ kumta, ïa ki thiar jong me yn pyndap da ka jingkyrhai, bad ki kor tylliat jong me kin shlei da ka Waiñ thymmai.

¹¹ Ko khun, wat ñiewbeiñ ïa ka jingsneng sympat U Trai; lymne wat sngewsatia ïa ka jingsneng jong u;

¹² naba ïa uba U Trai u ieit, u sneng; kumba u kpa ruh ïa u khun uba u ieit.

¹³ Suk uta u briew uba shem ïa ka jingstad, bad uta u briew uba ïoh ïa ka jingshemphang.

¹⁴ Namar ka jingkhaïi jong ka, ka kham bha ïa ka jingkhaïi rupa, bad ka jingpynmyntoi jong ka ban ïa ka ksiar nylla.

¹⁵ Ka kham kordor ban ïa ki Rubi: bad na kita kiei kiei kiba me lah ban ikwah ym don ki ban ïanujor bad ka.

¹⁶ Ka jingslem ki sngi ka don ha ka kti kamon jong ka; ha ka kti kadiang jong ka ki don ki spah bad ka burom.

¹⁷ Ki lynti jong ka ki long ki lynti ka jingsngewtynnad, bad ki lynti ïaid jong ka baroh ki long ka jingsuk.

¹⁸ Ka long u dieng ka jingim ïa kita kiba shim bat ïa ka: bad suk uwei uwei baroh uba bat ri ïa ka.

¹⁹ U Trai da ka jingstad u la seng nongrim ïa ka khyndew; da ka jingshemphang u la pynskhem ïa ki bneng.

²⁰ Da ka jingtip jong u, ïa ki jingjylliew la pynpait, bad ki bneng ki pynjaw ka umjer.

²¹ Ko khun, wat ai ba kin leit noh na ki khmat jong me; to bat ïa ka jingstad kaba shisha bad ka jingsian;

²² kumta, kin long ka jingim ïa ka mynsiem jong me, bad ka jingitynnad ïa ka ryndang jong me.

²³ Ynda kumta, men ïoh ïaid ha la ka lynti ha kaba suk, bad ka kjat jong me kan ym jynthut.

²⁴ Haba me thiah, men ym sheptieng: men thiah ruh, bad ka jingïohthiah jong me kan long kaba bang.

²⁵ Wat sheptieng ïa ka jingsheptieng kaba kyndit, lymne ïa ka jingpynjot jong ki bymman, haba ka wan lap;

²⁶ naba U Trai un long ka jingshaniah jong me, bad un sumar ïa ka kjat jong me ba kan ym ngat.

²⁷ Wat khang ïa ka babha na kita kiba dei ban ïoh ïa ka, haba ka shong ha ka bor ka kti jong me ban leh ïa kata.

²⁸ Wat ong ïa la u paramarjan, “Khie leit, sa wan pat, te lashai ngan sa ai;” haba kata ka don ha me mynta.

²⁹ Wat thaw ïa ka basniew pyrshah ïa la u paramarjan, haba u shongsuk hajan jong me.

³⁰ Wat ïaleh ïa u briew khlem daw, lada um shym leh sniew ei ei ïa me.

³¹ Wat bishni ïa u briew uba leh jubor, bad wat jied ïa kawei ruh na ki lynti jong u.

³² Naba uba mutlop u long ka jingijli ïa U Trai: hynrei, ka jingrieh jong u ka don bad uba beit.

³³ Ka jingtim U Trai ka don ha ka ïing u bymman; hynrei, u kyrkhu ïa ka jaka shong jong u bahok.

³⁴ Shisha un rkhiebeiñ ïa kiba rkhiebeiñ, hynrei, u ai ka jingaiei ïa kiba sngewrit.

³⁵ U bastad un ïoh bynta ïa ka burom; hynrei, ka jinglehrain kan long ka jingkyntiew jong ki babieit.