PROBERB 29 - KA BAIBL

¹ Uta haba la sneng ïa u bunsien u pyneh ïa la ka ryndang yn pynlwet kyndit ïa u, bad kata bymdon jingshna shuh.

² Haba ïa ki bahok la nang pynbun, ki briew ki shadkmen: hynrei, haba u bymman u synshar, ki briew ki ud.

³ Jar uba ieit ïa ka jingstad u pynkmen ïa la u kpa: hynrei, uta uba shait ïalok bad ki nuti un pynsyrwa ïa la ka spah.

⁴ U syiem da ka jingbishar u pynskhem ïa ka ri: hynrei, uta uba shim ïa ki jingai u pynkyllon ïa ka.

⁵ U briew uba ïaroh arsap ïa la u paramarjan u siang ka jar ïa ki jingjam jong u.

⁶ Ha ka jingpalat u riewbymman don ka jingriam: hynrei, u bahok u rwai bad u shadkmen.

⁷ U bahok u pyrkhat ïa ka kam jong u baduk: u bymman um don ka jingshemphang ban tip ïa ka.

⁸ Ki briew kiba rkhiebeiñ ki wiang ding ïa ka shnong: hynrei, ki briew ki bastad ki pynphai noh ïa ka jingbitar.

⁹ Lada u briew u bastad u ïasaid nia bad u briew u babieit, la u bitar, la u rkhie, kan ym don ka jingsuk shuh.

¹⁰ Kiba bit snam ki shun ïa u bajanai: bad shaphang uba beit, ki wad ïa ka jingim jong u.

¹¹ U babieit u shu pynmih noh ïa la ka jingbitar baroh: hynrei, u briew u bastad u khang noh ïa ka bad u pynjai jai ïa ka.

¹² Lada u nongsynshar u pynsngew ïa ka lamler, ki shakri jong u baroh ki long bymman.

¹³ U briew u baduk bad u nongbanbeiñ ki ïashem lang: U Trai uba pyntyngshaiñ ïa ki khmat jong ki baroh ar ngut.

¹⁴ U syiem uba bishar ha kaba shisha ïa ki baduk, ïa ka khet jong u yn pynskhem ha la ka rta.

¹⁵ U dieng sympat bad ka jingsneng ki ai ka jingstad: hynrei, u khynnah ba la shu iehnoh katba mon u pynlehrain ïa la ka kmie.

¹⁶ Haba ïa ki bymman la nang pynbun, ka jingpalat ka nang roi: hynrei, ki bahok kin ïoh khmih ïa ka jingkyllon jong ki.

¹⁷ To sneng pynbeit ïa la u khun, te un ai kaba jahthait ïa me; shisha, un ai kaba sngewbha ïa ka mynsiem jong me.

¹⁸ Ha ka bymdon ka jingithuhpaw, ki briew ki kynther noh ïa ka adong: hynrei, uta uba sumar ïa ka aiñ, suk uta keiñ.

¹⁹ U shakri un ym pdiang ïa ka jingsneng da ki ktien: naba la u sngewthuh ruh un ym pynsngew.

²⁰ Me ïohi ïa u briew uba kyrkieh ha la ki ktien? kham kyrmen ïa u babieit ban kum ïa uta.

²¹ Uba ri pynsuk ïa la u shakri na dang khynnah uta un wan long u khun ïa u ha ka bakhatduh.

²² U briew uba bitar u pynkynroi ïa ka jingïaleh, bad u briew uba shla u kynrei ka jingpalat.

²³ Ka jingsarong u briew ka pynpoh ïa u: hynrei uta uba rit ha ka mynsiem un ïoh ka burom.

²⁴ Jar uba ïabynta lem bad u nongtuh u isih ïa la ka jong ka mynsiem: u ïohsngew ïa ka jingpynsmai te um kren ei ei.

²⁵ Ka jingsheptieng ïa u briew ka wallam ka jingriam: hynrei, jar uba shaniah ha U Trai un suk skhem.

²⁶ Shibun kiba wad ïa ka jingsngewbha u nongsynshar: hynrei, ka jingbishar u briew ka wan na U Trai.

²⁷ U riewbymhok u long ka jingijli ha u bahok: bad uta uba beit ha ka lynti u long ka jingijli ha u bymman.