PROBERB 28 - KA BAIBL

Kiba bymman bad ki bahok

¹ U bymman u phet ïap ha bymdon ba beh ïa u: hynrei, ki bahok ki shlur kum u sing.

² Namar ki jingpalat ka ri kin long shibun ki nongsynshar jong ka: hynrei, da ki briew ki bashemphang bad kiba tip ïa ka jinglong jong ka, yn pynslem.

³ U briew u bakyrduh uba banbeiñ ïa u baduk u long kum u 'lap bah 'lap san u bympynsah ka jingbam.

⁴ Kita kiba iehnoh noh ïa ka hukum ki ïaroh ïa ki bymman: hynrei, kat kiba sumar ïa ka hukum, ki ïaleh ïa ki.

⁵ Ki briew ki basniew kim sngewthuh ïa ka jingbishar: hynrei, kita kiba wad ïa U Trai ki sngewthuh ïa kiei kiei baroh.

⁶ Lah u baduk uba ïaid ha la ka jingbeit, ban ïa uba mutlop ïa la ki lynti, la u riewspah ruh.

⁷ Jar uba sumar ïa ka hukum u long u khun u bastad: hynrei, uta uba long u lok jong kiba bam lalot u pynlehrain ïa la u kpa.

⁸ Uta uba pynkhraw ïa la ka spah da kaba shim sut than bad ka jingpynroi, u lum ïa ka ha uta uba leh isynei ïa ki baduk.

⁹ Uba phai noh ïa la ka shkor na kaba ïohsngew ïa ka hukum, wat ka jingduwai jong uta ka long ka jingijli.

¹⁰ Uta uba pynsakma ïa uba beit sha ka lynti ka basniew, u hi un hap sha la ka jong ka 'liewlep: hynrei, uta uba janai un ïoh kynti ïa ka babha.

¹¹ U briew u bariewspah u long stad ha la ka jong ka jingñiew; hynrei, u baduk uba don jingshemphang u khmih thew ïa u.

¹² Haba u bahok u pynlah, ka don ka burom kaba khraw; hynrei, haba u bymman u ïeng, ki briew ki buhrieh ïa lade.

¹³ Uta uba tap ïa la ki jingpalat un ym man bha: hynrei, jar uba phla bad ba iehnoh noh ïa ki un ïoh ka jingisynei.

¹⁴ Suk uta u briew uba sheptieng ha la ka sngi: hynrei, uta uba pyneh ïa la ka dohnud un hap sha ka basniew.

¹⁵ Kum u sing u bakyrhuh, bad ka dngiem ba ïaidwir; kumta long u nongsynshar bymman halor ki briew ki baduk.

¹⁶ U nongsynshar uba khlem jingshemphang u long ruh u nongbanbeiñ eh: hynrei, uta uba isih ïa ka jingkhwan un pynslem ïa la ki sngi.

¹⁷ U briew uba kit ïa ka snam jong uno uno un phet ïap sha ka 'liewlep; to mano mano wat khang ïa u.

¹⁸ Jar uba ïaid beit yn pynim ïa u: hynrei, uta uba mutlop ha la ki lynti un hap shisyndon.

¹⁹ Uta uba lur ïa la ka khyndew un ïoh pahuh ïa u kpu: hynrei, uta uba leit bud ïa ki 'riewthala un ïoh ka jingkyrduh la biang.

²⁰ U briew uba lah ban shaniah un kyrhai ki jingkyrkhu: hynrei, uta uba pynkyrkieh ban riewspah un ym lait na ka jingpynshitom.

²¹ Kaba shah shiliang kam long ka babha: lymne ba u briew un leh palat na ka bynta shi lyngkhot u kpu.

²² U briew u basniew ka khmat u beh kyrkieh ïa ka spah, bad um tip ba ka jingkyrduh kan wan lap ïa u.

²³ Uta uba sneng ïa u briew un kham ïoh ka jingsngewbha hadien, ban ïa uba ïaroh arsap da la u thylliej.

²⁴ Jar uba lute ïa la u kpa lane ïa la ka kmie, bad u ong, “Kam long ka jingpalat;” uta u long u lok jong u nongpynjot.

²⁵ Uta uba don ka mynsiem bakhwan u pynkynroi ïa ka jingïaleh: hynrei, uba shaniah ha U Trai ïa uta yn pynsngaid.

²⁶ Uta uba shaniah ha la ka jong ka dohnud u long u babieit: hynrei, jar uba ïaid stad, ïa uta yn pynim.

²⁷ Uta uba ai ha u baduk un ym kyrduh: hynrei, uta uba buhrieh ïa la ki khmat un ïoh shibun ki jingtim.

²⁸ Haba ki bymman ki ïeng, ki briew ki buhrieh ïa lade: hynrei, haba ki ïap, ki bahok ki nang roi.