PROBERB 27 - KA BAIBL

¹ Wat pynsarong ïa lade shaphang kaba lashai; naba mem tip kaei ka ban jia ha kaba shi sngi.

² Ai ba uwei pat un ïaroh ïa me, te ym ka shyntur jong me hi; u nongwei, te ym ki rmiang shyntur jong me hi.

³ U maw u khia, bad u shyiap um sting; hynrei, ka jingbitar u babieit ka kham khia ïa ki baroh ar.

⁴ Ka jingbitar ka dom, bad ka jingbitar lep ka long ka jingshlei um; hynrei, uei uba lah ban ïeng ha khmat ka jingbishni?

⁵ Lah ka jingsneng kaba paw ban ïa ka jingieit ba la buhrieh.

⁶ Kiba shisha long ki jingmong na u lok: hynrei, ki jingdoh jong u nongshun ki long shibun.

⁷ Ka mynsiem kaba dap ka isih ïa ka rewngap: hynrei, ha ka mynsiem ka bathngan kaei kaei baroh kaba kthang ka long thiang.

⁸ Kumba ka sim ka sakma na la ka skum, kumta long u briew uba sakma na la ka jaka.

⁹ Ka umphniang bad ka jingiwbih ki pynkmen ïa ka dohnud: kumta ruh, ka jingleh ieit u lok kaba mih na ka jingpyrkhat ka dohnud.

¹⁰ Ïa la u jong u lok, bad u lok u kpa jong me wat iehnoh noh; bad wat leit sha ka ïing u para jong me ha ka sngi ka jingjynjar jong me: lah u paramarjan uba hajan ban ïa u para uba ha jngai.

¹¹ Ko khun, to long stad, bad to pynkmen ïa ka dohnud jong nga, ba ngan ïoh phai ktien ïa uba krenbeiñ ïa nga.

¹² U briew u basian u ïohi ïa ka jingsniew, bad u buhrieh ïa lade: hynrei, u bymsian u shu nang ïaid, bad u shah shitom namar kata.

¹³ To shim ïa ka jaiñkup jong uta uba bahjamin ïa u nongwei: bad to bat bynda ïa uta uba bahjamin ïa ka kynthei nongwei.

¹⁴ Uba kyrkhu ïa la u lok da ka ktien bajam, ba u da khie dang step ruh, ïa kata yn ñiew ka jingtim ïa u.

¹⁵ Ka jingjaw ba khlem pud ha ka sngi baslap eh bad ka kynthei kaba ïakajia ki ïalong kumjuh:

¹⁶ uta u ban khang ïa ka u shu khang ïa ka lyer, bad ka kti kamon jong u ka ïakynduh bad ka umphniang.

¹⁷ Ka nar ka shut ïa ka nar; kumta u briew u shut ïa ka khmat u lok jong u.

¹⁸ Uta uba sumar ïa u dieng Dumbur un bam ïa u soh jong u: bad uta uba ap shakri ïa la u kynrad yn pyndonburom ïa u.

¹⁹ Kumba ha ka um ka khmat ka ïadei bad ka khmat, kumta ruh ka dohnud u briew bad u briew.

²⁰ Ka jingtep bad ka jingjot kim ju kdang; bad ki khmat u briew kim ju kdang.

²¹ U khiew pynphrang u long ïa ka rupa, bad ka lawar ding ïa ka ksiar, bad ïa u briew la tynjuh da ka jingïaroh jong u.

²² La me dung ïa u bieit da u synrei ha u thlong hapdeng u Kew ba la lwet, ka jingbieit jong u kan ym kynriah na u.

²³ To men minot ban tip ïa ka jinglong ki kynhun langbrot jong me, bad to khmih bha ïa la ki kynhun masi:

²⁴ naba ka spah kam neh junom; bad ka pansngiat hato kan sah pateng la pateng baroh?

²⁵ Ïa u phlang la kynshew bad u 'langlung u mihpaw, bad ïa ki 'hur lum la lum sha ïing.

²⁶ Ki khun langbrot ki long ïa ki jaiñ jong me, bad ki blang ki long ka dor ka lyngkha:

²⁷ bad kan don ruh ka dud blang biang ïa ka jingbam jong me, ïa ka jingbam ki ba-ha-ïing jong me; bad ka jingbsa ïa ki shakri kynthei jong me.